ލަންޑަން (އޮކްޓޫބަރު 2) - ޔުއެފާ ޗެމްޕިއަންސް ލީގުގައި ރޭ ސްލޮވާކިއާގެ ސްލޮވަން ބްރަޓިސްލާވާ 4-0 އިން ބަލިކޮށް، މެންޗެސްޓާ ސިޓީން މި ފަހަރުގެ މުބާރާތުގައި ދެ ވަނަ މޮޅު ހޯދިއިރު، އާސެނަލުން 2-0 އިން ފްރާންސްގެ ޗެމްޕިއަން ޕީއެސްޖީ ބަލިކޮށްފި އެވެ.
އާސެނަލުން ވަނީ މި ފަހަރުގެ ޗެމްޕިއަންސް ލީގުގައި ކުޅުނު ފުރަތަމަ މެޗުގައި ރަށުންބޭރުގައި އެޓަލަންޓާއާ އެއްވަރުވެފަ އެވެ. އަމިއްލަ ދަނޑުގައި ރޭ ކުޅުނު އާސެނަލުން ޕީއެސްޖީ ބަލިކުރީ ފުރަތަމަ ހާފުގައި ޖެހި ގޯލުތަކާ އެކު އެވެ.
ރޭގެ މެޗުގައި އާސެނަލުން ލީޑުނެގީ، މެޗުގެ 20 ވަަނަ މިނިޓްގައި ލެއަންޑްރޯ ޓްރޮސާޑް ނަގައިދިން ބޯޅައަކުން، ކައި ހަވާޓްޒް ޖެހި ގޯލުންނެވެ. މި ސީޒަނުގައި އާސެނަލް ދަނޑުގައި ކުޅުުނު ހުރިހާ މެޗެއްގައި ހަވާޓްޒް އަންނަނީ ލަނޑު ޖަހަމުންނެވެ. ޕީއެސްޖީ ކޮޅަށް އާސެނަލްގެ ދެ ވަނަ ލަނޑު ޖެހީ ހިލޭ ޖެހުމަކުން، ބުކާޔޯ ސަކާ އެވެ.
އަހުލާގީ މައްސަލައެއްގެ ސަަބަބުން ޕީއެސްޖީން ރޭގެ މެޗުގައި ކުޅުނީ އޮސްމާން ޑެމްބެލޭ ނުލަ އެވެ. މި މެޗުގައި ޕީއެސްޖީ އަށް ލަނޑެއް ނުޖެހި ނިންމާލަން ޖެހުުނުއިރު، މިއީ ޗެމްޕިއަންސް ލީގުގެ ގްރޫޕް ސްޓޭޖުގައި ޕީއެސްޖީން އެންމެ ފަހުން ކުޅުނު 52 މެޗުގެ ތެރެއިން ލަނޑެއް ނުޖެހި ނިންމާލަން ޖެހުނު ފުރަތަމަ މެޗެވެ.
ބްރަޓިސްލާވާ ކޮޅަށް ސިޓީ އަށް ލީޑުނަގައިދިނީ، މި ސީޒަނުގައި ބާސެލޯނާ ދޫކޮށް އަލުން ސިޓީއާ ގުޅުނު އިލްކާއި ގުންޑޮގާން އެވެ. ފިލް ފޯޑެން، މި ސީޒަނުގައި ޖެހި ފުރަތަމަ ގޯލުން ސިޓީން ލީޑުފުޅާކުރި މި މެޗުގައި އެ ޓީމުގެ ތިން ވަނަ ލަނޑު ޖެހީ އާލިން ބްރައުޓް ހާލަންޑް އެވެ. ސިޓީން ދެ ވަނަ ހާފުގައި އެ ޓީމުގެ ހަތަރު ވަނަ ގޯލު ޖެހިއިރު، މި ލަނޑު ޖެހީ، ޖޭމްސް މެކްއަޓީ އެވެ.
ބާސެލޯނާ އިން ރޭ ވަނީ ސްވިޒަލެންޑްގެ ޔަންގް ބޯއީސް އަތުން 5-0 އިން މޮޅުވެ، މި ފަހަރުގެ ޗެމްޕިއަންސް ލީގުގައި ފުރަތަމަ މޮޅު ހޯދައިފަ އެވެ. ބަޔާ ލެވަކޫސަނުން ވަނީ 1-0 އިން އޭސީ މިލާން ބަލިކޮށްފަ އެވެ. އަދި އިންޓަ މިލާނުން ވަނީ 4-0 އިން ރެޑްސްޓާ ބެލްގްރޭޑް ބަލިކޮށްފަ އެވެ.
