ލިވަޕޫލް (ސެޕްޓެމްބަރު 28) - މި ސީޒަނަށް ފަހު، ލިވަޕޫލްގެ ސީނިއާ ތިން ކުޅުންތެރިންގެ ކޮންޓްރެކްޓް ހަމަވާއިރު، އެ ކުޅުންތެރިންގެ އެއްބަސްވުން އާ ކުރުމަށް ކްލަބުން ކުރާ ކަންތައްތަކާ ގުޅޭ ގޮތުން ނޫސްވެރިން ކުރާ ސުވާލުތަކަށް ލިވަޕޫލްގެ ކޯޗު އާނާ ސްލޮޓް އަނެއްކާ ވެސް ފިނި ޖަވާބުތަކެއް ދީފި އެވެ.
ލިވަޕޫލްގެ ފުރަތަމަ އެގާރައިގައި ގަވާއިދުން ކުޅެމުން އަންނަ ޓީމުގެ ކެޕްޓަން، ވާޖިލް ވެން ޑައިކްގެ އިތުރުން ޓީމުގެ މުހިންމު ދެ ކުޅުންތެރިން ކަމަށްވާ މުހައްމަދު ސަލާހު އާއި ޓްރެންޓް އަލެކްސަންޑަ އާނޯލްޑްގެ އެއްބަސްވުން މި ސީޒަނުގެ ނިޔަލަށް ހަމަވާނެ އެވެ.
ލިވަޕޫލުން މި ތިން ކުޅުންތެރިންގެ ކޮންޓްރެކްޓް އާ ނުކުރާނަމަ، ޖެނުއަރީ 1 ގެ ފަހުން، ޕްރިމިއާ ލީގުގެ ކްލަބްތައް ނޫން ކޮންމެ ޓީމަކާ ވެސް ވާހަަކަ ދައްކައި، ޕްރީ އެގްރީމަންޓެއް ހެދުމުގެ ފުރުސަތު އޮންނާނެ އެވެ.
"ތި އުޅެނީ ތި ސުވާލުތައް އެކި ގޮތްގޮތަށް ކޮށްގެން އަހަރެންގެ ފަރާތުން ތި މީހުން ބޭނުންވާ ޖަވާބެއް ހޯދަން. އަހަރެން ވަރަށް އުފަލުން މި ހުރީ އެ ކުޅުންތެރިން އަހަރެންގެ ޓީމުގައި ތިބީމަ. މި ސީޒަނުގައި އަދިވެސް ވަރަށް ގިނަ މެޗުތަކެއް ކުޅެން އެބަހުރި، އަހަރެން ވަރަށް އުފާވޭ އެ މީހުން މި މެޗުތަކުގައި ބޭނުންކުރެވޭނެތީވެ. ދެން ބަލަންވީ މުސްތަގުބަލު ކިހިނެއްތޯ އޮތީ،" ސްލޮޓް ބުންޏެވެ.
ލިވަޕޫލްގެ ތަރި ސަލާހު ވަނީ މިއީ މިހާރު އޮތްގޮތުން ލިވަޕޫލްގައި އޭނާގެ ފަހު ސީޒަން ކަމަށް ބުނެފަ އެވެ. މީޑިއާ ރިޕޯޓްތައް ބުނާގޮތުން، ސަލާހު ހޯދަން ސައުދީ ޕްރޯ ލީގުގެ ކްލަބްތަކާއި ޕީއެސްޖީން މަސައްކަތް ކުރެ އެވެ. އަލެކްސަންޑަ އާނޯލްޑް، ރެއާލް މެޑްރިޑަށް ބަދަލުވާނެ ކަަމަށް މީޑިއާ ރިޕޯޓްތައް ބުނާއިރު، އޭނާ ވަނީ ކެރިއަރުގައި ގިނަ ތަށިތަކެއް ހޯދުމާއި ލިވަޕޫލްގެ ކެޕްޓަންކަން ކުރުމަކީ ހާއްސަ އަމާޒެއް ކަމަށް ބުނެފަ އެވެ.
ވެން ޑައިކް ވަނީ، އިތުރު ދެ އަހަރަށް ލިވަޕޫލްގައި މަޑުކޮށް، 2026 ވަަނަ އަހަރުގެ ފީފާ ވޯލްޑް ކަޕްގައި ވެސް ކުޅެން ބޭނުންވާ ކަމަށް ބުނެފަ އެވެ.
އިނގިރޭސި ޕްރިމިއާ ލީގުގައި މިރޭ ވުލްވްސްއާ ދެކޮޅަށް ލިވަޕޫލުން ކުޅޭނެ އެވެ. އެ މެޗަށް ލިވަޕޫލްގެ ކީޕަރު، އެލިސަން ބެކާ ވަނީ ފިޓްވެފަ އެވެ.
