ގއ. ދެއްވަދޫ މަސްވެރިންނާއި އޮޑިވެރިން މުޒާހަރާއަށް ތައްޔާރުވެ ތިބުމުން އެ ރަށަށް ދާން މިއަދު އޮތް ދަތުރު ފިޝަރީޒް މިނިސްޓްރީން ކެންސަލް ކޮށްފި އެވެ.
ދެއްވަދޫގެ އޮޑިވެރިއެއް ކަމަށްވާ، އަބްދުﷲ ނާފިޒު "އަދަދު" އަށް ބުނީ ފިޝަރީޒްގެ ވަފުދު އެރަށަށް ދާން މިއަދު އޮތީ މެންދުރުފަހު 3:00 ގައި ކަމަށެވެ. ނަމަވެސް ދެއްވަދޫއަށް ދާން އޮތް ދަތުރު ކެންސަލް ކުރިކަން ކައުންސިލުން މިހާރު އަންގާފައިވާ ކަމަށް ނާފިޒު ބުންޏެވެ.
"އަޅުގަނޑަށް ގުޅީ ހެނދުނު 9:00 ޖެހިއިރު، ފިޝަރީޒް މިނިސްޓަރީގެ ނައިބެއް، ގުޅާފައި ބުނީ އަޅުގަނޑުމެން ތިރަށަށް އަންނާށޭ މި އުޅެނީ، ކިހިނެއްހޭ ތިރަށުގެ ހާލަތު، އަޅުގަނޑު ބުނިން މުޒާހަރާ އެބައޮތޭ މި ރަށުގައި، ތިކޮޅުން އައިސްފިއްޔާ މުޒާހަރާ ކުރާނެޔޭ،" ނާފިޒް ބުންޏެވެ.
މުޒާހަރާއަށް ތައްޔާރުވެފައި އޮތް ކަމަށް ބުނުމުން، އެކަން ހުއްޓުވިދާނެތޯ އެ ގުޅުއްވި ބޭފުޅަކު ތަކުރާރުކޮށް އެއްސެވި ކަމަށް ނާފިޒު ބުންޏެވެ. އަދި އެކަން ކުރާނީ ކިހިނަކުންތޯ އެހުމުން، ނާފިޒުގެ ދޯނިން މަހަށް ދާ މީހުން ގާތު އެކަނި ނަމަވެސް މުޒާހަރާ ނުކުރަން ބުނަން އެ ބޭފުޅަކު އެދިވަޑައިގެންނެވި ކަމަށް އޭނާ ބުންޏެވެ.
"އަޅުގަނޑު ބުނިން އަޅުގަނޑަކަށް ނުބުނެވޭނެޔޭ ހުއްޓާލާކަށް، މިހާރު ވެސް އަޅުގަނޑުމެންނަކަށް ލާރިއެއް ނުލިބޭ، މަހަށް ދާން ތެޔޮކޮޅެއް ނުލިބޭ، އެއޮއް ކޫއްޑޫއިން މިހާރު ވެސް ދެނީ 800 ލީޓަރު ތެލޭ ދޯންޏަކަށް ދުވާލަކު، ތިނަދޫ ކައިރީގައި އެ އޮންނަ ބޯޓަކުން ނުދެޔޭ ތެލެއް، ބުނީމާ ބުނީ އާނ، ތިކަން އެނގެޔޯ އެކަމަކު އޮޑިވެރިންނާ ވާހަކަދެއްކޭނީ ތި ރަށަށް ގޮސްފައޭ،" ނާފިޒު ބުންޏެވެ.
މަސް ދޯނި ފަހަރުގައި ލޮނު ފެނުން މަސް ފިނިކުރާ ނިޒާމު ގާއިމު ކުރުމުގެ މަޝްރޫއާ ބެހޭ މައުލޫމާތު ދިނުމަށް ފިޝަރީޒް މިނިސްޓަރީގެ ޑެޕިއުޓީ މިނިސްޓަރުން ހިމެނޭ ވަފުދަކުން މިހާރު ދަނީ ދެކުނުގެ ބައެއް ރަށްރަށަށް ދަތުރެއް ކުރަމުންނެވެ. އެ ދަތުރުގެ ތެރެއިން އިއްޔެ އެ ވަފުދު ދިޔައީ ގއ. ދާންދޫ އަށެވެ.
ނަމަވެސް އެ ރަށު މަސްވެރިން ވަނީ ސަރުކާރުން މަސްވެރިންނަށް ދޭންޖެހޭ ފައިސާ ނުދީ އެ ރަށަށް ނޭރޭނެ ކަމަށް ބުނެ އެ ވަފުދު އެ ރަށުން ފޮނުވާލާފަ އެވެ. ފިޝަރީޒްގެ ވަފުދު ދެއްވަދޫއަށް ދާން މިއަދު އޮތްކަން އެނގުމާއެކު، އެ ރަށު ބަނދަރު މަތީގައި ވުސް ބެނާތައް ދަމައި މަސްވެރިންނާއި އޮޑިވެރިން ތިބީ މުޒާހަރާއަށް ތައްޔާރުވެގެންނެވެ.
ނާފިޒު ބުނީ ދާންދޫއިން ފެނުނު މަންޒަރު ތަކުރާރު ކުރަން ދެއްވަދޫއަށް ދާން ބޭނުން ނުވާ ކަމަށް އޭނާއަށް ގުޅި މިނިސްޓަރީގެ ނައިބު ވިދާޅުވި ކަމަށެވެ.
"ދެން ބުނި، ދާންދޫގައި މުޒާހަރާ ޖެއްސީމާ ތިމަންނަމެން ބޭނުމެއް ނޫނޯ ފޮޓޯއެއް ނަގުވާކަށް ތި ރަށަށް ދާކަށް، ސޯޝަލްމީޑިއާއަށް، ދެން އަޅުގަނޑު ބުނިން ފޮޓޯއަށް އަރާނެޔެއް ނޫންހެއްޔޭ މިރަށަށް އައިސްފިއްޔާ، އެއީ މި ރަށުގެ މީހުން ތިބީ ހަމަ ވަރަށް ރެޑީގައި،"
ނާފިޒު އެހެން ބުނި ނަމަވެސް، ދެއްވަދޫ ކައުންސިލުގެ ނައިބު ރައީސް، އަހުމަދު ފަޒުހާދު "އަދަދު" އަށް ވިދާޅުވީ ފިޝަރީޒްގެ ވަފުދު އެރަށަށް މިއަދު ދާން އޮތް ދަތުރު ކެންސަލް ކުރީ މޫސުން ގޯސްވުމުގެ ސަބަބުން ކަމަށެވެ.
"މި ރަށަށް ނާންނަ ގޮތަށް ނިންމީ މޫސުން ތަން ނުދިނުމުގެ ސަބަބުން. މޫސުން ވަރަށް ގޯސް،" ފަޒުހާދު ވިދާޅުވި އެވެ.
ނަމަވެސް ދެއްވަދޫއަށް ވެސް އަދި އެ ސަރަހައްދަށް ވެސް އާންމު ދަތުރުފަތުރު ކުރަން އުނދަގޫވާ މިންވަރާ ގާތަށް ވެސް މޫސުން ގޯސް ނޫން ކަމަށް ނާފިޒު ބުންޏެެވެ.
މަސްވެރިންނަށް ދޭން ޖެހޭ ފައިސާ ދޫނުކުރާތީ މީގެ ކުރިން މަސްވެރިން މުޒާހަރާ ކުރުމުން، ސަރުކާރަށް ޕްރެޝަރު ބޮޑުވެގެން އެއްފަހަރާ ހުރިހާ ފައިސާ ދޫކުރި އެވެ. މަސްވެރިންނަށް ސަރުކާރުން ދޭ ފައިސާތައް ލަސްވެގެން ދެ ހަފްތާ ތެރޭގައި ޖަމާކޮށްދޭނެ ކަމަށް ސަރުކާރުން އޭރު ބުނި ނަމަވެސް، ފައިސާ ދޫނުކޮށް މިހާރު ދެ މަސްވަރު ވެފައިވާ ކަމަށް މަސްވެރިން ބުންޏެވެ.
