ބޮޑު ކަންނެލި މަސްވެރިންނަށް މި ސަރުކާރުން ވެފައި ހުރި ވައުދުތައް ފުއްދާނެކަމުގެ ފެހި ސިގްނަލް މިއަދުގެ ބައްދަލުވުމުން ލިބިއްޖެ ކަމަށާއި މި ވަގުތު ހައްޔަރުކޮށްފައި ތިބި މަސްވެރިން ދޫކޮށްލަންދެން އިހުތިޖާޖު ކުރިއަށް ގެންދާނެ ކަމަށް މަސްވެރިން ބުނެފި އެވެ.
ފިޝަރީޒް މިނިސްޓަރު އަހުމަދު ޝިޔާމް އާއެކު ބޮޑު ކަންނެލި މަސްވެރިން މިއަދު ބޭއްވި ބައްދަލުވުމަށްފަހު ނޫސްވެރިންނާ ވާހަކަދައްކަވަމުން ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ) ގެ ނައިބުރައީސް އިމްރާން މުހައްމަދު ވިދާޅުވީ މިއަދުގެ ބައްދަލުވުން ދިޔައީ ވަރަށް ޕޮޒިޓިވްކޮށް ކަމަށެވެ.
"ހިންގާ ކޮމިޓީގެ އިތުރުން ހަމަ އިސްކޮށް މި ކަމުގައި ހަރަކާތްތެރިވާ ކެޔޮޅުންތަކާ އެއްކޮށް މި ބައްދަލުވުން މި ކުރިއަށް ދިޔައީ، އެހެންވީމާ އެ ބޭފުޅުންގެ ވެސް ހުރި، މަސްވެރިކަމުގައި ނުކުމެ އުޅޭއިރު މި ދިމާވާ ކަންތައްތަކާއި މި ހުރިހާ ކަމަކަށް ވެސް ވަރަށް ބޮޑަށް މަޝްވަރާ ކުރެވިގެންދިޔަ، ދެން އަޅުގަނޑު ހަމަ ފާހަގަކޮށްލަން ހަމަ ވަރަށް ޕޮޒިޓިވް ވަރަށް ރަނގަޅު ބައްދަލުވުމެއް މި ދިޔައީ،" އިމްރާން ވިދާޅުވި އެވެ.
މަސްވެރިންގެ ފަރާތުން ވާހަކަދައްކަމުން އިހުތިޖާޖުގައި ބައިވެރިވާ ކެޔޮޅެއް ބުނީ މަސްވެރިން ކުރަމުންދިޔަ އިހުތިޖާޖު މިހައި ހިސާބުން ނިންމާނުލާނެ ކަމަށެވެ. އަދި، ހައްޔަރު ކޮށްފައި ތިބި ދެ ކެޔޮޅުން މިހާރުން މިހާރަށް ދޫކޮށްލައިފި ނަމަ ކުރިއަށް އޮތް ތަނުގައި ވެސް ސަރުކާރާއެކު މަޝްވަރާ ކުރުމަށް ފަސޭހަވެގެންދާނެ ކަމަށް މަސްވެރިން ބުންޏެވެ.
އޭގެއިތުރުން މަސްވެރިން ކުރަމުންދާ ޑިމާންޑުތަކާމެދު ކުރިއަށް އޮތް ދެ ހަފުތާގެ ތެރޭގައި ސަރުކާރުން ގޮތެއް ނިންމާނެ ކަމުގެ ޔަގީންކަން މިނިސްޓަރު ޝިޔާމް ދެއްވި ކަމަށް މަސްވެރިން ބުންޏެވެ.
"މި ވަގުތަށް އަޅުގަނޑުމެންގެ އޮތް އެންމެ ބޮޑު ޑިމާންޑަކީ ހައްޔަރުގައި އެ ތިބަ މީހުން، އެހެންވީމާ ހައްޔަރީން ދޫކޮށްލުމަށްފަހު ދެން 2 ވީކްސް ތެރޭގައި ދެން މިހުރި އެއްޗެއްސަށް [ޑިމާންޑުތަކަށް] ގޮތެއް ނިންމާނީ، އެކަމަކު ހަމަ ގައިމުވެސް އިހުތިޖާޖު ކުރިއަށް ދާނެ އެންމެ ކުޑަމިނުން އަޅުގަނޑުމެންގެ ދެ ކެޔޮޅުން ލިބެންދެން،" މަސްވެރިޔަކު ބުންޏެވެ.
މަސްވެރިންގެ އިތުރުން، ޓުއަރިޒަމް އެމްޕްލޯއީސް އެސޯސިއޭޝަންގެ ނައިބު ރައީސް، ވެސް ފުލުހުން ހައްޔަރު ކޮށްފައިވާ ކަމަށާއި، އޭނާ ދޫކޮށްލުމަށް ވެސް ސަރުކާރަށް ޑިމާންޑު ކޮށްފައިވާނެ ކަމަށް މަސްވެރިން ބުންޏެވެ.
