އއ. އުކުޅަސް މަގު ހަދަން ކުރީގެ ސަރުކާރުން އެރަށަށް ގެންގޮސްފައި ހުރި ތަކެތީގެ ތެރޭގައި ހިމެނޭ ހިމުން ހިލަތަކުން ބައެއް، އެ މަސައްކަތް ނުނިންމައި އެހެން ރަށަކަށް ގެންގޮސްފި އެވެ.
"އަދަދު" އަށް އެނގިފައިވާ ގޮތުގައި ކުރީ ސަރުކާރުން ފެށި އުކުޅަހުގެ މަގު ހެދުމުގެ މަޝްރޫއަށް ގެންދިޔަ ހިމުން ހިލަތަކުން ބައެއް މިސަރުކާރުން ގެންދިޔައީ މާފަރު އެއާޕޯޓު ހެދުމުގެ މަޝްރޫއަށެވެ.
"މަގު ހަދަން ގެނެސްފައި ހުރި ހިމުން ހިލަތައް ގެންދިޔައީ. އެމްޓީސީސީން ބާޖެއް ކައިރިކޮށްފައި ލޮރީއަށް އެ އެއްޗެހި އިއްޔެ އަރުވައި ލޯޑްކޮށްގެން މިއަދު ގެންދިޔައީ،" އެކަން އެނގޭ މީހަކު ބުންޏެވެ.
އުކުޅަހުން "އަދަދު" އާ ވާހަކަ ދެއްކި މީހާ ބުނީ މަގު ހެދުމުގެ މަސައްކަތް ކޮންމެވެސް ވަރަކަށް ކުރިއަށް ދިޔަ ނަމަވެސް، މަގު ހަދަން ގެނައި ސާމާނު ގެންދިޔުމުން މަޝްރޫއު ނިމުން ލަސްވާނެ ކަމަށެވެ.
އޭނާ ބުނީ މަގު ހެދުމުގެ މަޝްރޫއު ނުނިމި ދިގުލައިގެން ދިޔުމުގެ ރަށުގެ ޓޫރިޒަމަށް އަސަރު ކުރަމުންދާ ކަމަށާއި ރަށުގެ އެކި ސަރަހައްދުތަކުގައި ހުރީ ވަޅުގަނޑުތައް ހެދިފައި ކަމަށެވެ.
"ޓޫރިޒަމަށް އަސަރު ކުރަމުންދަނީ. މަގު ހަދަން އެކި ތަންތަނުގައި ވަޅު ކޮނެފައި ހުރީ. ވާރޭ ވެހިލާ އިރަށް ޗަކަ ހެދި ވަރަށް އުނދަގޫތައް ދިމާވޭ. މަގު ހެދުން ލަސްވާ ވަރަކަށް ގެއްލުންވާނެ،" އޭނާ ބުންޏެވެ.
އުކުޅަހުގެ ގޮނޑުދޮށް ހިމާޔަތް ކުރަން ގެނެސްފައި ހުރި ހިލަތަކެއް ވެސް ކުރިން ގެންގޮސްފައިވާއިރު، ރަށުގެ އެކި މަޝްރޫއުތައް ހުރީ ހުއްޓިފަ އެވެ.
މިދިޔަ އަހަރު އެމްޓީސީސީން ފެށި އުކުޅަހުގެ މަގު ހެދުމުގެ މަޝްރޫއުގެ ދަށުން 2678 މީޓަރުގެ 10 މަގެއް ތަރައްގީ ކުރުމަށް އޮތީ ހަމަޖެހިފަ އެވެ.
އެކި ރަށްރަށުގެ މަޝްރޫތަކަށް ގެންގޮސްފައި ހުރި ސާމާނު އެހެން ރަށްރަށުގެ މަޝްރޫއުތަކަށް ގެންދާ މައްސަލައިގައި ރަށްރަށުގެ ރައްޔިތުންނާއި ކައުންސިލްތަކުން އަންނަނީ ކަންބޮޑުވުން ފާޅުކުރަމުންނެވެ.
