އދ. ގެ 79 ވަނަ އާންމު ޖަލްސާގައި ބައިވެރިވުމަށް އެމެރިކާގެ ނިއުޔޯކަށް ކުރައްވަމުން ގެންދަވާ ދަތުރުގެ ތެރެއިން ރައީސް ޑރ. މުހައްމަދު މުއިއްޒު ޔޫ.އެސް އެޖެންސީ ފޯ އިންޓަނޭޝަނަލް އެއިޑް (ޔޫއެސްއެއިޑް) ގެ އެޑްމިނިސްޓްރޭޓަރު ސަމަންތާ ޕަވާ އާ ބައްދަލުކުރައްވައިފި އެވެ.
މިކަމާ ގުޅިގެން ނެރުނު ބަޔާނެއްގައި ރައީސް އޮފީހުން ބުނީ، މި ބައްދަލުވުމުގައި ރާއްޖެއާއި ޔޫއެސްއެއިޑާއި ދެމެދު އޮތް ގުޅުން ބަދަހިކުރަން މަޝްވަރާކޮށް ދެ ފަރާތުގެ މަސްލަހަތު ހިމެނޭ ކަންކަމުގައި އެކުގައި މަސައްކަތް ކުރުމަށް ރައީސް އަދި ސަމަންތާ މަޝްވަރާކުރެއްވި ކަމަށެވެ.
އަދި، ރާއްޖެއިން އެހީއަށް އެދި ހުށަހަޅާފައިވާ ޕްލޭންތަކަށް ސަމަންތާ ތައުރީފުކުރެއްވި ކަމަށާއި ތަފާތު އެކި މަސައްކަތްތަކުގައި ރާއްޖެއަށް އެކު މަސައްކަތް ކުރުމަށް ޔޫއެސްއެއިޑުން ތައްޔާރު ކަމަށް އޭނާ ދެންނެވި ކަމަށް ވެސް ރައީސް އޮފީހުން ބުނެފައިވެ އެވެ.
އޭގެއިތުރުން މި ސަރުކާރުން އެމެރިކާއާ އެކު ކުރަމުންދާ އެންމެ މުހިންމު އެއް މަސައްކަތް ކަމަށްވާ ރާއްޖެއަށް ޕޭޕަލްގެ ހިދުމަތް ދިނުމަށް މަގުފަހި ކުރުމަށާއި އޯޕަން ގަވަމަންޓް ޕާޓްނާޝިޕު (އޯޕީޖީ)ގެ މެންބަރުކަން ހޯދުމަށް ރާއްޖެއިން ކުރަމުންދާ މަސައްކަތްތަކާ ގުޅޭގޮތުން ދެ ބޭފުޅުން މަޝްވަރާކުރެއްވި ކަމަށްވެސްވެ އެވެ.
ޔޫއެސްއެއިޑް އަކީ ރާއްޖޭގައި ހިންގާ އެކި އިގުތިސޯދީ ހަރަކާތްތަކާއި ތަރައްގީގެ މަޝްރޫއުތަކަށް ފައިސާގެ އެހީދޭ އެމެރިކާ ސަރުކާރުގެ އޮނިގަނޑުގައި ހިމެނޭ މިނިވަން އެޖެންސީއެކެވެ.
މި ސަރުކާރަކީ މި ފަހުން އެމެރިކާއާ އެކު އެންމެ ގާތް ގުޅުމެއް ބާއްވަން މަސައްކަތް ކުރަމުންދާ ސަރުކާރެވެ. އެކަމާ ގުޅިގެން ގިނަ ބައެއްގެ ފާޑުކިޔުންވެސް ސަރުކާރަށް އަމާޒުވެފައިވެ އެވެ.
