ޗައިނާގައި އަންނަ އަހަރު ބާއްވާ 20 އަހަރުން ދަށުގެ އޭޝިއަން ކަޕަށް ކޮލިފައިވުމަށް ކުޅޭ ކޮލިފިކޭޝަންގައި ރާއްޖޭން ވާދަކުރަން ޖެހުނީ ވަރުގަދަ ގްރޫޕެއްގައި ކަމަށާއި އަދި ކޮލިފައިން މެޗުތަކަށް އައިއިރު، ޓީމުގެ ހާލަތު އޮތް ގޮތުން ޗެެލެންޖް ބޮޑުވެފައިވާ ކަމަށް ޓީމުގެ ކޯޗު، އަހުމަދު ޝާކިރު (ޝާކިއްޓެ) ބުނެފި އެވެ.
ރާއްޖޭގެ 20 އަހަރުން ދަށުގެ ގައުމީ ޓީމުން ވަނީ މިދިޔަ މަހު، ނޭޕާލުގައި ބޭއްވި 20 އަހަރުން ދަށުގެ ސާފް ޗެމްޕިއަންޝިޕްގައި ކުޅެފަ އެވެ.
ސާފް ޗެމްޕިއަންޝިޕާއި މި ފަަހަރުގެ އޭޝިއަން ކަޕް ކޮލިފައިންއާ އެކު، ރާއްޖޭން ތަމްރީންތައް ފެށި ނަމަވެސް، ދިމާވި ކަންތައްތަކަކާ ހެދި އޭޝިއަން ކަޕް ކޮލިފައިން އަށް ގެންނަން ޖެހުނު ޓީމަށް ވަނީ ބޮޑެތި ބަދަލުތަކެއް އަތުވެފަ އެވެ.
"ހަގީގަތުގައި އަޅުގަނޑުމެންގެ ސާފަށް ދިޔަ ޓީމާއި މި ޓީމާ އަޅުވާކިޔާ ކަމަށްވާނަމަ ސާފަށް ދިޔަ ޓީމުގެ ތެރެއިން 23 ކުޅުންތެރިންގެ ތެރެއިން ގާތްގަނޑަކަށް 12 ކުޅުންތެރިން މީނީ ބަދަލުވެފައި. ހަމައެއާ އެކު، ސާފްގެ ފުރަތަމަ 11 ގައި ކުޅުނު ފަސް ކުޅުންތެރިން ބަދަލުވެފައި މި ވަނީ. އެހެންވީމަ، ޓީމަށް ވަރަށް ބޮޑު ބަދަލެއް އައިސްފައި މި ވަނީ،" ޖަކާޓާގައި، 20 އަހަރުން ދަށުގެ ޓީމުން ބޭއްވި ފުރަތަމަ ޕްރެކްޓިހަށް ފަހު، ޝާކިއްޓެ ބުންޏެވެ.
"މިހާ ބޮޑު ބަދަލެއް އައިސްފައި. ޕްރެކްޓިސް ކުރާކަށް އެހާ ގިނަ ވަގުތު ނުލިބި އަންނަން ޖެހުމަކީ އަސްލު ވަރަށް ބޮޑު ޗެލެންޖެއްގެ ގޮތުގައި ދިމާވެފައި އޮތް ކަމެއް،"
ޓީމަށް މި ވަރުގެ ބަދަލުތަކެއް އައި ސަބަބެއްގެ ގޮތުގައި ޝާކިއްޓެ ބުނެފައިވަނީ، އޭ ލެވަލްގެ އިމްތިހާނުތަކުގައި ބައިވެރިވާ ކުޅުންތެރިން ގިނަވުމާއި ދިމާވި އަނިޔާގެ މައްސަލަތައް ކަމަށެވެ. އެ ގޮތުން، ހަތް ކުޅުންތެރިއަކު އޭ ލެވަލްގެ އިމްތިހާނު ދުވަސްވަރު ކަމަށްވާތީ، ޓީމާ އެކު ނާދެވުނުއިރު، އޭގެއިން ގިނައީ ފުރަތަމަ އެގާރައިގައި ވެސް ކުޅޭ ކުޅުންތެރިން ކަމަށެވެ.
"ދެން ހަމައެއާ އެކު، އަނިޔާގެ މައްސަލަ ވެސް މީގެ ތެރެއަށް އައި. ފަހަތަށް ކުޅޭ ވަރަށް މުހިންމު ކުޅުންތެރިއެއް، ރާއިދު، އެންމެ މޮޅަށް ކުޅުނު އެއް ކުޅުންތެރިޔާ، އެއީ ޕޮލސް ކުޅުންތެރިއެއް. ޕޮލިސް ޓްރެއިނިން އަށް ދާން ޖެހިގެން އޭނަ ވެސް ދާން ޖެހުނީ، ދެން ހަމައެއާ އެކު މާޒިޔާގެ ފަަހަތަށް ކުޅޭ އަފްޒަލް ވެސް މެނިސްކަސް އިންޖަރީއެއް ދިމާވެގެން. އެންމެ ބޮޑު ބަދަލެއް މި އައީ، އޭ ލެވަލްއާ މުބާރާތާ ދިމާވާތީ،" ޝާކިއްޓެ ބުންޏެވެ.
އޭޝިއަން ކަޕް ކޮލިފައިންގައި ރާއްޖެ ގްރޫޕްގެ މެޗުތައް މިއަދު އިންޑޮނޭޝިއާގައި ފަށާއިރު، މި ދެ ޓީމުގެ އިތުރުން، ދެން މި ގްރޫޕްގައި ހިމެނެނީ، ޔަމަން އާއި ޓިމޯ ލެސްޓޭ އެވެ.
ދިހަ އަކަށް ވުރެ ގިނަ އަހަރު އުމުރުފުރާ ގައުމީ ޓީމުތަކުގައި މަސައްކަތްކޮށްފައިވާ ޝާކިއްޓެ ބުނީ މި ގްރޫޕްގައި ހިމެނޭ ކޮންމެ ޓީމެއް ވެސް ފެންނަނީ ވަރުގަދަކޮށް ކަމަށެވެ.
އޭނާ ބުނީ އިންޑޮނޭޝިއާ އަކީ ވަރުގަދަ ޓީމެއް ކަމަށާއި، ދާދި ފަހުން، އާޝިއާން ކަޕްގެ ޗެމްޕިއަންކަން ހޯދައި، ރަނގަޅު މެޗުތަކެއް ކުޅެފައި އޮތުމުން އެ ޓީމުގެ ފެންވަރު ވަޒަންކޮށްލެވޭ ކަމަށެވެ. އަދި ޔަމަން އަކީ ވެސް އަރަބި އެހެެން ގައުމުުތަކަށް ނިސްބަތްވާ ކުޅުންތެރިން ގިނަ އަދި ޔޫރަޕްގައި ދިރިއުޅޭ ޔަމަނަށް ނިސްބަތްވާ ކުޅުންތެރިން ވެސް ހިމެނޭ ޓީމެއް ކަމަށެވެ.
މީގެ އިތުރުން، ޓިމޯ ލެސްޓޭ އަކީ ވެސް ކުރިއެރުން ހޯދަމުން އަންނަ ޓީމެއްގެ ގޮތުގައި ޝާކިއްޓެ ފާހަގަކުރި އެެވެ.
"މި ގްރޫޕަށް ބަލާއިރު، އިންޑޮނޭޝިއާ އަކީ ވެސް ވަރަށް ވަރުގަދަ ޓީމެއް، އެންމެ ފަހުން އާޝިއަން ކަޕްގައި އެ ހޯދި ނަތީޖާތަކަށް ބަލައިފައި ވެސް ހަމަ. އަޅުގަނޑުމެންނަށް އެ ޓީމުގެ ފެންވަރު ވަޒަންކޮށްލަން އެނގޭ. ދެން، ޔަމަން އަކީ ވެސް ވަރަށް ވަރުގަދަ ޓީމެއް، ވަަރަށް ފާސްޓް ޕްލޭޔަރުންތަކެއް ކުޅޭ، ޔަމަން އިން ކުޅުންތެރިން މި އަންނަނީ ހަމަ ސީދާ ޔަމަން އަކުންނެއް ނޫން. ގިނައިން މި އުޅެނީ އަރަބި އެހެން ގައުމުތަކުގަޔާއި ޔޫރަޕްގެ ގައުމުތަކުގައި އުޅޭ ކުޅުންތެރިންގެ ޓީމެއް ހަދާލައިގެން މި އަންނަނީ. އެ މީހުންނަކީ ވެސް ވަރުގަދަ ޓީމެއް،" ޝާކިއްޓެ ބުންޏެވެ.
"ދެން، ޓިމޯ ލެސްޓޭ މިއީ ފުޓްބޯޅައިގައި ނަން މަޝްހޫރު ޓީމެއް ނޫން ވިޔަސް މިހާރު އެ ޓީމުން ވެސް ބޮޑު ކުރިއެރުންތަކެއް ހޯދައިފި، އާޝިއަން ކަޕްގައި ވެސް ވަރަށް ރަނގަޅު ކުޅުމެއް ދެއްކިތަން ފެނިގެންދިޔަ، މެލޭޝިއާއާ އެކު ކުޅެފައިވެސް ރަނގަޅު ނަތީޖާ ނެރެފައި ވަނީ، މި ގްރޫޕަކީ ވަރަށް ވަރުގަދަ ގްރޫޕެއް ހަގީގަތުގައި ބުނަންޏާ،"
ރާއްޖޭން ފުރަތަމަ މެޗުގައި މިއަދު އިންޑޮނޭޝިއާއާ ކުޅޭއިރު، އެ ޓީމުން މި އަހަރު ތެރޭ ރަސްމީ މެޗުތަކާއި އަދި އެކުވެރިކަމުގެ މެޗުތައް ހިމަނައިގެން، ގިނަ އަދަދެއްގެ މެޗުތަކެއް ވަނީ ކުޅެފަ އެވެ. އޭގެ ތެރޭގައި، ޔޫކްްރެއިންގެ 23 އަހަރުން ދަށުގެ ޓީމާ ދެކޮޅަށް ކުޅުނު މެޗާއި އިޓަލީގެ 21 އަހަރުން ދަށުގެ ޓީމާ ދެކޮޅަށް ކުޅުނު މެޗާއި ދެކުނު ކޮރެއާގެ 21 އަހަރުން ދަށުގެ ޓީމާ ދެކޮޅަށް ކުޅުނު މެޗުގެ އިތުރުން، ޖަޕާނުގެ 19 އަހަރުން ދަށުގެ ޓީމާ ދެކޮޅަށް ކުޅުނު މެޗު ހިމެނެ އެވެ.
މުބާރާތުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި އިންޑޮނޭޝިއާގެ ކޯޗު، އިންދްރާ ޖާފްރީއާ އެންމެ ބޮޑަށް އަމާޒުވި ސުވާލަކީ، އެ ޓީމުގައި، އެހެން ގައުމުތަކަށް ވެސް ނިސްބަތްވާ ފަސް ވަރަކަށް ކުޅުންތެރިން ތިބުމަކީ އެޑްވާންޓޭޖަކަށް ވާނެތޯ އެވެ. އޭނާ ބުނީ، ކޮންމެ މެޗެއް ވެސް ބިނާވަނީ އެ މެޗަކަށް ފޯކަސްކޮށްގެން ވާ ތައްޔާރީތަކެއްގެ މައްޗަށް ކަމަށެވެ.
އިންޑޮނޭޝިއާ އާއި ރާއްޖެ ކުޅޭ މެޗު ފަށާނީ ރާއްޖެ ގަޑިން މިއަދު ހަވީރު 17:30 ގަ އެވެ.
