މެންޗެސްޓާ (ސެޕްޓެމްބަރު 23) - އިނގިރޭސި ޕްރިމިއާ ލީގުގައި އާސެނަލާ ދެކޮޅަށް ރޭ 2-2 އިން އެއްވަރުވި މެޗުގައި، މެންޗެސްޓާ ސިޓީގެެ ސްޕެއިން މިޑްފީލްޑަރު، ރޮޑްރީގެ ކަކުލަށް ލިބުނު ސީރިއަސް އަނިޔާއަކާ ހެދި އޭނާ އަށް މި ސީޒަނުގައި ދެން ނުކުޅެވުމުގެ ފުރުސަތު އެބައޮތް ކަމަށް މީޑިއާ ރިޕޯޓްތައް ބުނެފި އެވެ.
މި ސީޒަނުގައި އެންމެ 66 މިނިޓް އަދި ކުޅެފައިވާ ރޮޑްރީ، އާސެނަލް މެޗުގައި ފުރަތަަމަ އެގާރައިގައި ހިމެނިގެން މެޗު ފެށިތާ އިރުކޮޅެއްގެ ތެރޭގައި ކަކުލަށް އަނިޔާވި އެވެ. އެކަމަކު، މެޗު ކުރިއަށް ނުގެންދެވިގެން، ރޮޑްރީ ވަނީ ބަދަލުކޮށްފަ އެވެ.
ރޮޑްރީގެ ކަކުލަށް ލިބުނު އަނިޔާގެ ފުރަތަމަ ޓެސްޓްތަކުން ލިބުނު ނަތީޖާ އަށް ބަލާއިރު، އޭނާގެ ކަކުލުގެ ލިގަމެންޓަށް ސީރިއަސް އަނިޔާއެއްވެފައިވާ ކަމަށް ސްޕެއިނާއި އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ. އިނގިރޭސި މީޑިއާ ރިޕޯޓްތައް ބުނާގޮތުން، ސިޓީން ހުރިހާ ކަމެއް ޔަގީންކުރަން، އިތުރު ޓެސްޓްތަކެއް ހަދަން ރޮޑްރީ ސްޕެއިނަށް ފޮނުވައި، އެ ފަދަ އަނިޔާތަކުގެ ސްޕެޝަލިސްޓަކަށް ދައްކާނެ އެވެ.
މިދިޔަ އަހަރުތަކުގައި، ރޮޑްރީ، 28، އަށް އަނިޔާގެ ސަބަބުން މެޗުތަކެއް ގެއްލިފައިނުވެ އެވެ. އެހެންވެ، އޭނާ އަކީ ސިޓީގެ ކޯޗު ޕެޕް ގާޑިއޯލާ އެންމެ ބޮޑަށް އިތުބާރުކުރާ އަދި ބަރޯސާވާ ކުޅުންތެރިޔާ އެވެ. މި ފަހަރުގެ ޔޫރޯ ސްޕެއިނުން ކާމިޔާބުކުރިއިރު، މުބާރާތުގެ މޮޅު ކުޅުންތެރިޔާ، ރޮޑްރީ އަކީ، މި ފަހަރުގެ ބެލޮންޑިއޯ އެވޯޑަށް ވެސް ވާދަކުރާ ކުޅުންތެރިއެކެވެ.
ސިޓީގެ ކެޕްޓަން، ކެވިން ޑި ބްރޭނާ ވެސް މި ވަގުތު ހުރީ އަނިޔާގަ އެވެ.
