ބާސެލޯނާ (ސެޕްޓެމްބަރު 23) - ސްޕެނިޝް ލީގުގައި ބާސެލޯނާ އިން ވިޔަރެއާލްއާ ދެކޮޅަށް ކުޅުނު މެޗުގައި އެ ޓީމުގެ ކީޕަރު މާކް އަންޑްރޭ ޓާ ސްޓެގެން އަށް އަނިޔާވެ، މި ސީޒަނުގައި ދެން ނުފެނުމުގެ ބިރު އެބައޮތް ކަމަށް އެ ޓީމުން ބުނެފި އެވެ.
ބާސެލޯނާ އިން ވިޔަރެއާލްއާ ދެކޮޅަށް ކުޅުނު މެޗު ކާމިޔާބުކުރީ 5-1 ގެ ނަތީޖާއަކުންނެވެ. މިއީ، ބާސެލޯނާ އިން ސްޕެނިޝް ލީގުގައި، މި ފަހަރު ކުޅުނު ހަ ވަނަ މެޗެވެ. އާ ކޯޗު، ހަންސީ ފްލިކާ އެކު ނުކުމެ، ލީގުގެ މި ހަ މެޗުން ވެސް އެ ޓީމު ވަނީ މޮޅުވެފަ އެވެ.
މި މެޗުގައި ރޮބާޓް ލެވަންޑޯސްކީ ދެ ގޯލު ޖެހިއިރު, ރަފީނިއާ ވެސް ވަނީ ދެ ގޯލު ޖަހައިފަ އެވެ. ބާސެލޯނާގެ ފަސް ވަނަ ގޯލު ޖެހީ ޕަބްލޯ ޓޯރޭ އެވެ.
މެޗުގައި، ބާސެލޯނާގެ ކީޕަރު ސްޓެގެން އަށް އަނިޔާވީ، މި މެޗުގެ ފުރަތަމަ ހާފުގަ އެވެ. އޭނާ އަށް އަނިޔާވެގެން ދަނޑުން ބޭލީ އަށިގަނޑުގަ އެވެ.
މެޗަށް ފަހު ވާހަކަ ދައްކަމުން، ފްލިކް ސްޓެގެން އަނިޔާ އަކީ ސީރިއަސް އަނިޔާ އަކަށްވުން ގާތް ކަމަށެވެ. އަދި ބޮޑަށް ބެލެވޭ ގޮތުން ސްޓެގެންގެ ލިގަމެންޓް އަށް އަނިޔާވުން އެކަށީގެންވާ ކަމަށެވެ. އަދި އެއީ، ލިގަމެންޓްގެ ސީރިއަސް އަނިޔާ އެއް ނަމަ މި ސީޒަނުގައި ދެން ސްޓެގެން ނުފެނުން ގާތް ކަމަށް ވެސް ފްލިކްގެ ވާހަކައިގައި ފާހަގަކުރި އެވެ.
"ސްޓެގެންގެ އަނިޔާ އަކީ ސީރިއަސް އަނިޔާއަކަށްވުން ގާތް. އެކަމަކު އަހަރެން އުންމީދު މިކުރަނީ އެހެން ނުވުން. ބޮޑަށް ބެލެވެނީ ކަކުލުގެ އޭސީއެލް ޓިއާ އެއް ހެން. އެހެންވެއްޖެ ނަމަ މި ސީޒަނުގައި ދެން ސްޓާގެން ނުފެނުން ގާތް" ފްލިކް ބުންޏެވެ.
