މެންޗެސްޓާ (ސެޕްޓެމްބަރު 21) - ފުޓްބޯޅަ ކަލަންޑަރަށް ބަދަލު ގެނެސް، ގިނަ މެޗުތަކެއް ކުޅެން ޖެހޭ ގޮތަށް މުބާރާތްތަކުގެ ފޯމެޓް ބަދަލުކުރާ މައްސަލައިގައި، ކުޅުންތެރިން ހަޅުތާލުކުރަން ޖެހިދާނެކަމަށް، މަޝްހޫރު ގިނަ ކުޅުންތެރިންތަކެއް ބުނެފައިވަނިކޮށް، އެއީ ރަނގަޅު ކަމެއްގެ ގޮތުގައި ދޭހަވާ ގޮތަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ވާހަކަ ދައްކައިފި އެވެ.
ސިޓީގެ ސްޕެއިން މިޑްފީލްޑަރު، ރޮޑްރީ އާއި ރެއާލް މެޑްރިޑްގެ ސްޕެއިން ޑިފެންޑަރު، ޑެނީ ކާވަހާލް އަދި ލިވަޕޫލްގެ ބްރެޒިލް ކީޕަރު އެލިސަން ބެކާ ވަނީ، ފުޓްބޯޅަ ކަލަންޑަރަށް ބަދަލު ގެނެސްގެން ގިނަ މެޗުތަކެއް ކުޅުވާއިރު، ކުޅުންތެރިންގެ ލަފަޔަކަށް ނާހާތީ ކަންބޮޑުވުން ފާޅުކޮށްފަ އެވެ.
މީގެ އިތުރުން ވެސް ގިނަ ކުޅުންތެރިންތަކެއް މި ކަމާ ބެހޭގޮތުން، ޝުއޫރުފާޅުކުރިއިރު، ގިނަ ކުޅުންތެރިންތަކެއް ވަނީ ހަޅުތާލަކަށް ދިއުމަކީ ވެސް އޮތް ކަމެއް ކަމަށް ބުނެފަ އެވެ.
އެކަމާ ގުޅޭގޮތުން ކުރި ސުވާލަަކަށް ދިން ޖަވާބުގައި ގާޑިއޯލާ ބުނީ، ކުޅުންތެރިން ދައްކާ ވާހަކަ އަށް އޭނާ ދެބަސްނުވާ ކަމަށެވެ.
"ކަމެއް ބަދަލުވަންޏާ ނޫނީ ކަމެއް ބަދަލުކުރަންޏާ އެ ކަމެއް މި އަންނަން ޖެހެނީ ކުޅުންތެރިންނާ ހަމައިން ކުޅުންތެރިންނާ ގުޅޭ ގޮތަކަށް. ފުޓްބޯޅައިގެ މި ވިޔަފާރިތައް، ވެރިންނާއި ސްޕޯޓިން ޑިރެކްޓަރުންނާއި މެނޭޖަރުންނާއި މީޑިއާއާ ނުލައި ނުހިނގާނެ. އެކަަމަކު ކުޅުންތެރިންނާ ނުލައި ނުއެއް ކުޅެވޭނެ، އެމީޙުން އަތުގައި އެ ބާރު މި އޮތީ،" ގާޑިއޯލާ ބުންޏެވެ.
އޭނާ ބުނީ، ސީޒަނެއްގެ މައްޗަށް ގިނަ މެޗުތަކެއް ކުޅުވައިގެން ކުޅުންތެރިންގެ ކެރިއަރަށް އެ ދެވެނީ ރަނގަޅު މެސެޖެއް ނޫން ކަމަށެވެ.
ޔޫރަޕިއަން ލީގްސް (33 ގައުމުން 39 ލީގު ތަމްސީލުކުރާ ޖަމިއްޔާ) އިން ވަނީ ކުޅުންތެރިންގެ ޖަމިއްޔާއެއް ކަމަށްވާ، ފިފްޕްރޯއާ އެކު ބައްދަލުވުމެއް ބާއްވައި، އަންނަ އަހަރު ފަށަން އުޅޭ، ގިނަ މެޗުތަކެއް ކުޅެން ޖެހޭ ކްލަބް ވޯލްޑް ކަޕަކީ، ކުޅުންތެރިންގެ ސިއްހަތާއި އެެހެނިހެން ކަންކަމަށް ބެލުމެއް ނެތި ރާވާފައިވާ މުބާރާތެއް ކަމަށް ބުނެފަ އެވެ. ޖަމިއްޔާތަކުން، މި އާ ފޯމެޓާ މެދު ހިތްހަމަނުޖެހެނީ ކުޅުންތެރިން ބްރޭކެއް ނުލިބި އިންތިހާ އަށް މެޗު ކުޅެމުންދާތީ، ކުޅުންތެރިންގެ ސިއްހަތާއި ފުޓްބޯޅަ މެޗުތަކުގެ ފެންވަރަށް އަސަރުކުރަމުންދާތީވެ އެވެ.
