މި މަހު ނެރުނު ފީފާގެ ރޭންކިންގައި ސާފް ސަރަހައްދުން އެންމެ ބޮޑު ކުރިއެެރުމެއް ހޯދި ގައުމަކަށް ސްރީ ލަންކާ ވެއްޖެ އެވެ.
އިއްޔެ، ފީފާ އިން ނެރުނު، ކޮކާކޯލާ ފުޓްބޯޅަ ރޭންކިންގައި، ސްރީ ލަންކާ އޮތީ ދުނިޔޭގެ 200 ވަނައިގަ އެވެ. މިއީ، މިދިޔަ މަހަށް ބަލާއިރު ފަސް ދަރަޖައިގެ ކުރިއެރުމެކެވެ.
މަހަކު އެއް ފަހަރު ފީފާ އިން ނެރޭ ރޭންކިންގެ ތެރެއިން، މި މަހުގެ ރޭންކިންގައި، ލަންކާ ނޫން، ސާފް ސަރަހައްދުގެ ހަތަރު ގައުމެއްގެ ރޭންކިން އަށް ވެއްޓުމެއް އައިއިރު، ދެ ގައުމެއްގެ ރޭންކިން އަށް ބަދަލެއް ނާދެ އެވެ.
ރޭންކިން އަށް ބަދަލެއް ނައިސް އޮތީ، 163 ވަނައިގައި އޮތް ދިވެހި ރާްއްޖެ އާއި 198 ވަނައިގައި އޮތް ޕާކިސްތާން އެވެ. މީގެ ތެރެއިން ރާއްޖޭން އެންމެ ފަހުން ބައިނަލްއަގުވާމީ މެޗެއް ކުޅުނުތާ އެއް އަހަރު ދުވަސް ހަމަވުމާ ގާތަށް ދަނީ އެވެ.
ސާފް ސަރަހައްދަށް ބަލާއިރު، އެންމެ ކުރީގައި އޮތީ، ދެ ދަރަޖައިގެ ވެއްޓުމަކާ އެކު، ދުނިޔޭގެ 126 ވަނައިގައި އޮތް އިންޑިއާ އެވެ. ދެ ވަނައިގައި ރާއްޖެ އޮތްއިރު، ތިން ވަނައިގައި އޮތް ނޭޕާލް އެއް ދަރަޖައިގެ ވެއްޓުމަކާ އެކު، އޮތީ ދުނިޔޭގެ 176 ވަނައިގަ އެވެ. ބޫޓާން ވެސް ދެ ދަރަޖައިގެ ވެއްޓުމަކާ އެކު އޮތީ ދުނިޔޭގެ 184 ވަނައިގަ އެވެ. ދުނިޔޭގެ 186 ވަނައިގައި ބަންގްލަދޭޝް އޮތީ ދެ ދަރަޖައިގެ ވެއްޓުމަކާ އެކު އެވެ. ޕާކިސްތާނުގެ ރޭންކިން އަށް ބަދަލެއް ނައިސް، އެ ޓީމު އޮތް ހިސާބުގައި އޮތްއިރު، ލަންކާ މި ވަނީ ރޭންކިންގައި ކުރިއެރުމުގެ މަސައްކަތް ފަށައިފަ އެވެ.
ލަންކާ އަށް މި ފަހަރުގެ ރޭންކިންގައި ބޮޑު ކުރިއެރުމެއް ލިބިފައިވަނީ އޭޝިއަން ކަޕް ކޮލިފައިންގައި މި މަހު، ކެމްބޯޑިއާގެ މައްޗަށް ކުރިހޯދުމުންނެވެ. ނޭޕާލްގެ ކުރީގެ ކޯޗު، ކުވެއިތުގެ އަބްދުﷲ އަލް މުތައިރީގެ ކޯޗުކަމުގައި ކުޅުނު ލަންކާ ޓީމުން، ކޮލަމްބޯގައި ކުޅުނު މެޗު 0-0 އިން އެއްވަރުވިއިރު، ކެމްބޯޑިއާގައި ކުޅުނު މެޗު 2-2 އިން އެއްވަރުވެ، ޕެނަލްޓީގައި ލަންކާ ވަނީ 4-2 އިން މޮޅުވެފަ އެވެ.
އަންނަ މަހުގެ ފީފާ ދުވަސްތަކުގައި ވެސް ސްރީ ލަންކާ އިން މެޗުތަކެއް ކުޅެން އަންނަނީ މަސައްކަތް ކުރަމުންނެވެ. އެ ގޮތުން، މިޔަންމާއާ ދެކޮޅަށް ދެ މެޗެއް ކުޅުމުގެ މަަސައްކަތް ސްރީ ލަންކާ ފުޓްބޯޅަ ފެޑެރޭޝަނުން އަންނަނީ ކުރަމުންނެވެ.
މިދިޔަ އަހަރު ހަތް މަސް ވަންދެން ފީފާ އިން ލަންކާ ސަސްޕެންޑްކޮށްފައި އޮތެވެ. އެއީ، ތިން ވަނަ ފަރާތެއްގެ ނުފޫޒު ފޯރާފައިވާ ކަމަށް ބުނެ އެވެ. އެ ސަސްޕެންޝަނާ ހެދި ލަންކާ އަށް މިދިޔަ އަހަރުގެ ސާފް ޗެމްޕިއަންޝިޕް ގެއްލުނެވެ. ހަތް މަހާއި ހަތް ދުވަހަށް ފަހު، ސަސްޕެންޝަނުން ސަލާމަތްވެ، ލަންކާ އިން އަންނަނީ އެ ގައުމުގެ ފުޓްބޯޅަ ހަމަމަގަށް އެޅުވުމަށާއި ކުރިއެރުން ހޯދަން، ގައުމީ ޓީމު ވަރުގަދަ ކުރުމުގެ މަސައްކަތް ކުރަމުންނެވެ. އެ ގޮތުން، އެކި ގައުމުތަކުގައި ތިބި ލަންކާ އަށް ނިސްބަތްވާ ކުޅުންތެރިން ލަންކާ ގައުމީ ޓީމަށް ކުޅެވޭ ގޮތް ވަނީ ހަދައިފަ އެވެ. އެ ގޮތުން، ކެމްބޯޑިއާއާ ދެކޮޅަށް ކުޅުނު މެޗުގައި، މަޝްހޫރު ގައުމުތަކުގައި ދިރިއުޅޭ ލަންކާ އަށް ނިސްބަތްވާ ގިނަ ކުޅުންތެރިންތަކެއް ވަނީ އެ ޓީމަށް ކުޅެފަ އެވެ.
