މިލާން، އިޓަލީ (ސެޕްޓެމްބަރު 17) - ސީޒަނެއްގެ ތެރޭގައި ގިނަ މެޗުތަކެއް ކުޅެން ޖެހޭ ގޮތަށް، މުބާރާތްތަކުގެ ފޯމެޓް ބަދަލުކުރުން ފަދަ މުހިންމު ނިންމުންތައް ނިންމާއިރު، ކުޅުންތެރިންގެ ލަފާނުހޯދާތީ ލިވަޕޫލްގެ ކީޕަރު، ބްރެޒިލްގެ އެލިސަން ބެކާ ކަންބޮޑުވުން ފާޅުކޮށްފި އެވެ.
މިދިޔަ ސީޒަނުގައި ލިވަޕޫލުން ހުރިހާ މުބާރާތެއްގައި 58 މެޗު ކުޅެފައިވެ އެވެ. މި ފަހަރު ޗެމްޕިއަންސް ލީގުގެ ފޯމެޓަށް އައި ބަދަލާ އެކު، މެޗު އިތުރުވިއިރު، ސީޒަނުގެ ހުރިހާ މުބާރާތެއްގެ ފައިނަލަށް ލިވަޕޫލް ދަތުރުކޮށްފިނަމަ، އެ ޓީމުން ކުޅޭ މެޗުގެ އަދަދު ޔަގީނުން ވެސް 65 އަކަށް އަރާނެ އެވެ. އެއީ، އެފްއޭ ކަޕްގެ ރީޕްލޭ އާއި ޗެމްޕިއަންސް ލީގުގެ ޕްލޭއޮފް ކުޅެން ޖެހިއްޖެނަމަ، އެ މެޗުތައް ނުހިމަނަ އެވެ.
ލިވަޕޫލާއި ބްރެޒިލަށް މިދިޔަ ސީޒަނުގައި، 42 މެޗު ކުޅެދިން، އެލިސަން އަށް އަނިޔާގެ ސަބަބުން ދެ މަހެއްހާ ދުވަސް ގެއްލުނެވެ. މި ސީޒަނުގައި ވެސް ގިނަ މެޗުތަކެއް ކުޅެން ޖެހޭއިރު، އަނިޔާގެ މައްސަލަ އައުމުގެ ބިރު އެބައޮތެވެ.
"އެއްވެސް މީހަކު ނާހާ އަހަރުމެން ދެކޭ ގޮތެއް. ފަހަރެއްގައި މުހިންމު ނުވަނީ ކަންނޭނގެ. އެކަމަކު، ޔަގީނުން ވެސް މިއީ އަހަރެމެން ދައްކަމުން އަންނަ ވާހަކައެއް މެޗު އިތުރުވުމަކީ އަހަރެމެންނަށް މީގެ ގެއްލުން ކުރިމަތިވާ ކަމެއް،" އެލިސަން، 31، ބުންޏެވެ.
ފުޓްބޯޅަ ސަޕޯޓަރުން ގިނަ މެޗުތައް ބަލާހިތްވާނެކަން އެނގޭ ކަމަށާއި ފުޓްބޯޅައިގައި މީޑިއާ އާއި ޓީވީގެ މި އާމްދަނީ އާއި އެހެން ހުންނަ ފައިސާގެ ކަންކަން ވެސް އެނގޭ ކަމަށް އެލިސަން ވަނީ ބުނެފަ އެވެ.
"އަހަރެމެން މޮޔައެއް ނޫން މި ބުނި ކަންކަން ނުވިސްނޭހާ. އެކަަމަކު، މި ކަލަންޑަރު ހަދާ މީހުން އެބަޖެހޭ އެއްތަނެއްގައި ތިބެ އިށީނދެލައިގެން އަހަރެމެންގެ (ކުޅުންތެރިން ދެކޭ ގޮތް ވެސް) އަޑުވެސް އަހާލަން. އަހަރެމެން ކޮންމެ މެޗެއްގައި ވެސް އެންމެ މޮޅަށް ކުޅެން ބޭނުމީ. އެކަމަކު، ވަރުބަލިވެފައި ހުރެގެން، އެންމެ ރަނގަޅަށް ނުކުޅެވޭނެ،" އެލިސަން ބުންޏެވެ.
ފުޓްބޯޅައިގައި ހުރި މި ފަދަ މައްސަލަތައް ހައްލުކުރެވޭނީ މަޝްވަރާކޮށްގެން ކަމަށާއި އެކަމަކު، މި ވަގުތުގެ މަންޒަރުތައް ފެންނަ ގޮތުން އެއްވެސް ކަމެއްގެ ހައްލެއް އަވަަހަަށް ލިބޭނެ ކަމަށް ނުބެލެވޭ ކަމަށް އެލިސަން ވަނީ ބުނެފަ އެވެ.
