ލަންޑަން (ސެޕްޓެމްބަރު 13) - ޓޮޓެންހަމް ހޮޓްސްޕާސްގެ ކެޕްޓަން، ސޮން ހެއުން މިންގެ ނަސްލަށް މަލާމަތް ރައްދުވާ ގޮތަށް އެ ޓީމުގެ މިޑްފީލްޑަރު، ރޮޑްރީގޯ ބެންޓަންކޫރު ވާހަކަދެއްކި މައްސަލައެއްގެ މައްސަލަ އިނގިރޭސި އެފްއޭ އިން ބަލަން ފަށައިފި އެވެ.
އުރުގުއޭގެ ޓީވީ އަކަށް ދިން އިންޓަވިއުއެއްގައި، އެ ގައުމުގެ މިޑްފީލްޑަރު، ބެންޓަންކޫރު ގާތުގައި ޓޮޓެންހަމްގެ ޖޯޒީއެއް ދޭން އެދުމުން، އޭނާ ބުނެފައިވަނީ، ބޭނުންވަނީ ސޮންގެ ޖޯޒީއެއް ތޯ ސުވާލުކޮށް، ސޮންގެ އާއިލާ މީހެއްގެ ޖޯޒީ ދިނަސް ނޭނގޭނެ ކަމަށާއި އެންމެން ތިބެނީ އެއްގޮތަށް ކަމަށް ބުނެފަ އެވެ.
މިއީ، ދެކުނު ކޮރެއާގެ މީހުންގެ ބުރުސޫރަ ހުންނަ ގޮތަށް މަލާމަތް ރައްދުވާ ގޮތަށް، ބެންޓަންކޫރު ބުނި އެއްޗެއް ކަމަށް ބަލައި، ގިނަ ބަޔަކު އެ ވާހަކަ ދެއްކި އެވެ. އޭގެ ފަހުން، ބެންޓަންކޫރު ވަނީ އިންސްޓަގްރާމް މެދުވެރިކޮށް ކުރި ޕޯސްޓެއްގައި ސޮން ކިބައިން މާފަށް އެދިފަ އެވެ. އަދި އެއީ ވަރަށް ޖޯކަކަށް ބުނި ކަމުގައި ވިޔަސް ދެއްކުނު ގޯސް ވާހަކައެއް ކަމަށް ބެންޓަންކޫރު ވަނީ އެއްބަސްވެފަ އެވެ.
ބެންޓަންކޫރުގެ މި ވާހަކައިގެ މައްސަލަ އިނގިރޭސި އެފްއޭ އިން ބަލަން ފަށާފައިވަނީ، މިއީ، އޭނާގެ ފަރާތުން ފެނުނު ޑިސިޕްލިނަރީ މައްސަލައެއް ކަމަށް ބުނެފަ އެވެ. އަދި މި މައްސަލައިގައި، ޖަވާބުދާރީވެ، އެޕީލެއް ކުރަން ބޭނުންނަމަ، މި މަހުގެ 19 އަށް ބެންޓަންކޫރަށް އޮތީ ފުރުސަތު ދީފަ އެވެ.
މި މައްސަލަ ބަލައި ނިމެންދެން، ބެންޓަންކޫރަށް އެއްވެސް ސަސްޕެންޝަނެއް ނާންނާނެ އެވެ. އެހެންކަމުން، މެޗުތަކުގައި ކުޅެން އެއްވެސް ހުރަހެއް ނެތެވެ.
