ގައުމީ އަންހެން ވޮލީބޯޅަ ޓީމުގެ ސެޓަރު، ފާތިމަތު ޖޫޒާން ޒަރީރު ދެކޭގޮތުގައި، މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕުން ހާސިލްކުރެވޭ އެންމެ ބޮޑު ކަމަކީ ދިވެހި ސަޕޯޓަރުންގެ މެދުގައި އަންހެން ވޮލީ ޓީމަށް އޮންނަ އިތުބާރު ބޮޑުވުން ކަމަށް ބުނެފި އެވެ.
ރާއްޖޭގައި މިހާރު ކުރިއަށްދާ ކާވާ ވިމެންސް ވޮލީބޯލް ޗެލެންޖް ކަޕްގެ ސެމީ ފައިނަލުގައި މިރޭ ރާއްޖޭން ތަޖިކިސްތާނާ ދެކޮޅަށް ނުކުންނާނެ އެވެ. ލީގު ބުރުގައި މި ދެ ޓީމު ބައްދަލުކުރި މެޗުން ރާއްޖެ ވަނީ 3-1 ސެޓުން މޮޅުވެފަ އެވެ.
ސެމީ ފައިނަލު މެޗުގެ ކުރިން، ގައުމީ ޓީމުގެ ސެޓަރު، ޖޫޒާން، "އަދަދު ސްޕޯޓްސް" އަށް ދިން އިންޓަވިއުއެއްގައި ބުނީ، ލީގު ބުރާ ހިލާފަށް މިހާރު މި ނުކުންނަނީ، އާ ޗެލެންޖަކަށް ކަމަށެވެ. އެ ގޮތުން، ކުރިއަށް މި އޮތް ސެމީ ފައިނަލް މެޗަކީ ވެސް ފައިނަލެއްގެ ގޮތުގައި ޖޫޒާން ދެކެ އެވެ.
"ބަލިވެއްޖިއްޔާ މި ހިސާބުން މި ކަޓަނީ، އެހެންވީމަ، ފައިނަލެއްގެ ވިސްނުން މި ވަގުތު ވެސް ސިކުނޑީގައި މި ހުރީ،" ޓީމުގެ އެންމެ މުހިންމު އެއް ކުޅުންތެރިޔާ، ޖޫޒާން ބުންޏެވެ.
މި ފަހަރުގެ ކާވާ ޗެލެންޖް ކަޕަށް ތައްޔާރުވުމުގެ ގޮތުން، މިދިޔަ މަހު ނޭޕާލުގައި ކުރިއަށްދިޔަ ކާވާ ވިމެންސް ވޮލީބޯލް ލީގުގައި ރާއްޖޭން ވާދަކުރި އެެވެ. އެ މުބާރާތުގައި، ނޭޕާލް, އީރާން, ސްރީ ލަންކާ އަދި އިންޑިއާއާ ވާދަކޮށް، ރާއްޖެ އަށް މާ އެދެވޭ ނަތީޖާއެއް ނުނެރެވުނެވެ. އެކަމަކު، އެ މުބާރާތަށް ދިޔައިރު ވެސް ގައުމީ އަންހެން ޓީމުގެ މައިގަނޑު ފޯކަސް ހުރީ، ރަނގަޅު މެޗުތަކެއް ކުޅެ، ޗެލެންޖް ކަޕަށް ތައްޔާރުވުމެވެ.
ރާއްޖޭގައި ކުރިއަށްދިޔަ ފޯ ނޭޝަންސް ކަޕްގެ މެޗެއްގެ ތެރެއިން ޖޫޒާން އުފާފާޅުކުރަނީ.--- ފޮޓޯ: އަދަދު ފައިލް ފޮޓޯ
"އެ މުބާރާތަށް (ނޭޝަންސް ލީގަށް) ދިޔައީ ވެސް މި އަށް ރަނގަޅަށް ތައްޔާރުވާން، ރަނގަޅަށް ކުޅުނު މެޗުތަކެއް އެ މުބާރާތުގައިވެސް އެބަހުރި، ދެން، އެ ކަންކަމަށް ބަލާފައި، މާލެ އައިސް، 20-25 ދުވަހު އެކުގައި ޓީމުން ޕްރެކްޓިގުގައި ކުރި މަސައްކަތް މި މުބާރާތުގައި މި ފެންނަނީ، ފިޓްނަސް އަށް ވަރަށް މަސައްކަތް ކުރިން، ވަރަށް ފިޓްކޮށް ޓީމު މި އޮތީ ހަގީގަތުގައި،" ޖޫޒާން ކިޔައިދިނެވެ.
ކާވާ ޗެލެންޖް ކަޕްގެ ލީގު ބުރުގެ ފަހު މެޗުގައި، ކިރްގިސްތާނާއި ރާއްޖެ ކުޅުނު މެޗުގައި، ކިރްގިސްތާން މޮޅުވި ނަމަވެސް، މި މެޗުގެ ފުރަތަމަ ސެޓުގައި، ރާއްޖޭން ދިގު ރެލީއެއް ކުޅެ، އެ ދެއްކި ހިތްވަރަށް ގިނަ ބަޔެއްގެ ތައުރީފު އަންނަނީ އޮހެމުންނެވެ. އަދި އެ ރެލީގެ ވީޑިއޯ ވައިރަލްވެފައިވާއިރު، ގިނަ ބަޔަކު އަންހެން ވޮލީ ޓީމަށް ކުރަމުން އަންނަ ތައުރީފު ފެނިފައި ޖޫޒާން އަށް ލިބެނީ ވަރަށް ބޮޑު ހިތްހަމަޖެހުމެކެވެ.
"ވަރަށް ބޮޑަށް ވައިރަލްވެފައި އެ ރެލީ މި އޮތީ، ގައުމީ ޓީމަށް މި ކުޅުނު 10 އަހަރު ތެރޭގައި، އެ ހިތްވަރު ހަމަ މި ދައްކަނީ ކޮންމެ ވަގުތެއްގައި ވެސް، ރެލީތައް ވެސް އާދޭ، އެކަމަކު، މިހާ ދިގު ރެލީއެއް އަމިއްލަ ފަސްގަނޑުގައި، އަމިއްލަ ސަޕޯޓަރުން ކުރިމަތީގައި ކުޅެ، އެކަން ގިނަ ބަޔަކަށް ފެނުމުން އެ ދޭ ސަޕޯޓް ފެނިފައި ހަމަ ވަރަށް އުފޭވޭ،" ޖޫޒާން ބުންޏެވެ.
"މީގެ އެންމެ އުފާވަނީ ގައުމީ އަންހެން ޓީމަށް ދިވެހި ސަޕޯޓަރުން ކުރާ އިތުބާރު ބޮޑުވުން، ގައުމީ އަންހެން ވޮލީބޯޅަ ޓީމަށް އެދޭ ސަޕޯޓް އިތުރުވާތީ ވަރަށް އުފާވޭ ހަގީގަތުގައި،" ޖޫޒާން ބުންޏެވެ.
ސަޕޯޓަރުންނަށް ޖޫޒާން މެސެޖެއް ވެސް ދީފައިވެ އެވެ.
ޖޫޒާން ބުނީ، ކުރިއަށް މި އޮތީ މުޅިން ވެސް ފައިނަލް ކަމަށާއި ޓީމަށް ހިތްވަރުދޭން އަންނަ ސަޕޯޓަރުން މެޗު ބަލަން އައުމުގެ ވިސްނުމަށް އެކަނި ފޯކަސް ކުރުމަށް ވުރެން ޓީމަށް ހިތްވަރުދީ ޓީމުގެ ފަހަތުގައި އަބަދުވެސް ހުންނަން އެދޭ ކަމަށެވެ.
ކާވާ ވިމެންސް ޗެލެންޖް ކަޕްގެ ސެމީ ފައިނަލުގައި ތަޖިކިސްތާނާއި ރާއްޖެ ކުޅޭ މެޗު ފަށާނީ މިރޭ 20:30 ގަ އެެވެ.
