ރާއްޖެ އާއި އިންޑިއާއާ ދެމެދު އޮތް އަސްކަރީ ގުޅުން ބަދަހި ކުރުމަށް ބޭއްވި މަޝްވަރާ ބައްދަލުވުން, "އިންޑިއާ-މޯލްޑިވްސް ޑިފެންސް ކޯޕަރޭޝަން ޑައިލޮގް" ނިއުދިއްލީގައި ކާމިޔާބުކަމާއެކު ނިންމާލައިފި އެވެ.
މި މަޝްވަރާތަކުގައި ރާއްޖޭގެ ފަރާތުން އިސްކޮށް ހުންނެވީ ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ހިލްމީ އެވެ. އިންޑިއާގެ ފަރާތުން އިސްކޮށް ހުންނެވީ ޑިފެންސް ސެކްރެޓަރީ، ޝްރީ ގިރިދަރު އަރަމަނޭ އެވެ. މިއީ "އިންޑިއާ-މޯލްޑިވްސް ޑިފެންސް ކޯޕަރޭޝަން ޑައިލޮގް" ގެ ފަސްވަނަ ބައްދަލުވުމެވެ.
ސިފައިންގެއިން މިރޭ ނެރުނު ބަޔާނެއްގައި ބުނީ، ފަސް ވަނަ ފަހަރަށް ބޭއްވުނު އިންޑިއާ-މޯލްޑިވްސް ޑިފެންސް ކޯޕަރޭޝަން ޑައިލޮގުގައި، ދެ ގައުމުގެ ދެމެދު އަސްކަރީ ގުޅުންތަކުގެގިނަ މަޝްވަރާތަކެއް ކޮށްފައިވާ ކަމަށެވެ.
"ދިފާޢީ ގުޅުން އިތުރަށް ބަދަހިކޮށް، ދިފާއީ ދާއިރާއިން އެއްބާރުލުން އިތުރު ކުރުމަށާއި، ތަމްރީނާއި އުނގެނުމުގެ ދާއިރާއާ ބެހޭގޮތުންނާއި، މައުލޫމާތު ހިއްސާކުރުމުގައި އެއްބާރުލުން އިތުރުކުރުމާއި، ސަރަހައްދުގެ ކަނޑުގެ ސަލާމަތާ ރައްކާތެރިކަން އިތުރު ކުރުމާ ގުޅޭގޮތުން ވެސް މި ޑައިލޮގްގައި މަޝްވަރާ ކުރެވިފައިވޭ," އެ ބަޔާނުގައި ބުނެފައިވެ އެވެ.
އެމްއެންޑީއެފުން ބުނި ގޮތުގައި މި ދަތުރުގައި ހިލްމީ ވަނީ އިންޑިއާގެ އަސްކަރިއްޔާގެ އެކި ގޮފިތަކުގެ އިސްވެރިންނާ ވެސް ބައްދަލުކުރައްވާފަ އެވެ. އަދި ޑައިލޮގުގެ ހަވާސާގައި އޭނާ ވަނީ އިންފޮމޭޝަން ފިއުޝަން ސެންޓަރަށް ޒިޔާރަތް ކުރައްވައި އެ ތަނުގައި ކުރެވޭ މުހިންމު މަސައްކަތްތައް ބައްލަވާލައްވާފަ އެވެ.
މަޝްވަރާތަކުގައި ބައިވެރިވި ދިވެހި ވަފުދުގައި މޭޖާ ޖެނެރަލް ހިލްމީގެ އިތުރުން މި އަސްކަރިއްޔާގެ ގިނަ އިސްވެރިން ހިމެނެ އެވެ.
