ލިވަޕޫލް (ސެޕްޓެމްބަރު 6) - ލިވަޕޫލަށް ކުޅެމުން އަންނަ މިސްރުގެ ފޯވާޑް، މުހައްމަދު ސަލާހާ އެކު، އެ ކްލަބުން ހަދާފައިވާ އެއްބަސްވުން އާ ކުރަން މަޝްވަރާތައް ފަށަން ތައްޔާރުވަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ސަލާހު، 32، އާ އެކު ލިވަޕޫލުން ހަަދާފައިވާ އެއްބަސްވުން އަންނަ އަހަރުގެ ޖޫން މަހުގެ ނިޔަލަށް ހަމަވާނެ އެވެ. ދާދި ފަހުން، ލިވަޕޫލުން ޔުނައިޓެޑް ބަލިކުރި މެޗަށް ފަހު، ދިން އިންޓަވިއުގައި ސަލާހު ވަނީ މިއީ އޭނާ ލިވަޕޫލާ އެކު، ފަހު ސީޒަންގޮތުގައި ދެކޭ ކަމަށް ބުނެފަ އެވެ. އެއީ، ލިވަޕޫލުން އޭނާއާ އެކު އާ ކޮންޓްރެކްޓެއްގެ ވާހަކަ އަދި ދައްކާފައިނުވާތީ ކަމަށް ވެސް ސަލާހުގެ ވާހަކައިގައި ވަނީ ފާހަގަކޮށްފަ އެވެ.
އިނގިރޭސި މީޑިއާ ރިޕޯޓްތައް ބުނާގޮތުން، ސަލާހުގެ މި ވާހަކަތަކާ ގުޅިގެން، ލިވަޕޫލުން އަންނަނީ ދެ އަހަރުގެ ކޮންޓްރެކްޓެއް ސަލާހު އަށް ދިނުމަށް މަޝްވަރާ ކުރަމުންނެވެ.
މިދިޔަ އަހަރުތަކުގައި ސައުދީ އަރަބިއްޔާގެ މަހުޖަނު ކްލަބްތަކުން ސަލާހަށް 150 މިލިއަން ޑޮލަރާއި 200 މިލިއަން ޑޮލަރުގެ އޮފާތައް ކުރި ނަމަވެސް، އޭނާ އޭގެއިން ހުށަހެޅުމަކާ މަޝްވަރާކޮށްފައިނުވެ އެވެ. އިނގިރޭސި މީޑިއާ ރިޕޯޓްްތައް ބުނާގޮތުން، ސަލާހުގެ ވިސްނުން ހުރީ ލިވަޕޫލުން ރަނގަޅު އޮފާއެއް ދީފިނަަމަ އެއްބަސްވުން އާ ކުރާށެވެ.
އަދި ލިވަޕޫލްގެ އާ ކޯޗު ނެދަލެންޑްސްގެ އާނާ ސްލޮޓާ އެކު އެ ކްލަބްގެ ކަންކަން ރަނގަޅު މިސްރާބުން ދާތީވެ، ސަލާހު ހުރީ ހިތްހަމަޖެހިފަ އެވެ.
ރޯމާ ދޫކޮށް، 2017 ވަނަ އަހަރު ސަލާހު ލިވަޕޫލަށް ބަދަލުވީ، 38 މިލިއަން ޑޮލަރަށެވެ. ލިވަޕޫލަށް ކުޅެދިން 352 މެޗުން ސަލާހު ވަނީ އެ ޓީމަށް 214 ގޯލު ޖަހައި، 92 ލަނޑު ޖަަހަން ފުރުސަތު ތަނަވަސްކޮށްދީފަ އެވެ.
އިނގިރޭސި މީޑިއާ ރިޕޯޓްތައް ބުނާގޮތުން، ސަލާހުގެ އިތުރުން، ލިވަޕޫލުން ވަރަށް އަވަހަށް، ޓްރެންޓް އަލެކްސަންޑަ އާނޯލްޑް އާއި ވާޖިލް ވެން ޑައިކްގެ ކޮންޓްރެކްޓް އާ ކުރަން ވެސް މަޝްވަރާތައް ފަށާނެ އެވެ. އާނޯލްޑް އާއި ވެން ޑައިކްގެ ކޮންޓްރެކްޓް ވެސް އަންނަ އަހަރުގެ ޖޫންގެ ނިޔަލަށް ހަމަވާނެ އެވެ.
