ކޮލަމްބޯ، ސްރީ ލަންކާ (ސެޕްޓެމްބަރު 5) - ރަނގަޅު ލެވަލެއްގެ ފުޓްބޯޅައެއް ކުޅެން ސްރީ ލަންކާ ފަސް ޖެހެންޖެހޭ ސަބަބެއް ނެތް ކަމަށް އިންޓަރިމް ކޯޗެއްގެ ގޮތުގައި އެ ޓީމާ ހަވާލުވި، ކުވެއިތުގެ ކުރީގެ ކޯޗު، އަބްދުﷲ އަލް-މުތައިރީ ބުނެފި އެވެ.
ލަންކާއާ ހަވާލުވެހުރި، އިނގިރޭސި ކޯޗު އެންޑީ މޮރިސަން އަށް ދިމާވި އަނިޔާގެ މައްސަލައަކާ ހުރެ، އޭނާ ސާޖަރީއެއް ހަދަން ޖެހުމުން އޭނާ ވަނީ ބްރޭކެއް ނަގައިފަ އެވެ. އެ މުއްދަތާ ދިމާވީ، އޭޝިއަން ކަޕް ކޮލިފައިން ޕްލޭއޮފްގައި ލަންކާ އާއި ކެމްބޯޑިއާ މެޗު ތާވަލުކުރި ދުވަސްވަރަށެވެ.
މޮރިސަން އަށް ޓީމުގެ ޒިންމާއާ ހަވާލުވެެވެން ނެތުމުން، ސްރީލަންކާ ފުޓްބޯޅަ ފެޑެރޭޝަނުން ވަގުތީ ކޯޗެއް ގެންނަން ނިންމި އެވެ. އެ ގޮތުން، ގަތަރުގެ އެސްޕަޔާ ގްރޫޕްގެ ޑިރެކްޓަރު، އޮސްޓްރޭލިއާގެ ކުރީގެ ކުޅުންތެރިޔާ، ޓިމް ކޭހިލް އާއި ސްރީ ލަންކާގެ ފުޓްބޯޅަ ރައީސް، ޖޭސްވާރު އުމަރާ މަޝްވަރާކޮށް، ޕްލޭއޮފް ދެ މެޗުގައި، ލަންކާ އަށް ކޯޗުކޮށްދޭން ނޭޕާލުގެ ކުރީގެ ކޯޗު މުތައިރީ އެއްބަސްވީ އެވެ.
މިއަދު ކެމްބޯޑިއާއާ ދެކޮޅަށް ކުޅޭ ހޯމް މެޗުގެ ކުރިން މުތައިރީ ބުނީ، ކިތަންމެ ކުރު މުއްދަތަކަށް ނަމަވެސް ލަންކާ ފުޓްބޯޅަ އަށް ހިދުމަތްކޮށްދޭން ލިބުނު ފުރުސަތަކީ ފަހުރެއް ކަމަށެވެ. އެ ގޮތުން، އޭނާ ވަނީ މި ސަރަހައްދުގެ ޓީމުތަކަަކަށް ކޯޗުކޮށްދީފައި ކަމަށާއި އެ ގައުމުތަކާއި ނޫނީ ޓީމުތަކާ އަޅާކިޔާއިރު، ލަންކާގެ ހާލަތު ރަނގަޅު ކަމަށް މުތައިރީ ފާހަގަކުރި އެވެ.
"އަހަންނަށް ފެނުނު ރަނގަޅު ވަސީލަތް ނެތް، ލީގެއް ވެސް ނެތް، ހަަމައެކަނި ކުރާ ޕްރެކްޓިސްތަކަކާ އެކު މެޗު ކުޅޭ ޓީމުތައް ވެސް. އެކަމަކު، ލަންކާގައި އެބަހުރި ވަސީލަތް. އެބަހުރި ހުނަރު، އަހަންނަށް އެބަފެނޭ މި ކުޅުންތެރިން ކާމިޔާބު ހޯދަން އެ ކުރާ މަސައްކަތް،" ނޭޕާލްގެ ތާރީހުގައި ފުރަތަމަ ފަހަރަށް ސާފް ޗެމްޕިއަންޝިޕްގެ ފައިނަލަށް ގެންގޮސްދިން ކޯޗު، މުތައިރީ ބުންޏެވެ.
"ލަންކާގެ ހުނަރު ލެވަލް މި ހުރީ ހަމަ އެހެން ގައުމުތަކެކޭ އެއް ލެވަލްގައި. އަމިއްލަ އަށް ދަށް ބަޔެކޭ އެހެން ގަބޫލުކޮށްގެން ކުޅެން ނުޖެހޭ. ލަންކާ އަށް ވެސް އެބައޮތް ފުރުސަތު، ރަނގަޅު ފުޓްބޯޅަ ކުޅެން ފަސްޖެހޭކަށެއް ނުޖެހޭ،"
ކިރްގިސްތާންގެ 17 އަހަރުން ދަށުގެ ޓީމަށް ވެސް ކޯޗުކޮށްދިން މުތައިރީ، ނޭޕާލް ކޯޗުކަން، 2022 ވަނަ އަހަރު ދޫކޮށްލުމަށް ފަހު، ދެން، މުތައިރީ ފެނުނީ އަފްގާނިސްތާންގެ ކޯޗުގެ މަގާމުންނެވެ. މިދިޔަ އަހަރު، އެކުވެރިކަމުގެ މެޗެއްގައި އަފްގާނިސްތާނުން ބަންގްލަދޭޝާ ކުޅެމުން، މުތައިރީ އާއި ބަންގްލަދޭޝްގެ ކޯޗިން ސްޓާފުންނާ ދެމެދު މައްސަލަތަކެއް ޖެހުނެވެ. އޭގެ ސަބަބުން، ފަހުން އަފްގާނިސްތާނުން ވަނީ މުތައިރީގެ އެއްބަސްވުން ނިމުމަކަށް ގެނެސްފަ އެވެ.
ލަންކާއާ އެކު، މުތައިރީ ފުރަތަމަ މެޗުގައި، މިއަދު ކޮލަމްބޯގެ ރޭސްކޯސް ސްޓޭޑިއަމްގައި ކެމްބޯޑިއާއާ ބައްދަލުކުރާނެ އެވެ. ދެ ވަނަ މެޗުގައި، މި މަހު 10 ވަނަ ދުވަހު ކެމްބޯޑިއާގައި ކުޅޭނެ އެވެ. ކެމްބޯޑިއާ މެޗުގެ ނަތީޖާތައް ބަލާފައި، މުތައިރީ އަށް ދާއިމީ އެއްބަސްވުމެއް ދިނުމުގެ ފުރުސަތު އެބައޮތެވެ.
