'ލިބޭ' ނަމަ ކުރަންޖެހޭނޭ ކަމަކީ ލިބޭތާ ލިބިގަތުމެއް ނޫންހެއްޔެވެ؟
ނަފުސަށް ވައި ޖައްސާލަން ނުކުމެ އުޅެނިކޮށް ލޮލުގައި އަޅައިގަތީ ރާޅުގަނޑުގެ ތޮށީގައި ތަތްކޮށްފައި ހުރި ބޮޑު އަކުރުން "ލިބޭ" ލިޔެފައި ހުރި ރަތްކުލައިގެ ޕޯސްޓަރުތަކެވެ. ހަމަ އެ ވަގުތު، ރޫސްލާފައި ސައިކަލްގައި ދިޔަ ދެ ޒުވާން ބުނެލި އެވެ؛ "އަނެއްކާ ކޮންއެއްޗެއް ލިބޭ ވާހަކައެއްތަ؟"
"ލިބޭ" ޕޯސްޓަރުތައް މާލެ އާއި ހުޅުމާލެ އަދި ރާއްޖޭގެ ބައެއް ރަށްރަށުގައި ތަތްކުރަން މިފެށީ، ޑޮލަރު ނުލިބުމުގެ މައްސަލަ ބޮޑުވެފައި ވަނިކޮށެވެ. ލިބެން މިއުޅެނީ ޑޮލަރު ނަމަ ކޮންފަދަ ރަނގަޅު ހެއްޔެވެ؟ އެހެންނަމަވެސް މި ޕޯސްޓަރުތަކާއި ޑޮލަރުގެ މައްސަލަތަކާ ގުޅުމެއް އޮތް ކަމެއް އަދި ސާފެއް ނުވެ އެވެ.
ޑޮލަރު ލިބުމުގެ ތާށިކަން ބޮޑުވެގެން ބީއެމްއެލްގެ ކާޑުތަކުގެ ލިމިޓު ކުޑަކުރަން އެ ބޭންކުގެ ބޯޑުން ނިންމި ނިންމުން ތަންފީޒުކުރުމުން، އެކަން ސަރުކާރުން ދެކުނީ ގެންނަން އުޅުނު މާލީ ބަގާވާތެއްގެ ގޮތަށެވެ. އެހެންވެ، "އަތް އަނބުރާލައިގެން" ބީއެމްއެލްގެ ބޯޑުގެ ނިންމުން ބަދަލު ކުރުވި އެވެ. ނަމަވެސް އެ ބުނާ ވަރުގަދަ މާލީ ބަގާވާތުގައި ތުހުމަތު ކުރެވޭ މީހަކު ވެސް ނެތެވެ.
މާލީ ބަގާވާތުގެ ވާހަކަ ރައީސް ޑރ. މުއިއްޒު ދެއްކެވުމަށް ފަހު ސިންގަޕޫރަށް ވަޑައިގަތެވެ. އެ ދަތުރުގައި އެ މަނިކުފާނުގެ އާއިލާ އުޅުއްވަނިކޮށް އެ ބޭފުޅުންގެ ފޮޓޯއެއް ނެގި ކަމަށް ތުހުމަތުކުރާ ދިވެއްސެއްގެ ފޯނު ކޯޓު އަމުރެއްގެ ދަށުން ރޭ ހިފަހައްޓައި ތަހުގީގު ވަނީ ފަށައިފަ އެވެ. ފޯނު ހިފެހެއްޓީ، ތުހުމަތު ކުރެވޭ މީހާ ސިންގަޕޫރުން މާލެ އައިސް ފްލައިޓުން ފޭބުމާއެކު ވަގުތުންނެވެ.
ނަމަވެސް މާލީ ބަގާވާތާ ގުޅިގެން ބީއެމްއެލް ބޯޑު މެންބަރެއްގެ ފޯނެއް، އަދި އެމްޑީޕީގެ ލީޑަރެއްގެ ފޯނެއް އަދިވެސް ނުހިފަހައްޓަ އެވެ. އެފަދަ އަމުރެއް ވެސް ނެތެވެ. ބީއެމްއެލް އާއި އެމްޑީޕީގެ އޮފީސް ބަލައި ފާސްކުރުމުގެ އަމުރެއް ނެރެ، އެފަދަ އޮޕަރޭޝަނެއް ވެސް ނުހިންގަ އެވެ.
ލިބޭ ޕޯސްޓަރުތައް ތަތްކުރުން އިއްތިފާގުވީ މިފަދަ ވަގުތަކަށް ކަމަށް ވިޔަސް، މިއީ ކޮންކަމަކާ ގުޅިގެން، ކޮން ބަޔަކު ކޮށްގެން އުޅޭ ކަމެއް ކަން އަދި ނޭނގެ އެވެ. ތަތްކޮށްފައި ހުރި ޕޯސްޓަރުތަކުގެ އަދަދަށް ބަލާއިރު 'ލިބޭ' ވާހަކަ އެ ދައްކަނީ ސީރިއަސްކޮށް ކަމަށް ބެލެވެ އެވެ. 'ލިބޭ' ކަމަށް ބުނަން އެކޮށްލަނީކީވެސް ކުޑަ ހަރަދެއް ނޫނިއްޔާ އެވެ.
"ލިބޭ" ޕޯސްޓަރުތައް ހަރުކޮށްފައިވާ ފޮޓޯ އާއި ވީޑިއޯ ސޯޝަލް މީޑިއާގައި ވެސް އެބަ ދައުރުކުރެ އެވެ. ދެ ދުވަހެއްގެ ތެރޭގައި މިއީ 'ޓޯކް އޮފް ދަ ޓައުން' އަށް ވެއްޖެ އެވެ. އެކަމަކު އެއްވެސް މީހަކަށް ނޭނގެނީ މި ޕޯސްޓަރުތަކުން ބުނެދޭން އުޅޭ ވާހަކަ އެވެ. ލިބެން އުޅެނީ ކޮންއެއްޗެއްކަމާއި ލިބޭނީ ކިހިނަކުންތޯ ބަލަން އެންމެންވެސް މިތިބީ އިންތިޒާރުގަ އެވެ. ލިބެނީ ކޯއްޗެއް ހެއްޔެވެ؟ ޑޮލަރު ހެއްޔެވެ؟ މި ސުވާލުގެ ޖަވާބު ޕޯސްޓަރުތައް ހަރުކުރި ބަޔަކު ލަސްތަކެއް ނުވެ ދޭނެ ކަމަށް ބެލެވެ އެވެ.
