ޕެރިސް (ސެޕްޓެމްބަރު 1) - ލީޑްސް ޔުނައިޓެޑާއި ކާޑިފް ސިޓީ އަށް ކުރިން ކުޅުނު އައިވަރީ ކޯސްޓުގެ ޑިފެންޑަރު، ސޯލް ބަމްބާ، 39 އަހަރުގައި މަރުވެއްޖެ އެވެ.
ބަމްބާ ވަނީ، 2021 ވަނަ އަހަރު ލޭގެ ކެންސަރު ޖެހިގެން ފަރުވާ ހޯދައިފަ އެެވެ. އަދި އެ ބަލިން ހަތަރު މަސް ދުވަހުގެ ފަރުވާ އަށް ފަހު، އެއްކޮށް ފަސޭހަވި ނަމަވެސް ފަހުން އޭނާ އަށް އެކި ކަހަލަ ސިއްހީ މައްސަލަތައް ކުރިމަތިވި އެވެ.
ފްރާންސްގެ ގަދަބާރު ޕީއެސްޖީ އަށް ވެސް ކުޅެފައިވާ ބަމްބާ ވަނީ އިނގިރޭސި ކްލަބް މިޑްލްސްބަރާ އަށް ވެސް ކުޅެފަ އެވެ. އަދި ކާޑިފުން 2018 ވަަނަ އަހަރު އިނގިރޭސި ޕްރިމިއާ ލީގަށް ޕްރޮމޯޓްވިއިރު، ޓީމު ލީޑުކުރުުމުގައި ތަފާތު ދެއްކި އެއް ކުޅުންތެރިއަކީ ބަމްބާ އެވެ.
ތުރުކީގެ އަދަނަސްޕޯގައި ފުޓްބޯޅައިގެ މަސައްކަތްތަކެއް ކުރަމުން އައި ބަމްބާ މަރުވިކަން އިއުލާނުކުރީ އެ ކްލަބުންނެވެ.
ކްލަބް ކެރިއަރުގައި ބަމްބާ ވަނީ، އިނގިރޭސި ކްލަބް، ލެސްޓާ ސިޓީ އާއި އިޓަލީގެ ޕަލާމޯ އާއި ސްކޮޓްލެންޑްގެ ހިބާނިއަން އަށް ކުޅެފަ އެވެ.
ޕްރޮފެޝަނަލް ލެވަލްގައި 20 ވަރަކަށް އަހަރު މަތީ ފަންތީގައި ކުޅެފައިވާ، ބަމްބާ ވަނީ އައިވަރީ ކޯސްޓް ގައުމީ ޓީމަށް 46 މެޗު ކުޅެފަ އެވެ.
