މެޑްރިޑް (އޮގަސްޓް 28) - ސްޕެނިޝް ލީގުގައި ބާސެލޯނާ އިން ރޭ ކުޅުނު މެޗުގައި ޑަނީ އޮލްމޯ ބަދަލު ކުޅުންތެރިއެއްގެ ގޮތުގައި ކުޅެން އަރައި ޖެހި ގޯލުން އެ ޓީމުން 2-1 އިން ރަޔޯ ވަޔެކާނޯ ބަލިކޮށްފި އެވެ.
މީގެ ވިއްސަކަށް ދުވަސް ކުރިން އާރްބީ ލައިޕްޒިގަށް 65 މިލިއަން ޑޮލަރު ދީފައި ބާސެލޯނާ އިން އޮލްމޯ ގަތް ނަމަވެސް، ރެއާ ހަމައަށް އޭނާ އަށް އެއްވެސް މެޗެއްގައި ނުުކުޅެވެ އެވެ. ބާސެލޯނާގެ މާލީ ހާލަތު ހުރިގޮތުން، އޮލްމޯ ރަޖިސްޓްރީ ކުރެވުނީ ވެސް ރޭގެ މެޗު ފަށަން ކުޑަތަންވެފައި ވަނިކޮށެވެ. އޮލްމޯ، ފުރަތަމަ ފަހަރަށް ބާސެލޯނާ އަށް މެޗެއް ކުޅުނުއިރު، ނުކުތީ ވެސް ބަދަލު ކުޅުންތެރިއެއްގެ ގޮތުގައި ދެ ވަނަ ހާފުގަ އެވެ.
ރަޔޯ ވަޔެކާނޯ ދަނޑުގައި ރޭ ކުޅުނު މެޗުގައި އެ ޓީމުން ވަނީ ނުވަ ވަނަ މިނިޓްގައި ލީޑުނަގައިފަ އެވެ. މި ލަނޑު ޖެހީ އުނާއި ލޮޕޭޒް އެވެ. މި ގޯލާ އެކު، ރަޔޯ ވަޔެކާނޯ އިން ހާފު ނިންމާލީ ލީޑުގައި އޮވެ އެވެ.
ބާސެލޯނާ އިން ނަތީޖާ ހަމަހަމަކުރަން ކުރި މަސައްކަތް ކާމިޔާބުކުރީ މެޗުގެ 60 ވަނަ މިނިޓްގަ އެވެ. މި ލަނޑު ޖެހީ، ރަފީނިއާ ތަނަވަސްކޮށްދިން ފުރުސަތަކުން ޕެޑްރީ އެވެ. މި ގޯލުގައި ރަފީނިއާ އާއި ޕެޑްރީގެ ކޮމްބިނޭޝަން ރަނގަޅަށް ފެނިގެންދިޔަ އެވެ.
މެޗުގެ ތިން ޕޮއިންޓް، ބާސެލޯނާ އަށް ކަށަވަރުކޮށްދިން ގޯލު އޮލްމޯ ޖެހީ، 82 ވަނަ މިނިޓްގައި ރަޔޯ ވަޔެކާނޯގެ އޭރިއާތެރެއިންނެވެ. ބާސެލޯނާގައި 2007-2014 އަށް ހޭދަކުރި އޮލްމޯ އަކީ އެ ކްލަބްގެ ޔޫތު ޓީމުތަކުގައި ވެސް ފާހަގަކޮށްލެވޭ މޮޅު ކުުޅުމެއް ދެއްކި ކުޅުންތެރިއެކެވެ. އެކަމަކު، ބާސެލޯނާ ދޫކޮށް އޮލްމޯ ވަނީ، 2014 ވަނަ އަހަރު ކްރޮއޭޝިއާގެ ޑިނަމޯ ޒަގްރެބަށް ބަދަލުވެފަ އެވެ. އެހެންކަމުން، މި ގޯލަކީ އޮލްމޯގެ ކުރީގެ ކްލަބަށް އެނބުރި އައިސް 10 އަހަރު ފަހުން ސީނިއާ ޓީމުގައި ޖެހި ފުރަތަމަ ގޯލެވެ.
ބާސެލޯނާ އިން މި ވަނީ ޖަރުމަނުގެ ކޯޗު ހަންސީ ފްލިކްގެ އިރުޝާދުގެ ދަށުން ލީގު ސީޒަންގެ ފުރަތަމަ ތިން މެޗުން ވެސް މޮޅުވެފަ އެވެ.
