ލިވަޕޫލް (އޮގަސްޓް 27) - ޔުވެންޓަސް އަށް ކުޅޭ އިޓަލީ ގައުމީ ޓީމުގެ ފޯވާޑް، ފެޑެރީކޯ ކިއޭސާ ގަންނަން އިނގިރޭސި ގަދަބާރު ލިވަޕޫލުން ޝައުގުވެރިކަން ފާޅުކޮށްފައިވާ ކަމަށް މީޑިއާ ރިޕޯޓްތައް ބުނެފި އެވެ.
ޔުވެންޓަސްގެ ކޯޗުކަމާ ތިއާގޯ މޮޓާ ހަވާލުވުމަށް ފަހު އެ ކްލަބުން ވިއްކާލާ ކުޅުންތެރިންގެ ލިސްޓުގައި ކިއޭސާ ހިމެނި އެވެ. އެކަމަކު، މިހާތަނަށް އެއްވެސް ޓީމަކަށް ކިއޭސާ ހިތްހަމަޖެހޭ ޕްރޮޕޯސަލެއް ނުދެވޭތީ އޭނާ އަދިވެސް ހުރީ ޔުވެންޓަސްގަ އެވެ.
ކިއޭސާ، 26، އަށް ސައުދީ ޕްރޯ ލީގުގެ ކްލަބްތަކުން އޮފާ ލިބުނު ނަމަވެސް އޭނާގެ ވިސްނުމަކީ، ކެރިއަރުގެ މުހިންމު އަަހަރުތަކެއް ކުރިމަތީގައި އޮތުމުން، މި ވަގުުތު ޔޫރަޕްގައި ކުޅެން މަޑުކުރުމަށެވެ. ސްޕެއިނުގެ ބާސެލޯނާ އިން ވެސް ކިއޭސާ ގެންނަން މަޝްވަރާތަކެއް ކުރި ނަމަވެސް، ރަސްމީކޮށް އެއްވެސް ބިޑެއް ހުށަނާޅަ އެވެ.
އަންނަ ހުކުރު ދުވަހުގެ ނިޔަލަށް ޓްރާންސްފާ މާކެޓް އޮތްއިރު، ލިވަޕޫލުން މި ވަނީ ކިއޭސާ ގަންނަން ވާހަކަތައް ފަށައިފަ އެވެ. ޔުވެންޓްސް އިން އެންމެ ފުރަަތަމަ ކިއޭސާ ވިއްކަން ކީ އަގު 30 މިލިއަން ޑޮލަރުގައި އުޅުނު ނަމަވެސް، މިހާރު އެ އަގު ވަނީ 15-20 މިލިއަން ޑޮލަރަށް ކުޑަކޮށްފަ އެެވެ.
ކިއޭސާ އަށް ކުރިން އޮތް ޑިމާންޑް ކުޑަވެފައި ވަނީ އޭނާ އަށް ދިމާވި އަނިޔާގެ މައްސަލަތަކާ ހުރެ ފޯމު ދަށްވެފައިވާތީ އެވެ.
މި ފަހަރުގެ ސީޒަން ފެށިއިރު، ލިވަޕޫލުން އެއްވެސް ކުޅުންތެރިއަކު ސޮއިނުކުރެ އެވެ. އެކަމަކު، ޓްރާންސްފާގެ ފަހު ދުވަސްތަކުގައި ލިވަޕޫލްގެ ހަރަކާތްތައް އެކްޓިވްކޮށް ފެންނައިރު، އެ ކްލަބުން ވަނީ ވެލެންސިއާ އަށް ކުޅޭ ޖޯޖިއާގެ ކީޕަރު، ޖިއޯޖީ މަމަޑާޝްވިލީގެ ސޮއިހޯދަން އެއްބަސްވުމަކަށް އަތުވެފަ އެވެ. މަމަޑާޝްވިލީ، ލިވަޕޫލަށް ސޮއިކުރިޔަސް، މި ސީޒަނުގައި މަޑުކުރާނީ ވެލެންސިއާގަ އެވެ.
ލިވަޕޫލުން އަންނަނީ ކްރިސްޓަލް ޕެލަސްގެ އިނގިރޭސި ޑިފެންޑަރު، މާކް ގޭހީ އާއި ބަޔާ ލެވަކޫސަންގެ ޕިއޭރޯ ހިންކަޕީ އަށް ވެސް ފާރަލަމުންނެވެ.
