ބ. އޭދަފުށީގައި މިހާރު ކުރިއަށްދާ ކްލަބް ކޮމްބިނޭޝަން (ސީސީ) އިންޓަ ރިސޯޓް ކްރިކެޓް މުބާރާތުގައި، މިދިޔަ އަހަރުގެ ޗެމްޕިއަން، ސޮނޭވާފުށިން މި ފަހަރުގެ މުބާރާތުގައި ފުރަތަމަ މޮޅު ހޯދިއިރު، އަމިއްލަ މޯލްޑިވްސް އިން ދެ ވަނަ މެޗު ވެސް ކާމިޔާބުކޮށް ވަރުގަދަ ފެށުން ދަމަހައްޓައިފި އެވެ.
މިއީ، މި މުބާރާތް ކުރިއަށްދާ ދެ ވަނަ ފަހަރެެވެ. އަށް ރިސޯޓުން މި ފަހަރުގެ މުބާރާތުގައި ވާދަކުރާއިރު، މެޗުތައް ކުޅެނީ އަށް އޯވަރަށެވެ.
ސޮނޭވާފުށިން އަވަނި+ފަރެސް ބަލިކުރީ ހަ ވިކެޓުންނެވެ. އަވަނި އިން ވަނީ ކުޅެން އަރައި އަށް އޯވަރުގެ ތެރޭގައި، އަށް ވިކެޓަށް 91 ލަނޑު ހަދައިފަ އެވެ. ސޮނޭވާފުށިން 7.2 އޯވަރުގެ ތެރޭގައި ހަ ވިކެޓަށް ވަނީ 92 ލަނޑު ހަދައި މެޗުން މޮޅުވެފަ އެވެ. މެޗުގެ މޮޅު ކުޅުންތެރިއަކީ، ސޮނޭވާފުށީ ޓީމުގެ ކިތާބުﷲ އެވެ.
ފުރަތަމަ މެޗުގައި މިލައިދޫ މޯލްޑިވްސް އަތުން މޮޅުވި އަމިއްލަ މޯލްޑިވްސް ޓީމުން އިއްޔެ ވަނީ، އަނަންތަރާ ބަލިކޮށްފަ އެވެ. އަނަންތަރާ އަތުން އަމިއްލަ މޮޅުވީ، ހަ ވިކެޓުންނެވެ.
މެޗުގައި އަށް އޯވަރުގެ ތެރޭގައި، އަނަންތަރާ އިން ހަތް ވިކެޓަށް 114 ލަނޑު ހެދި އެވެ. އަމިއްލަ އިން ވަނީ އަށް އޯވަރުގެ ތެރޭގައި، ހަތަރު ވިކެޓަށް 118 ލަނޑު ހަދައިފަ އެވެ.
މުބާރާތުގައި މިއަދު ވެސް ދެ މެޗެއް ކުޅޭނެ އެވެ. އެ ގޮތުން، 15:00 ގައި، ފިނޮޅު އާއި އަމިއްލަ ބައްދަލުުކުރާ މެޗު އޮތްއިރު، 16:30 ގައި، ރޯޔަލް ބައްދަލުުކުރާނީ ސޮނޭވާފުށްޓާ އެވެ.
