ރޯމް (އޮގަސްޓް 26) - ސައުދީ އަރަބިއްޔާގެ ޕްރޮފެޝަނަލް ލީގު (ޕްރޯ ލީގު)ގެ އަލް ގަދްސިއާ އިން ހުށަހެޅި ބޮޑު މުސާރަ ލިބޭ ކޮންޓްރެކްޓަށް ފުރަގަދަސްދިނުމަށް ފަހު ރޯމާގައި މަޑުކުރަން ނިންމީ އަމިއްލަ ކެރިއަރާއި ހިތްހަމަޖެހުމަށް ވިސްނުމަށް ފަހު ކަމަށް ޕައޮލޯ ޑިބާލާ ބުނެފި އެވެ.
ގަދްސިއާ އިން ޑިބާލާ އަށް ހުށަހެޅި ކޮންޓްރެކްޓުގައިވާ ގޮތުން، ތިން އަހަރު ތެރޭ އޭނާ އަށް 75-80 މިލިއަން ޑޮލަރު ލިބޭނެ އެވެ. އެކަމަކު، ޑިބާލާ، އެންމެ ފަހު ވަގުތު ނިންމީ ރޯމާގައި މަޑުކުރާށެވެ.
މި ސީޒަނުގައި ރޯމާގެ 15 މެޗުގައި ޑިބާލާ ކުޅެފިނަމަ އޭނާގެ ކޮންޓްރެކްޓް އޮޓޯމެޓިކުން އިތުރު އަހަރަކަށް އާ ވާނެ އެވެ.
ޔުވެންޓަސް ދޫކޮށް، 2022 ވަނަ އަހަރު، ޑިބާލާ، ރޯމާ އަށް ބަދަލުވިއިރު، މުސާރަ އަށް ބޯނަހާ އެކު ވެސް ސީޒަނެއްގައި ލިބެނީ، 10 މިލިއަން ޑޮލަރެވެ. ޑިބާލާ، އަށް ބޮޑު މުސާރަ ލިބޭ ކޮންޓްރެކްޓެއް ސައުދީ ލީގުން އައުމުން ބަދަލުވި ނުވި ސަަބަބު އޭނާ ވަނީ އޮޅުންފިލުވައިދީފަ އެވެ.
"އެންމެން ވެސް އަހާނެ ފައިސާގެ ވާހަކަ. އަހަންނަށް ކަންކަން ނިންމާއިރު ވިސްނަން ޖެހޭ ކަންކަން ގިނަ. އަހަރެންގެ އާއިލާ، އަހަރެންގެ އަންހެނުން، އުޅޭ ސަރަހައްދު، ދެން އަލުން ގައުމީ ޓީމަށް އަރަން ވެސް ބޭނުން،" ޑިބާލާ ބުންޏެވެ.
"އަހަރެންގެ އުމުރުން 30 އަހަރު، އަހަންނަށް ފެނޭ ވަރަށް ގިނައިން އިންޖަރީއާ ގުޅުވާ ވާހަކަތައް، އަހަރެން މަސައްކަތް ކުރަނީ ފިޓްކޮށް ހުންނަން،"
ޑިބާލާ ބުނީ، އޭނާ ގޮތެއް ނިންމަނީ ހަމައެކަނި ފައިސާ އަށް ބަލައިފައި ނޫން ކަަމަށެވެ. އަދި ސައުދީގެ ކްލަބުން އޭނާގެ ނިންމުމާ މެދު ދެކޭގޮތެއް އޮޅުންފިލުވުމުގެ ޝައުގެއް ނެތް ކަމަށް ވެސް ޑިބާލާ ވަނީ ބުނެފަ އެވެ.
