އިޒްރޭލުން ފަލަސްތީނުގެ ގާޒާގައި ހިންގާ ގަތުލްއާންމު ހުއްޓާލުމަށް އަނެއްކާ ވެސް އެއްބަސްވުމަކަށް ނާދެވުނެނެވެ.
މިސްރުގެ ކައިރޯގައި އިޒްރޭލާއި ހަމާސްއާ ދެމެދު ކުރިއަށްދިޔަ ސުލްހައިގެ ވާހަކަތަކުގައި ގަތުލްއާންމު ހުއްޓާލުމަށް ދެ ފަރާތަށް ވެސް އެއްބަސްވުމަކަށް އާދެވިފައެއް ނުވެ އެވެ.
"ހަނގުރާމަ ހުއްޓާލުމާ ގުޅޭ އެއްވެސް ކަހަލަ އެއްބަސްވުމަކަށް އިޒްރޭލަށް އަދި ގާޒާއަށް ވެސް އާދެވިފައެއް ނުވޭ. އެއާއެކު މަޝްވަރާތައް މިހާރު ވަނީ ނިމިފައި،" ރޮއިޓާސްއާ ހަވާލާދީ އަލްޖަޒީރާއިން ބުންޏެވެ.
ހަނގުރާމަ ހުއްޓާލުމާ ގުޅޭގޮތުން އިޒްރޭލުން އަދި ހަމާސްއިން ވެސް ހުށަހެޅުންތަކެއް ހުށަހެޅި ނަމަވެސް، ދެ ފަރާތުން ވެސް އެ ހުށަހެޅުންތަކަށް އެއްބަސްވެފައި ނުވެ އެވެ.
ހަނގުރާމަ ހުއްޓާލުމަށް އެކި ކަހަލަ އެއްބަސްވުންތައް އިޒްރޭލާއި ހަމާސްއިން ވެސް ހުށަހެޅި އެވެ. މިހާތަނަށް އެއްވެސް ކަހަލަ އެއްބަސްވުމަކަށް އާދެވިފައި ނުވެ އެވެ.
ހަނގުރާމަ ހުއްޓާލުމަށް އެމެރިކާއާއި މެދުއިރުމަތީގެ ގައުމުތައް މެދުވެރިއެއްގެ ރޯލު އަދާ ކުރި ނަމަވެސް އެއްވެސް ކަހަލަ އެއްބަސްވުމެއް ނެހެދޭތީ އަންނަނީ ފާޑު ކިޔުން އަމާޒުވަމުންނެވެ.
އިޒްރޭލުން ގާޒާގައި ހިންގަމުންދާ ގަތުލްއާންމުގައި މިހާތަނަށް 40،334 މީހުން ވަނީ މަރުވެފަ އެވެ. އޭގެ ތެރޭގައި ގިނާއީ ކަމާ ނުބެހޭ ކުޑަކުދިންނާއި އަންހެނުންނެވެ.
