ބ. ދަރަވަންދޫ ފެން ޕްލާންޓުން ފެން އުފައްދަމުން ދަނީ މުއްދަތު ހަމަވެފައިވާ ކްލޮރިން އަޅައިގެން ކަމަށް ހާމަވެއްޖެ އެވެ.
ދަރަވަންދޫ ކައުންސިލްގެ ރައީސް އަލީ ސަމީހް "އަދަދު" ނޫހަށް ވިދާޅުވީ މުއްދަތު ހަމަވެފައިވާ ކްލޮރިން އެޅި ކަމަށް ކައުންސިލަށް ލިބުނު ރިޕޯޓަކާއެކު، ކައުންސިލުން ގޮސް ބެލި ބެލުމުން އެކަން ކަށަވަރު ކުރެވިފައިވާ ކަމަށެވެ.
މި މައްސަލައިގައި ދަރަވަންދޫ ފެނަކަ ބްރާންޗުގެ މުވައްޒަފުންނާ ވާހަކަ ދެއްކި ކަމަށާއި އެ މުވައްޒަފުން ބުނީ، މުއްދަތު ހަމަވެފައިވާ ކްލޮރިން ބޭނުން ކުރީ ހެޑް އޮފީހުން އަންގައިގެން ކަމަށެވެ.
"ކައުންސިލާއި ސިއްހީ މަރުކަޒުގެ ބައެއް މީހުން އެތަނަށް ގޮސް ބެލިއިރު މުއްދަތު ހަމަވެފައި ހުރި ކްލޮރިން ހުރި ހަންތައް ފެނުނު. ފެން ދޫކުރުން ހުއްޓާލަން ފެނަކައަށް އެންގުމުން ވެސް އެކަން އެގޮތަށް ކޮށްފައެއް ނުވޭ،" އޭނާ ވިދާޅުވި އެވެ.
އެ ފެން ބޭނުން ނުކުރަން ރައްޔިތުންނަށް އަންގާފައިވާ ކަމަށާއި، އަދި ފެނަކައިން ދޫކުރަމުން ދަނީ ރައްކާތެރި ފެނެެއް ނޫން ކަމަށް އެ ކުންފުންޏަށް އަންގާފައިވާ ކަމަށް ސަމީހު ވިދާޅުވި އެވެ.
މުއްދަތު ހަމަވެފައި ހުރި ކްލޮރިން ބޭނުންކުރި މައްސަލަ ސަރުކާރުގެ ކަމާގުޅޭ މުއައްސަސާތަކަށް ހުށަހަޅާފައިވާ ކަމަށް ވެސް ސަމީހު ވިދާޅުވި އެވެ.
