ރާއްޖޭގެ ގައުމީ ބޭންކު، ބޭންކު އޮފް މޯލްޑިވްސްއަށް ޑޮލަރު ލިބުން ދަތިވެ، ރުފިޔާ ކާޑުތަކުން ކުރެވޭ ޑޮލަރު މުއާމަލާތްތައް އެއްކޮށް ކަނޑާލައި ކުރިން ދޫކޮށްފައިވާ ކްރެޑިޓް ކާޑުތަކުގެ ލިމިޓު 100 ޑޮލަރަށް ކުޑަ ކުރުމުން އިދިކޮޅު މައި ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން ފައްޔާޒު އިސްމާއީލް ކަންބޮޑުވުން ފާޅުކުރައްވައިފި އެވެ.
މިއަދުން ފެށިގެން ރާއްޖޭގެ އެންމެ ގިނަ މީހުން ބޭނުންކުރާ ބޭންކް ކަމަށްވާ ބީއެމްއެލްގެ ރުފިޔާ ކާޑުތަކުން ޑޮލަރުގެ މުއާމަލާތް ނުކުރެވޭނެ ކަމަށް ވަނީ ނިންމާފަ އެވެ. އެ ނިންމުން އިއުލާނު ކުރުމާއެކު ގިނަ ބަޔަކު އަންނަނީ ސަރުކާރަށް ފާޑުކިޔައި ނުރުހުން ފާޅުކުރަމުންނެވެ.
""އުންމީދު ކުރަން، މިކަމުގެ ސަބަބުން ޕްރައިވެޓް ސެކްޓަރުގެ އިގުތިސޯދަށް ކުރާނެ ނޭދެވޭ އަސަރު ސަރުކާރަށް އެނގިވަޑައިގަންނަވާނެ ކަމަށް," ފައްޔާޒު ވިދާޅުވި އެވެ.
މިފަދަ ކުއްލި ބަދަލެއްގެ ސަބަބުން ދަރިވަރުންނާއި ވިޔަފާރިތަކަށް ވަރަށް ނޭދެވޭ އަސަރު ކުރާނެ ކަމަށް ފައްޔާޒު ވިދާޅުވި އެވެ. އެގޮތުން, ބޭރުގެ ވެބްސައިޓުތަކާއި ސޮފްޓްވެއާތަކަށް ފައިސާ ދެއްކުމަށް ބުރޫ އަރާނެ ކަމަށް ވެސް ފައްޔާޒު ވިދާޅުވި އެވެ.
"މުއިއްޒު ވައުދުވެވަޑައިގަތީ އިގުތިސޯދާ މެދު އެއްވެސް ވަރަކަށް ކަންބޮޑުވެވަޑައިނުގަންނަވާ ކަމަށާއި، އަދި ފަހުން ވަރަށް ހަރުކަށިކަމާއެކު ވިދާޅުވީ ޑޮލަރުގެ ކަޅު ބާޒާރުގެ ރޭޓް އިތުރު ނުވާނެ ކަމަށް. ދައުލަތުގެ އެންމެ އިސްވެރިޔާގެ މިފަދަ މައުލޫމާތު ނެތް ނިންމުންތަކުގެ އަސަރު ހުރިހާ ދާއިރާއަކަށް ކުރާނެ," ފައްޔާޒު ވިދާޅުވި އެވެ.
ގައުމުގެ މާލީ ހާލަތު ދަށަށް ދިޔުމާއި އެ ނޫން ވެސް އިތުރު ބައެއް ސަބަބުތަކާ ހުރެ، ޑޮލަރުގެ އަގު އުފެލުމުން ގޮސް ކަޅު ބާޒާރުގައި ޑޮލަރެއްގެ އަގު މިހާރު ހުރީ 18.50 ގަ އެވެ.
ބީއެމްއެލްގެ މި ނިންމުމާއެކު ޑޮލަރުގެ ރޭޓު ކަޅު ބާޒާރުގައި ބޮޑުވާނެ ކަމަށް ބެލެވެ އެވެ.
