ބ. އޭދަފުށީގެ ކްލަބް ކޮމްބިނޭޝަން (ސީސީ) އިން އިންތިޒާމްކޮށްގެން ބާއްވާ އިންޓަ ރިސޯޓް ކްރިކެޓް މުބާރާތުގައި ފިނޮޅު މޯލްޑިވްސް އާއި ރޯޔަލް އައިލެންޑް ކުޅުނު ފުރަތަމަ މެޗުތަކުން މޮޅުވެއްޖެ އެވެ.
ހަ ރިސޯޓް ވާދަކުރާ މުބާރާތުގައި މިއަދު ވެސް ދެ މެޗެއް ކުޅެވުނެވެ. އެ ގޮތުން އަށް އޯވަރަށް ކުޅޭ މި މުބާރާތުގައި، މިއަދުގެ މެޗުތަކުގައި ވެސް ފޯރިގަދަ ކުޅުމެއް ފެނިގެންދިޔަ އެެވެ.
މިއަދު ފުރަތަމަ ކުޅުނީ، ފިނޮޅު ކުޅޭނީ އަނަންތަރާއާ އެވެ. އަނަންތަރާ އިން ވަނީ އަށް އޯވަރުގެ ތެރޭ، ހަ ވިކެޓަށް 96 ލަނޑު ހަދައިފަ އެވެ. ފިނޮޅު މޮޅުވީ އަށް އޯވަރުގެ ތެރޭގައި، ހަތަރު ވިކެޓަށް 131 ލަނޑު ހަދައިގެން، 35 ލަނޑުންނެވެ. މިއީ، މި ފަހަރުގެ މުބާރާތުގެ އިނިންސެއްގައި މިހާތަނަށް އެންމެ ރަނގަޅު ސްކޯ އެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ، ފިނޮޅުގެ ޖަޔަސަންތާ އެވެ.
ދެ ވަނަ މެޗަކީ ގްރޫޕް ބީގެ މެޗެކެވެ. ބައްދަލުކުރީ، ރޯޔަލް އައިލެންޑް އާއި އަވަނި+ފަރެސް އެވެ. ރޯޔަލް އިން 27 ލަނޑުން މި މެޗު ކާމިޔާބުކުރިއިރު، އަށް އޯވަރުގެ ތެރޭގައި، ފަސް ވިކެޓަށް 114 ލަނޑު ހެދި އެވެ. އަވަނި އަށް އަށް އޯވަރުގެ ތެރޭގައި ހަތަރު ވިކެޓަށް ހެދުނީ، 87 ލަނޑެވެ. މި މެޗުގެ އެންމެ މޮޅު ކުޅުންތެރިއަކީ، ދެ އޯވަރުން ތިން ވިކެޓް ނެގި، އަވަނީ ޓީމުގެ ތައުފީގު އެވެ.
މުބާރާތުގައި މާދަމާ ފުރަތަމަ 15:00 ގައި ދުސިތު ކުޅޭނީ ރޯޔަލްއާ އެވެ. ދުސިތު ވަނީ ފުރަތަމަ މެޗުގައި އެންމެ ފަހުގެ ޗެމްޕިއަން، ސޮނޭވާފުށި ބަލިކޮށްފަ އެވެ. މާދަމާ، 16:30 ގައި ފަށާ މެޗުގައި، މިލައިދޫ ކުޅޭނީ ފިނޮޅުއާ އެވެ. މިލައިދޫ ވަނީ ފުރަތަމަ މެޗުގައި އަމިއްލަ މޯލްޑިވްސް އަތުން ބަލިވެފަ އެވެ.
މި މުބާރާތަކީ ނިސްބަތުން ރިސޯޓް ގިނަ އަތޮޅެއް ކަމަށްވާ ބ. އަތޮޅުގައި ރިސޯޓްތަކުގެ މެދުގައި ބޭއްވޭ ހަމައެކަނި ކްރިކެޓް މުބާރާތެވެ.
