މިއުނިކް (އޮގަސްޓް 24) - އިތުރު މިނިޓްގެ ވެސް ފަހު ވަގުތު ލަނޑު ޖަހައި، ބޮރޫޝިއާ މުންޗެންގްލަޑްބެކް އަތުން 3-2 އިން މޮޅުވެ، ޖަރުމަނު ލީގުގެ އެންމެ ފަހުގެ ޗެމްޕިއަން، ބަޔާ ލެވަކޫސަނުން މި ފަަހަރުގެ ލީގުގައި ކުޅުނު ފުރަތަމަ މެޗުން މޮޅުވެއްޖެ އެވެ.
ރަށުންބޭރުގައި ކުޅުނު ނަމަވެސް ލެވަކޫސަނުން ރޭގެ މެޗު ފެށީ ވަރުގަދަކޮށެވެ. އެ ގޮތުން، މެޗުގެ 12 ވަނަ މިނިޓްގައި ލެވަކޫސަނުގެ މެދުތެރެއަށް ކުޅޭ ގްރޭނިޓް ޝަކާ އޭރިއާބޭރުން ޖެހި ބާރު ޝޮޓަކުން ކާމިޔާބުކުރި ގޯލާ އެކު ލީޑުނެގި އެވެ. މުންޗެންގްލަޑްބެކަކީ ކުރިން ޝަކާ ކުޅުނު ޓީމު ކަމަށްވުމުން މި ލަނޑަށް ފަހު، އޭނާ އުފާފާޅުނުކުރެ އެވެ.
ފުރަތަމަ ހާފު ނިމުމުގެ ކުރިން ލެވަކޫސަނުން ލީޑުފުޅާކުރި އެވެ. މި ލަނޑު ޖެހީ ފްލޯރިއަން ވާޓްޒް އެވެ. މެޗުގެ 38 ވަނަ މިނިޓްގައި، ލެވަކޫސަންގެ އަލެހަންދްރޯ ގްރިމާލްޑޯގެ ޝޮޓް ބްލޮކްވިއިރު، އަލުން ފޮނުވާލަން ފުރުސަތު ލިބުނު، ވާޓްޒް ވަނީ ގޯލަށް ބޯޅަ ފޮނުވާލައިފަ އެވެ.
ލީޑުގައި އޮވެގެން ފުރަތަމަ ހާފު ނިންމާލި ލެވަކޫސަނަށް ދެ ވަނަ ހާފު ފަށައިގެން ދިޔައީ އެންމެ ރަނގަޅަކަށް ނޫނެވެ. އެ ގޮތުން، މުންޗެންގްލަޑްބެކް އިން ވަނީ ދެ ގޯލު ޖަހައި އެއްވަރުކޮށްފަ އެވެ. މުންޗެންގްލަޑްބެކްގެ ފުރަތަމަ ލަނޑު ޖެހީ، 59 ވަނަ މިނިޓްގައި ނިކޯ އެލްވޭޑީ ބޮލުންނެވެ. އަދި މުންޗެންގްލަޑްބެކް އަށް އެއްވަރުކޮށްދިނީ 85 ވަނަ މިނިޓްގައި، ޓިމް ކްލެއިންސްޑިއެންޓް އެވެ.
އެކަމަކު، އިތުރު ވަގުތުގެ 11 ވަނަ މިނިޓްގައި ވާޓްޒް ވަނީ ޕެނަލްޓީއެއްގެ ރީބައުންސް ގޯލަށް ފޮނުވާލައި، ލެވަކޫސަން މޮޅުކޮށްދީފަ އެވެ. ލެވަކޫސަންގެ އަމީން އަދީލަށް ކުރި ފައުލަަކަށް ލިބުނު ޕެނަލްޓީން ވާޓްޒް ފޮނުވާލި ބޯޅަ މުންޗެންގްލަޑްބެކްގެ ކީޕަރު، ޖޮނަސް އޮމްލިން އަތުގައި ޖެހިފައި ނުކުތް ވަގުތު ވާޓްޒް ވަނީ ދެ ވަނަ ފުރުސަތުގައި ގޯލަށް ބޯޅަ ފޮނުވާލައިފަ އެވެ.
