ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމް މަގާމުން މިރޭ އިސްތިއުފާ ދެއްވުމުން ވެސް، ރައްޔިތުންގެ މަޖިލިސް ރިސެސްއަށް ދިޔުމުގެ ކުރިން ބޭއްވި ފަހު ޖަލްސާގައި އޭނާ ވަކިކޮށްފި އެވެ.
ރައްޔިތުންގެ މަޖިލީހުގައި މިރޭ ކުރިއަށްދިޔަ ޖަލްސާގައި ޥޯޓުގައި ބައިވެރިވެވަޑައިގެންނެވި 75 މެންބަރުންގެ ތެރެއިން 65 މެންބަރުންގެ ވޯޓުންނެވެ.
ޝަމީމް ވަކިކުރުމާ ދެކޮޅަށް ނުވަ މެންބަރަކު ވޯޓު ދެއްވިއިރު، އެއް މެންބަރަކު ވަކިކޮޅަކަށް ވޯޓު ނުދެއްވަ އެވެ.
ޝަމީމް މަގާމުން ވަކި ކުރުމަށް ހުޅުދޫ ދާއިރާގެ ޕީއެންސީ މެންބަރު، މުހައްމަދު ޝާހިދު ހުށަހެޅި މައްސަލަ މަޖިލީހުގެ ޖުޑީޝަރީ ކޮމިޓީން ފާސްކޮށް ތަޅުމަށް ފޮނުވީ މިއަދު އެވެ.
އެ މައްސަލައަށް މިރޭ ބަހުސް ކުރައްވަމުން ސަރުކާރަށް ތާއީދު ކުރައްވާ ގިނަ މެންބަރުން ވަނީ ޝަމީމްއަށް ވަރަށް ބޮޑަށް ފާޑު ވިދާޅުވެފަ އެވެ.
ޖަލްސާގައި އެމްޑީޕީގެ މެންބަރުން ތަކުރާރުކޮށް ޝަމީމް އިސްތިއުފާ ދެއްވިކަމަށް ވިދާޅުވި ނަމަވެސް، މަޖިލީހުގެ ރިޔާސަތު ބެލެހެއްޓެވި ނައިބުރައީސް ދިއްގަރު ދާއިރާގެ މެންބަރު އަހުމަދު ނާޒިމް ވޯޓު ނެންގެވުމާ ހަމައަށް ވެސް ތަކުރާރުކޮށް ވިދާޅުވީ އިސްތިއުފާގެ ސިޓީ ލިބުނުކަން ރައީސް އޮފީހުން މަޖިލީހަށް ކަށަވަރު ކޮށްދީފައި ނުވާ ކަމަށެވެ.
"އެ މައްސަލަ ދިރާސާ ކުރައްވައި، އެ ތުހުމަތުތަކާ ގުޅިގެން އަޅުގަނޑަށް ޖަވާބުދާރީވާން މިއަދު، 22 އޮގަސްޓް 2024 ދުވަހު ތާވަލު ކުރެއްވި، އެ ކޮމިޓީގެ 19 ވަނަ ބައްދަލުވުން އާންމުކޮށް ހުޅުވާލައިގެން ބާއްވައި ދެއްވުމަށް އަޅުގަނޑު ތަކުރާރުކޮށް އެދިފައިވަނިކޮށް، އެކަމަށް ނުބައްލަވައި، މަޖިލީހުގެ ގަވާއިދުގައި ކޮމިޓީގެ ޖަލްސާތައް ސިއްރުކުރުމާބެހޭ ގޮތުން ހުރި އިޖުރާއަތުތަކާ ހިލާފަށް، އެ ކޮމިޓީގެ ޖަލްސާތައް ގެންދަވާފައިވޭ،" އިސްތިއުފާ ދިން ސަބަބު ހާމަކުރައްވަމުން ޝަމީމް ލިޔުއްވާފައިވެ އެވެ.
"އަޅުގަނޑުގެ މައްޗަށް ތުހުމަތުކުރެވޭ ކަންކަން އާންމުކޮށް އިއުލާނު ކުރައްވާފައި، އެ ކަންކަމަށް އަޅުގަނޑު ދޭން އޮތް ޖަވާބު، އާންމުންނަށް ނުއިވޭގޮތަށް ސިއްރުކުރުމަކީ، އަދުލް އިންސާފުގެ ހަމަތަކާއި ނެޗުރަލް ޖަސްޓިސްގެ އުސޫލުތަކާވެސް ހިލާފު ކަމަކަށްވާތީ، މިކަންކަމާ އިހުތިޖާޖުކުރުމުގެ ގޮތުން، ގާނޫނުއަސާސީގެ 226 ވަނަ މާއްދާގައިވާ ގޮތުގެ މަތިން، ޕްރޮސިކިއުޓާ ޖެނެރަލްގެ މަޤާމުން އަޅުގަނޑު އިސްތިއުފާ ދީފިން،"
ކޮމިޓީ ބައްދަލުވުމަށްފަހު ޕީޖީ އޮފީހުގައި ބޭއްވި ނޫސްވެރިންގެ ބައްދަލުވުމުގައި ޝަމީމް ވިދާޅުވީ އޭނާއަކީ އެއްވެސް އިރެއްގައި "މަގާމު ބޭނުންވެގެން" އުޅޭ ބޭފުޅެއް ނޫން ކަމަށެވެ. އަދި ރާއްޖޭގެ ސިޔާސީ މަސްރަހުގެ ކަންކަމަށް އިޝާރާތް ކުރައްވައި، މަގާމުން ދުރުކޮށްފާނެ ހާލަތެއް އައިސްދާނެ ކަން އަބަދުވެސް ދަނެގެން މަސައްކަތް ކުރި ކަމަށް ޝަމީމް ވިދާޅުވި އެވެ.
"މިއީ އިތުބާރު ނެތިގެން ހިނގާ ކަމެއް ނޫން. މިއީ މުޅިން އެހެން ގޮތަަކަށް ހިނގާ ކަމެކޭ. އެއީ ރާއްޖޭގެ ކަންކަން އަދި ހިނގާ ގޮތޭ. އެކަމުގައި ޝަކުވާއެއް ވެސް ނެތޭ،" ޝަމީމް ވިދާޅުވި އެވެ.
އޭނާއަށް ނުފޫޒު ފޯރުވަމުން އަބަދުވެސް އެކި ދިމަދިމާލުން މަސައްކަތްކޮށްފައިވާ ކަމަށް ޝަމީމް ވިދާޅުވި އެވެ. ނަމަވެސް ޝަމީމަށް ނުފޫޒު ނުފޯރުވޭނެ ކަން ނުފޫޒު ފޯރުވަން މަސައްކަތް ކުރަން އުޅެފައިވާ ކޮންމެ މީހަކަށް ވެސް އެނގޭނެ ކަމަށް ޝަމީމް ވިދާޅުވި އެވެ.
