ތ. ދިޔަމިގިލި ފެނުގެ ނިޒާމު ގާއިމުކުރުމުގެ މަޝްރޫއުގެ 80 ޕަސަންޓް މަސައްކަތް ނިމިފައި ވަނިކޮށް، އެ މަޝްރޫއަށް ގެނައި ފެން ޕްލާންޓް އެހެން ރަށަކަށް ގެންދިޔުމުގެ މަސައްކަތް ފަށައިފި އެވެ.
"އަދަދު" އަށް އެނގިފައިވާ ގޮތުގައި މަޝްރޫއު ކުރިއަށް ގެންދާ ފެނަކަ ކޯޕަރޭޝަނުން ވަނީ ފެން ޕްލާންޓް މަސައްކަތު ސައިޓުން ނެރެ، އެހެން ރަށަކަށް ގެންދަން ޖެޓީ މައްޗަށް ގެންގޮސްފަ އެވެ.
"ފެނަކައިން ސާމާނުތަކެއް ނެރެފި. އެ ގެންދަނީ ކޮން ރަށަކަށް ކަމެއް ނޭގޭ. ވަރަށް ކަންބޮޑުވާ ކަމެއް މި ރަށުގެ ފެނުގެ ނިޒާމު ގާއިމު ކުރުމުގެ 80 ޕަސަންޓު މަސައްކަތް ގާތްގަނޑަކަށް ނިމިފައި ވަނިކޮށް މިހެން ހެދުން،" ދިޔަމިގިލި ކައުންސިލްގެ ރައީސް އަހުމަދު މޫސާ "އަދަދު" އަށް ވިދާޅުވި އެވެ.
ދިޔަމިގިލި ފެނުގެ ނިޒާމު ގާއިމު ކުރުމަށް ގެނައި ފެން ޕްލާންޓް ގެންދަނީ -- ފޮޓޯ: އަދަދު
މި ސަރުކާރު އައި ފަހުން ރަށުގައި އެއްވެސް ތަރައްގީގެ މަޝްރޫއެއް ކުރިއަށް ނުދާކަން ފާހަގަކުރައްވާ އަހުމަދު މޫސާ ވިދާޅުވީ އެ ސާމާނު އެހެން ތަނަކަށް ގެންދިޔުމުން ދޭހަވަނީ ރަށުގައި އެއްވެސް ކަމެއް ކޮށްދިނުމުގެ ނިޔަތެއް ސަރުކާރުގައި ނެތުން ކަމަށެވެ.
އަހުމަދު މޫސާ ވިދާޅުވި ގޮތުގައި މި މަޝްރޫއުގެ ދަށުން ގޭގެއަށް ބޭނުންވާ ފެން ހޮޅިތައް ވެސް ވައްދާފަ އެވެ. އަދި މިހާރު އޮންނާނީ އާރްއޯ ޕްލާންޓް ބަހައްޓައި އިންސްޓޯލް ކުރުން ކަމަށް އޭނާ ވިދާޅުވި އެވެ.
މިކަމާ ގުޅިގެން ފެނަކައިގެ ބަހެއް މިހާތަނަށް ނުލިބެ އެވެ.
ރާއްޖޭގެ އެކި ކަންކޮޅުތަކުގައި ހުރި ފެނާއި ނަރުދަމާގެ މަޝްރޫއުތަކުގެ އިތުރުން އެހެނިހެން ތަރައްގީގެ މަޝްރޫއުތައް ވެސް ވަނީ ހުއްޓިފަ އެވެ. މިހެން ދިމާވީ ކުރީ ސަރުކާރުން ބަޖެޓު ފައިސާ ހަމަނުޖައްސާ މަޝްރޫއުތައް ފެށުމުން ކަމަށް އަދުގެ ސަރުކާރުން އަންނަނީ ބުނަމުންނެވެ.
މީގެ ކުރިން ވެސް ރަށްރަށުގައި ހިންގަމުންދިޔަ މަޝްރޫއުތަކަށް ގެނެސްފައި ހުރި ސާމާނު އެހެން ރަށްރަށަށް ގެންދާ މައްސަލަ މީގެ ކުރިން ވެސް ފެންމަތިވި އެވެ.
