ރައްޔިތުންގެ މަޖިލީހުގެ ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު (ސަޓޯ) ދައުލަތުގެ އިދާރާއަކާ ދެކޮޅަށް ވަކާލާތު ކުރުމަށް ހައި ކޯޓުގައި އޮތް އަޑުއެހުމަކަށް މިއަދު ވަޑައިގަތުމުން މަޖިލިސް މެންބަރުންނަށް ވެސް ދައުލަތުގެ އިދާރާއަކާ ދެކޮޅަށް ވަކާލާތު ނުކުރެވޭނެ ކަމަށް އެޓާނީ ޖެނެރަލްގެ އޮފީހުން ބުނެފި އެވެ.
އެ މައްސަލައަކީ ލޯކަލް ގަވަރުމަންޓް އޮތޯރިޓީ (އެލްޖީއޭ) އަށް ރައްދުވާ ގޮތަށް އަމިއްލަ ފަރާތަކުން ހުށަހަޅާފައިވާ މައްސަލައެކެވެ. މެންބަރު ސައްތާރު ކޯޓަށް ވަޑައިގަތީ އެލްޖީއޭއާ ދެކޮޅަށް ކޯޓަށް މައްސަލަ ހުށަހެޅި ފަރާތް ތަމްސީލްކުރައްވާ ގާނޫނީ ވަކީލުގެ ހައިސިއްޔަތުންނެވެ.
މީގެ ކުރިން ދައުލަތުގެ އިދާރާއަކާ ދެކޮޅަށް ދައުލަތުގެ ވަޒީފާގައި ހުންނަ ފަރާތަކަށް ވަކާލާތު ނުކުރެވޭނެ ކަމަށް އެޓާނީ ޖެނެރަލް (އޭޖީ) އޮފީހުން ހައި ކޯޓުގައި ހިނގި މައްސަލައެއްގެ އަޑުއެހުމެއްގައި ފާހަގަކޮށްފައިވާތީ، އެކަމާ ގުޅޭ ގޮތުން މި މައްސަލައިގެ ބެންޗުން ވެސް ސުވާލުކުރި އެވެ.
ފަނޑިޔާރުންގެ ބެންޗުން ކުރި ސުވާލަށް ޖަވާބު ދެއްވަމުން މެންބަރު ސައްތާރު ވިދާޅުވީ ރައްޔިތުންގެ މަޖިލީހުގެ މެންބަރަކަށް ދައުލަތުގެ އިދާރާއަކާ ދެކޮޅަށް ކޯޓުގައި އަމިއްލަ ފަރުދެއް ތަމްސީލްކޮށް ގާނޫނީ ވަކީލެއްގެ ގޮތުގައި ވަކާލާތު ނުކުރެވޭނެ ކަމަށް މަޖިލީހުގެ މެންބަރުންގެ އިމްތިޔާޒުތަކުގެ ގާނޫނާއި ގާނޫނީ ފަންނުގެ ގާނޫނުގައި ވެސް މަނާކޮށްފައިވާ އިބާރާތެއް ނެތް ކަމަށެވެ.
"އަދި މިއީ ކުރިން ވެސް ޕްރެކްޓިސް ކުރަމުން އައިސްފައިވާ ކަމެއް،" ސައްތާރު ވިދާޅުވި އެވެ.
ދެން ބެންޗުގެ ރިޔާސަތުގައި އިންނެވި ފަނޑިޔާރު މުހައްމަދު ނިޔާޒު ސުވާލުކުރެއްވީ ސައްތާރަކީ މަޖިލީހުގެ ޖުޑިޝަރީ ކޮމިޓީގެ މެންބަރަކަށް ވުމުން މިފަދަ މައްސަލައެއްގައި ވަކާލާތު ކުރުމަށް މަސްލަހަތު ފުށުއެރުމަކަށް ނުވާނެތޯ އެވެ. އެއީ ޖުޑީޝަރީ ކޮމިޓީއަކީ ފަނޑިޔާރުންނާ ގުޅޭ ގޮތުން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމާ ނިންމުންތައް ދިރާސާކޮށް ގޮތެއް ނިންމުމުގެ ބާރު އޮންނަ ކޮމިޓީއަކަށް ވާތީ އެވެ.
"މަޖިލިސް މެންބަރަކަށް ވުރެ ދާއިރާ ހަނިވީނޫންތޯ، ޖުޑިޝަރީ ކޮމިޓީގެ މެންބަރަކަށް ވުމުން، ޖުޑިޝަލް ސާވިސް ކޮމިޝަނުން ފަނޑިޔާރުންނާ ގުޅޭ ގޮތުން ގޮތެއް ނިންމާފައި ވަކިކުރަން ވުމުން ދެން އެންމެ ފުރަތަމަ ފޮނުވާ ތަނަކީ އެއީ ނޫންތޯ،" ފަނޑިޔާރު ނިޔާޒު ވިދާޅުވި އެވެ.
އެ ސުވާލުގެ ޖަވާބުގައި ސައްތާރު ވިދާޅުވީ އެއީ ވަކާލާތު ނުކުރެވޭ ސަބަބެއް ގޮތުގައި ނުދެކޭ ކަމަށެވެ. އެކަމަކު ޖުޑިޝަރީ ކޮމިޓީގެ މެންބަރަކަށް ވާތީ އެ ގޮތަށް ދެކުމުގެ ފުރުސަތު އޮންނާނީ ޝަރީއަތުން ގޮތެއް ނިންމުމަށް ސައްތާރު އެދިވަޑައިގަތެވެ. އަދި އެއީ މަސްލަހަތު ފުށު އަރާ ކަމެއް ގޮތުގައި ދެކޭނަމަ ތަނާޒުލް ވުމަށް ތައްޔާރަށް ހުންނެވި ކަމަށް ވެސް މެންބަރު ވިދާޅުވި އެވެ.
އެކަމާ ގުޅޭ ގޮތުން ސުވާލުކުރުމުން އެލްޖީއޭ ތަމްސީލްކުރުމަށް ކޯޓަށް ހާޒިރުވެވަޑައިގެންނެވި އޭޖީ އޮފީހުގެ ވަކީލު ވިދާޅުވީ އެ އޮފީހުގެ ސްޓޭންޑަކީ ނުވަތަ ގަބޫލުކުރާ ހަމައަކީ ހަމަ ދައުލަތުގެ މުސާރައެއްގައި ވަޒީފާ އަދާކުރާ އެއްވެސް ބޭފުޅަކަށް ދައުލަތުގެ އިދާރާއަކާ ދެކޮޅަށް ވަކާލާތު ނުކުރެވޭނެ ކަމަށެވެ.
މިއަދު ބޭއްވި އަޑުއެހުން ނިންމައިލެއްވީ ދެން އޮންނަ އަޑުއެހުމަށް ގޮތެއް ނިންމަވާނެ ކަމަށް ބެންޗުން އިއުލާން ކުރެއްވި އެވެ. މި މައްސަލަ ހައި ކޯޓުގައި ބައްލަވާ ބެންޗުގައި ތިއްބަވަނީ ފަނޑިޔާރު ނިޔާޒުގެ އިތުރުން ފަނޑިޔާރު ހުޒައިފާ މުހައްމަދާއި ފަނޑިޔާރު މުހައްމަދު ފައިސަލެވެ.
