މުމްބާއި (އޮގަސްޓް 22) - އިންޓަނޭޝަނަލް ކްރިކެޓް ކައުންސިލް (އައިސީސީ)ގެ ޗެއާމަނަކަށް ކްރިކެޓް ބޯޑް އޮފް އިންޑިއާ (ބީސީސީއައި)ގެ ސެކްރެޓަރީ، ޖޭ ޝާހު ހަމަޖައްސަން ނިންމާފައިވާ ކަަމަށް ރިޕޯޓްތައް ބުނެފި އެވެ.
އައިސީސީގެ ޗެއާމަން، ގްރެގް ބާކްލޭ ވަނީ މި އަހަރުގެ ނޮވެމްބަރުގައި އޭނާގެ ދައުރު ހަމަވުމުން އިތުރު ދައުރަކަށް ދެން ކުރިމަތިނުލަން ނިންމައިފަ އެވެ. އަދި އެކަން، ވީޑިއޯ ކޮންފަރެންސް ބައްދަލުވުމެއްގައި، ބާކްލޭ ވަނީ އޮސްޓްރޭލިއާ ކްރިކެޓް ބޯޑްގެ ޗެއާމަން، މައިކް ބެއާޑްއާ ހިއްސާކުރައްވައިފަ އެވެ.
ބާކްލޭ، މިހާރު ފުރިހަމަ ކުރައްވަމުން އަންނަނީ، އައިސީސީގެ ޗެއާމަންގެ މަގާމުގެ ދެ ވަނަ ދައުރެވެ. އޭނާ ފުރަތަމަ މަގާމަށް އައީ 2020 ވަނަ އަހަރުގެ ނޮވެމްބަރުގަ އެވެ. އަދި 2022 ވަނަ އަހަރު ދެ ވަނަ ދައުރަކަށް އިންތިހާބުވި އެވެ.
އިންޑިއާގެ މީޑިއާ ރިޕޯޓްތައް ބުނާގޮތުން، އައިސީސީގެ ޗެއާމަންގެ މަގާމަށް ޖޭ ޝާހު ގެންނަން، އިންޑިއާ އާއި އޮސްޓްރޭލިއާ އަދި އިންޑިއާގެ ކްރިކެޓް ބޯޑުން ތާއީދުކުރެ އެވެ. އަދި ޖޭ ޝާހު ވަނީ، އެ މަގާމަށް އައުމުގެ ގޮތުން، އެކި ގައުމުތަކާ ވެސް މަޝްވަރާކުރައްވައިފަ އެވެ.
މީގެ ކުރިން، އިންޑިއާގެ ހަތަރު ފަރާތެއް ވަނީ، އައިސީސީ އިސް މަގާމުތައް ފުރުއްވައިފަ އެވެ. އެއީ، އައިސީސީގެ ރައީސަކަށް 1997-2000 އަށް ޖަގްމޯހަން ދަލްމިޔާ، 2010-2012 އަށް ހުންނެވި ޝަރަދު ޕަވަރުގެ އިތުރުން، ޗެއާމަނަކަށް 2014-2015 އަށް ހުރި ސްރިނިވާސަން އާއި 2015-2020 އަށް ހުންނެވި ޝަޝާން މަނޯހަރު އެވެ.
އައިސީސީގެ ޗެއާމަނަކަށް ދެން އަންނާނެ ކަމަށް ބެލެވޭ ޖޭ ޝާހު އަކީ، އިންޑިއާގެ ހޯމް މިނިސްޓަރު، އަމިތު ޝާހުގެ ދަރިއެކެވެ.
