މިސްކިތެއްގައި ތިބި އަންހެނުންތަކަކަށް ޖިންސީ ގުނަވަން ދެއްކި މީހެއްގެ ބަންދަށް 15 ދުވަސް ކްރިމިނަލް ކޯޓުން އިއްޔެ ޖަހައިފި އެވެ.
އެ ކޯޓުން އާންމު ކޮށްފައިވާ ކޯޓު އަމުރުތަކުން އެނގޭ ގޮތުގައި އެ މައްސަލައިގައި ބަންދު ކޮށްފައި ވަނީ އުމުރުން 30 އަހަރުގެ ގ. މާލެހިޔާ، ނައުޝާދު މޫސާ އެވެ. ކްރިމިނަލް ކޯޓުން އަމުރު ކޮށްފައި ވަނީ 15 ދުވަހުގެ މުއްދަތަށް އޭނާ ކަސްޓޯޑިއަލް ޖަލެއްގައި ބަންދު ކުރުމަށެވެ.
ނައުޝާދު ޖިންސީ ގުނަވަން ދެއްކީ އައިޖީއެމްއެޗުގެ އެތެރޭގައި ހުންނަ މިސްކިތުގައި ތިބި އަންހެނުންތަކަކަށް ކަމަށް ބަންދުގެ މަޖިލީހުގައި ފުލުހުން ބުނެފައިވެ އެވެ. އަދި، އޭނާއަކީ މީގެ ކުރިން ސްކޫލަކަށް ވަދެ ވެސް ޖިންސީ ގުނަވަން ދައްކާފައިވާ މީހެއް ކަމަށް ފުލުހުން ބުނެފައިވެ އެވެ.
ކްރިމިނަލް ކޯޓުން އިއްޔެ ނެރުނު އަމުރުގައި ބުނެފައި ވަނީ ޖިންސީ ގުނަވަން ދެއްކި ކަމަށް ތުހުމަތު ކުރެވޭ ނައުޝާދަކީ މީގެ ކުރިން ވެސް އެކި މައްސަލަތަކުގައި ހައްޔަރު ކޮށްފައިވާކަމުގެ ރިކޯޑު އޮތް މީހެއް ކަމަށެވެ.
ބަންދުގެ މަޖިލީހުގައި ނައުޝާދު ބުނެފައި ވަނީ ވަކީލަކު ބޭނުން ނުވާ ކަމަށާއި އިތުރު ވާހަކައެއް ދައްކަން ބޭނުން ނުވާ ކަމަށެވެ.
