ޕްރޮސިކިއުޓާ ޖެނެރަލް (ޕީޖީ) ހުސެއިން ޝަމީމު އެ މަގާމުން ވަކިކުރަން ހުށަހަޅާފައިވާ މައްސަލާގައި ޖަވާބުދާރީވުމަށް ދީފައިވާ ފަސް ދުވަހުގެ ނޯޓިސް ހަމަވުމަށް ފަހު ބުރާސްފަތި ދުވަހު އޭނާ ހާޒިރުކުރާ ކޮމިޓީ ތާވަލު ކުރުމަށް ޖުޑީޝަރީ ކޮމިޓީން ނިންމައިފި އެވެ.
މިއަދު ބޭއްވި ކޮމިޓީ ބައްދަލުވުމުގައި، ޖުޑިޝަރީ ކޮމިޓީގެ މުގައްރިރު ހުސްނީ މުބާރަކް ވިދާޅުވީ މަޖިލީހުގެ ގަވާއިދުގައި އޮންނަ ގޮތުގެ މަތިން ޝަމީމަށް ދީފައިވާ ފަސް ދުވަހުގެ ނޯޓިސް މާދަމާއަށް ހަމަވެ، ޖެހިގެން އަންނަ ބުރާސްފަތި ދުވަހު ހާޒިރުވާ ގޮތަށް ކަނޑައެޅިފައިވާ ކަމަށެވެ.
"ޕްރޮސެކިއުޓަ ޖެނެރަލް [ހުސައިން ޝަމީމް] ކޮމިޓީއަށް ހާޒިރުކުރާނީ ބުރާސްފަތި ދުވަހު،" ރައްޔިތުންގެ މަޖިލީހުގައި މަނަދޫ ދާއިރާ ތަމްސީލްކުރައްވާ މެންބަރު ހުސްނީ ވިދާޅުވި އެވެ.
ހާޒިރުކުރުމުގެ ކުރިން ބައެއް ލިޔެކިޔުންތައް ހޯދަނީ
ޝަމީމް ވަކިކުރުމަށް، ހުޅުދޫ ދާއިރާގެ ޕީއެންސީ މެންބަރު މުހައްމަދު ޝާހިދު ހުށަހެޅުއްވި މައްސަލާގައި ޝަމީމަށް ތުހުމަތުކޮށްފައިވާ އެކި މައްސަލަތަކުގެ ތެރެއިން ބައެއް މައްސަލަތަކުގެ ލިޔެކިޔުންތައް ހޯދުމަށް ވެސް ކޮމިޓީން މިއަދު ފާސްކުރި އެވެ.
ފުވައްމުލައް މެދު ދާއިރާގެ ޕީއެންސީ މެންބަރު އަލީ ފަޒާދު ހުށަހެޅުއްވީ އެއިން ފަސް މައްސަލައެއްގެ ލިޔެކިޔުންތައް ހޯދުމަށެވެ. އެއީ؛
- ކުރީގެ ޓުއަރިޒަމް މިނިސްޓަރު އަލީ ވަހީދުގެ މައްޗަށް އުފުލި ޖިންސީ ގޯނާ ކުރުމުގެ ދައުރާ އަނބުރާ ގެންނަން ނިންމުމުގެ ސަބަބުގެ ތަފްސީލް
- ކުރީގެ ޔޫތު މިނިސްޓަރު އަހުމަދު މަހުލޫފުގެ މައްޗަށް އުފުލި ހިޔާނާތުގެ ދައުވާ އަނބުރާ ގެންނަން ނިންމި ނިންމުމުގެ ތަފްސީލް
- މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް އުފުލި ހިއުމަން ޓްރެފިކިން ދައުވާ އަނބުރާ ގެންނަން ނިންމި ނިންމުމުގެ ތަފްސީލް
- ވެންޓިލޭޓަރު މައްސަލާގައި ތުހުމަތު ކުރެވޭ މީހުނަށް ދައުވާ ނުކުރަން ނިންމި ނިންމުމުގެ ތަފްސީލް
- ޕީޖީ އޮފީހުގެ މުވައްޒަފުންގެ މެދުގައި ތަފާތުކުރުން ގެންގުޅޭ މައްސަލާގައި ބޭރު ދަތުރުތަކަށް ފޮނުވާނެ މުވައްޒަފުން ކަނޑައަޅަން އޮފީހުގައި އޮންނަ އުސޫލާއި ފޮނުވާފައިވާ މުވައްޒަފުންގެ ތަފްސީލު
މެންބަރުންގެ އިއްތިފާގުން އެ ގޮތަށް ފާސްކުރި އެވެ. އަދި ޝަމީމް ހާޒިރުކުރުމުގެ ކުރިން އެ ލިޔެކިޔުންތައް ހޯދުމަށް ވެސް ކޮމިޓީން ނިންމި އެވެ. މުގައްރިރު ހުސްނީ ވިދާޅުވީ ބުދަ ދުވަސް ނިމުމުގެ ކުރިން ތަފްސީލުތައް ފޮނުވުމަށް ޕީޖީ އޮފީހަށް މިއަދު މަޖިލީހުން އަންގާނެ ކަމަށެވެ.
ޝަމީމް ވަކިކުރުމަށް މެންބަރު ޝާހިދު ހުށަހެޅުއްވި މައްސަލާގައި ފާހަގަކޮށްފައިވާ އިތުރު ކަންކަމަކީ؛
- ސަފާރީ ރޭޕް ކޭސް މައްސަލައިގައި ދަށު ކޯޓުން ނިންމި ނިންމުން އިސްތިއުނާފު ނުކުރަން ނިންމުން
- ބަނގުރާ ބުއިމުގެ ގިނަ މައްސަލަތަކެއް އަނބުރާ ގެނައުން
- ޕީޖީ އޮފީހުގެ ޕްރޮސިކިއުޓަރު އަދި ތަރުޖަމާނު އަހުމަދު ޝަފީއު އެއް ޖިންސުން ގުޅުން ހިންގައި، މަސްތުވާތަކެތި ބޭނުންކޮށް، ރަސޫލާއަށް ފުރައްސާރަ ކުރި ކަމަށް ތުހުމަތުތަކެއް އަމާޒުވުމުން ވެސް އެ މައްސަލަ ބަލަން ދެކޮޅު ހެދުން
ޕީޖީ ކަމުން ޝަމީމް ވަކިކުރަން މަޖިލީހަށް މައްސަލަ ހުށަހަޅާފައި މިވަނީ އޭނާ ވަކިކުރަން ޖެހޭ ކަމަށް ބުނެ މަޖިލީހުގެ ތަޅުމުގައި ސަރުކާރަށް ތާއީދުކުރާ އެތައް މެންބަރުންނެއް ވާހަކަ ދެއްކި ފަހުންނެވެ. އޭނާ ވަކިކުރަން ހުށަހެޅި މައްސަލައިގައި ވެސް ޝާހިދު ފާހަގަކޮށްފައި ހުރީ މެންބަރުން ތުހުމަތު ކުރެއްވި މައްސަލަތަކެވެ.
