އެމެރިކާގެ އިންތިހާބުގައި ވާދަކުރައްވާ އެ ގައުމުގެ ނައިބުރައީސް ކަމަލާ ހެރިސްއާއި އެ ގައުމުގެ ކުރީގެ ރައީސް ޑޮނަލްޑް ޓްރަމްޕްގެ ކެމްޕެއިނަށް ސައިބާ އެޓޭކްތަކެއް ދިނީ އިރާނުން ކަމަށް އެމެރިކާއިން ބުނެފި އެވެ.
އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އަދި އެ ގައުމުގެ އެހެން ފެޑެރަލް އެޖެންސީތަކުން ބުނީ އިންތިހާބުގެ ކެމްޕެއިނަށް ނުފޫޒު ފޯރުވަން މަސައްކަތް ކުރަމުންދާ ކަމަށެވެ.
"އިރާނުން އިންތިހާބުގެ ކެމްޕެއިނަށް ނުފޫޒު ފޯރުވަން ދަނީ މަސައްކަތް ކުރަމުން. އެގޮތުން އެމެރިކާގެ ރައްޔިތުންނާއި ސައިބާ އޮޕަރޭޝަންތައް މެދުވެރިކޮށް އަންނަނީ ނުފޫޒު ފޯރުވަން މަސައްކަތް ކުރަމުން،" އެފްބީއައި އިން ބުންޏެވެ.
އެފްބީއައި އިން ބުނީ އިރާނުގެ ސައިބާ އެޓޭކްތަކުން ޓްރަމްޕްގެ ކެމްޕެއިން ކޮމްޕްރޮމައިޒްވާފަދަ ކަމެއް މެދުވެރިވެފައި ނުވާ ކަމަށެވެ.
ޓްރަމްޕްގެ ކެމްޕެއިނުން ވަނީ މި މަހު ކުރީކޮޅު ވެބްސައިޓު އިރާނުން ހެކް ކޮށްށްފައި ކަމަށާއި ނަމަވެސް އެކްސެސް ވެވިފައި ވަނީ ހަމައެކަނި ޕަބްލިކް ކޮށްފައި ހުރި މައުލޫމާތުތަކަށް ކަމަށެވެ.
ނަމަވެސް އިރާނުން ވަނީ އެމެރިކާގެ މި ހުރިހާ ތުހުމަތުތައް ދޮގުކޮށް، އެފަދަ އެއްވެސް ކަމެއް ނުކުރާ ކަމަށް ބުނެފަ އެވެ.
"ކުރިންވެސް ބުނެފައިވާ ގޮތަށް އެމެރިކާގެ އިންތިހާބަށް އަދި ކެމްޕެއިނަށް ނުފޫޒު ފޯރުވަން އެއްވެސް މަސައްކަތެއް ކޮށްފައި ނުވާނެ،" އިރާނުން ބުންޏެވެ.
