އައްޑޫ ސިޓީގައި ޓޫރިޒަމް ކުރިއެރުވުމަށް ގޮންޖެހުންތަކެއް ހުރި ކަމަށާއި މާލެއަށް ބަރޯސާވެގެން އެ ސިޓީގެ ޓޫރިޒަމް ކުރިއަކަށް ނުދާނެ ކަމަށް އައްޑޫ ސިޓީ ކައުންސިލްގެ މޭޔަރު އަލީ ނިޒާރު މިއަދު ވިދާޅުވެއްޖެ އެވެ.
ނިޒާރު މިހެން ވިދާޅުވީ "ޑެސްޓިނޭޝަން އައްޑޫ 2024" ސަމިޓް އިފްތިތާހުކުރުމަށް އެ ސިޓީގެ އިކުއޭޓަރު ވިލެޖުގައި މިއަދު ބޭއްވި ރަސްމިއްޔާތުގަ އެވެ. މޭޔަރު އިތުރަށް ވިދާޅުވީ މި ސަމިޓުގެ ދަށުން ވަރަށް ގިނަ ކަންތައްތަކެއް ކުރަން ނިންމަވާފައިވާ ކަމަށެވެ.
"އެންމެ ބޮޑު ގޮންޖެހުމަކީ މާލެ އާއި ދުރުގައި މިތަން އޮތުން. މާލެ ކައިރީ ތަންތަން އަގުހެޔޮ ވީމާ މިތަނަށް އަންނާކަށް ޓޫރިސްޓުން ބޭނުމެއް ނުވޭ. ގަން އެއާޕޯޓު ތަރައްގީކޮށް ބޭރުގެ އެއާލައިންތައް އެއާޕޯޓަށް އާދެވޭ ގޮތް ހެދުމަކީ އެންމެ މުހިންމު އެއް ކަންތައް،" ނިޒާރު ވިދާޅުވި އެވެ.
އެ ސަމިޓުގައި ހުރި ކަންތައްތަކުގައި ކުލަޖެއްސުމަށް އައްޑޫ ރައްޔިތުން ގުޅިގެން މަސައްކަތް ކުރުން މުހިންމު ކަމަށް މޭޔަރު ފާހަގަކުރި އެވެ. އަދި އައްޑޫ ވަކި މަންޒިލެއްގެ ގޮތުގައި އިސްތިހާރު ކުރެވޭނެ ކަމަށް ވެސް މޭޔަރު ވިދާޅުވި އެވެ.
އެ ރަސްމިއްޔާތުގައި ވާހަކަ ދައްކަވަމުން ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވީ އައްޑޫއަކީ އިނގިރޭސިން ކުރިން ދިރިއުޅެފައިވާ ތަނެއް ކަމުން އެމީހުންނަށް ވަކިން ހާއްސަކޮށް ބެލުން މުހިންމު ކަމަށެވެ. އަދި އިނގިރޭސިން ކުރިން މިތަނުގައި އުޅުނު އިރު ހަދައިފައިވާ ތަންތަން ވެސް އަލުން މަރާމާތުކޮށް ޓޫރިސްޓުނާއި ހަމައަށް ގެނެސްދޭންޖެހޭ ކަމަށް އޭނާ ވިދާޅުވި އެވެ.
"ޑެސްޓިނޭޝަން އައްޑޫ 2024" މިއަދު އިފްތިތާހު ކުރިއިރު އެކިއެކި ސްޓޭކްހޯލްޑަރުން މި ރަސްމިއްޔާތުގައި ހިޔާލު ހުށައަޅަ އެވެ. އޭގެ ތެރޭގައި ޓޫރިޒަމް މިނިސްޓްރީ އާއި މޯލްޑިވިއަން އަދި ގަން އެއާޕޯޓުގެ އޮފިޝަލުން ވެސް ހިމެނެ އެވެ.
އައްޑޫގައި މިހާރު ވެސް 1506 އެނދު އެބަ ހިންގަ އެވެ. އޭގެ ތެރެއިން 1000 އެނދު ބޭނުން ކުރާއިރު ބާކީ 506 އެނދަކީ އައުޓް އޮފް ސާވިސްގައި ހުރި އެނދުތަކެވެ. ރައީސް ޑރ. މުއިއްޒު އައްޑޫއަށް ވެފައިވާ ވައުދުތަކުގެ ތެރޭގައި އެނދުގެ އަދަދު 6000 އަށް އެރުވުން ހިމެނެ އެވެ.
