ހަލުވި މިނުގައި ދުނިޔޭގައި މިހާރު ފެތުރެމުން ދާ މަކުނުވިދުރީގެ (އެމްޕޮކްސް) ގެ އާ ވޭރިއަންޓުގެ ކޭހެއް އެފްރިކާއިން ބައްރުގެ ބޭރުން ފުރަތަމަ ފަހަރަށް ފެނިއްޖެ އެވެ.
މިއަދު ސްވިޑަން އިން ފެނުނު މި ކޭހަކީ ޔޫރަޕުންވެސް ފެނުނު އެމްޕޮކްސްގެ އާ ވޭރިއަންޓުގެ ފުރަތަމަ ކޭހެވެ. ބަލި ޖެހުނީ ކޮން ޖިންސެއްގެ ކޮން ގައުމެއްގެ މީހަކަށް ކަމެއް އަދި ސާފެއް ނުވެ އެވެ.
އެމްޕޮކްސް ފެތުރޭ މިންވަރު އަވަސްވެ، އެ ބަލީގެ ނުރައްކާ މުޅި ދުނިޔެއަށް ވެސް އޮތް ކަމަށް ކަނޑައަޅައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އިއްޔެ ވަނީ އާންމު ސިއްހީ ނުރައްކަލުގެ ހާލަތު އިއުލާނުކޮށްފަ އެވެ.
އެކަމާ ގުޅޭގޮތުން މައުލޫމާތު ދިނުމަށް ޑަބްލިއުއެޗްއޯއިން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ޖަމިއްޔާގެ ޑިރެކްޓާ ޖެނެރަލް، ޓެޑްރޯސް އަދަނޮމް ވިދާޅުވީ ކުރިއަށް އޮތް ދުވަސްތަކުގައި ބަލި ފެތުރިފައިވާ ގައުމުތައް ދެނެގަނެ، ބަލި ޖެހިފައިވާ މީހުންނަށް ފަރުވާ ދެމުންދާނެ ކަމަށެވެ.
މަކުނު ވިދުރި އެންމެ ފުރަތަމަ ފެނުނީ 1958 ގައި ރާމާމަކުނުގެ ގައިންނެވެ. މަކުނުގެ ނަމުން އެ ބައްޔަށް ނަން ދީފައިވި ނަމަވެސް އެ ބަލި ޖައްސާ ވައިރަސް އާންމު ގޮތެއްގައި ފެންނަނީ މީދާ އާއިލާގެ ޖަނަވާރުންނެވެ.
އެ ބަލި އިންސާނެއްގެ ގައިން އެންމެ ފުރަތަމަ ފެނުނީ 1970 ގެ އަހަރުތަކުގައި ޑިމޮކްރެޓިކް ރިޕަބްލިކް އޮފް ކޮންގޯއިންނެވެ. މީގެ ކުރިން 2022 ގައި ވެސް މަކުނުވިދުރި އާ ގުޅިގެން އާންމު ސިއްހީ ކުއްލި ނުރައްކަލުގެ ހާލަތު އިއުލާނު ކުރި އެވެ.
