ޔަމަނުގެ ދެކުނުގެ ބަނދަރުމަތީ ރަށެއް ކަމަށްވާ އަދަނުގައި ހުންނަ ރިޔާސީ ގަނޑުވަރަށް ހޫތީން ދިން މިސައިލް ހަމަލާއެއްގައި ފަސް މީހުން މަރުވެ ސޯޅަ މީހުން ޒަހަމްވެއްޖެ ކަމަށް އެ ގައުމުގެ އޮފިޝަލުން ވިދާޅުވެއްޖެ އެވެ.
ބައިނަލްއަގުވާމީ ގޮތުން ގަބޫލުކުރާ ޔަމަނުގެ ސަރުކާރު ގާއިމުވެފައިވާ އަލްމާޝިގު ގަނޑުވަރަށް އަމާޒުކޮށް ފޮނުވާލި ފަސް ބެލިސްޓިކް މިސައިލް އެ ސަރަހައްދަށް އެރި ވަގުތު ބޮޑުވަޒީރާއި އެހެނިހެން ވަޒީރުން ގަނޑުވަރުގައި ތިއްބެވި ނަމަވެސް، އެއްވެސް ބޭފުޅަކަށް އަނިޔާއެއް ނުވާ ކަމަށް އިންފޮމޭޝަން މިނިސްޓަރު މުއައްމަރު އަލްއިރްޔާނީ ވިދާޅުވި އެވެ.
މި ހަމަލާއާ ގުޅޭގޮތުން ހޫތީންގެ އަސްކަރީ ތަރުޖަމާނު ޔަހްޔާ ސަރީއު ވިދާޅުވީ، އެ ޖަމާއަތުން ހަމަލާދިނީ އަދަނުގައި ހުންނަ ސައުދީ އަރަބިއްޔާގެ އަސްކަރީ އޮޕަރޭޝަންތަކާ ބެހޭ މަރުކަޒަށް ކަމަށެވެ. ޔަމަނުގެ ސިއްހަތާ ބެހޭ ވަޒީރު ގާސިމް ބުހައިބެހް ވިދާޅުވި ގޮތުގައި މި ހަމަލާގައި މަރުވި މީހުންގެ ތެރޭގައި ގަނޑުވަރު ބަލަހައްޓަން ތިބި ސަލާމަތީ ބާރުތަކުގެ މީހުންނާއި އާންމު މުވައްޒަފުން ހިމެނެ އެވެ.
ޔަމަނުގެ ބޮޑުވަޒީރު ޝަޔާ ޒިންދާނީ ވަނީ މި ހަމަލާ ހަރުކަށި އިބާރާތުން ކުށްވެރިކުރައްވާފަ އެވެ. މިއީ ހޫތީންގެ ފިނޑި އަމަލެއް ކަމަށާއި، މިއީ އެ ޖަމާއަތުގެ ޖިނާއީ ސުލޫކު ދަމަހައްޓާކަމުގެ ހެއްކެއް ކަމަށް އޭނާ ވިދާޅުވި އެވެ. އަދި މިފަދަ ހަމަލާތަކުގެ ސަބަބުން ސަރުކާރުގެ މަސައްކަތްތަކަށް ހުރަސް ނޭޅޭނެ ކަމަށާއި، ހޫތީންނާ ދެކޮޅަށް ކުރިއަށްގެންދާ އަސްކަރީ އޮޕަރޭޝަންތައް ހުއްޓާނުލާނެ ކަމަށް ބޮޑުވަޒީރު ވިދާޅުވި އެވެ.
ޔަމަނުގެ ދާހިލީ ހަނގުރާމަ ފެށުނީ 2014 ވަނަ އަހަރު ހޫތީން އެ ގައުމުގެ ވެރިރަށް ސަންއާ ހިފުމާ ގުޅިގެންނެވެ. މި ހަނގުރާމަ އިތުރަށް ވަރުގަދަވީ 2015 ވަނަ އަހަރު ސައުދީ އިސްވެ އޮންނަ އަރަބި ގައުމުތަކުގެ ކޯލިޝަނުން ޔަމަނުގެ ސަރުކާރު އިއާދަކުރުމަށް ހަނގުރާމައިގެ ތެރެއަށް ވަނުމުންނެވެ.
މިދިޔަ ޖުލައި މަހުން ފެށިގެން ހަނގުރާމަ އަލުން ވަރުގަދަވެފައިވާއިރު، މިދިޔަ އޮގަސްޓް މަހުގެ ހަވަނަ ދުވަހުން ފެށިގެން މިހާތަނަށް 1282 މީހުން މަރުވެފައިވާ ކަމަށް ރަސްމީ ހިސާބުތަކުން ދައްކަ އެވެ. އދ. އިން ހާމަކުރި ގޮތުގައި މި ހަނގުރާމައިގެ ސަބަބުން ދެލައްކައަށްވުރެ ގިނަ މީހުން ގެދޮރު ދޫކޮށް ގޮސްފައިވާއިރު، ގައުމުގެ ސިއްހީ ހާލަތު ގޯސްވެ ކޮލެރާ ފަދަ ބަލިތައް ދަނީ ފެތުރެމުންނެވެ.
