ޔޫކްރޭނުން ބޭނުންކުރާ ބައެއް ހަތިޔާރުތަކުގެ ދުވެއްޔާއި، ސްޕޭސް އެކްސްގެ ސްޓާލިންކް އިންޓަނެޓް ނެޓްވޯކާ އެ ހަތިޔާރުތައް ގުޅިފައި ހުންނަ މިންވަރަށް ގެނެސްފައިވާ ހުރަސްތަކުގެ ފަހަތުގައި އޮތީ އެމެރިކާ ސަރުކާރު ކަމަށް ބެލެވޭ ކަމަށް އެލޮން މަސްކް ބުނެފި އެވެ.
ސްޓާލިންކަކީ ރަޝިޔާގެ އަމާޒުތަކަށް ޑްރޯން ހަމަލާތައް ފޮނުވުމަށާއި ޔޫކްރޭނުގެ ވައިގެ ސަރަހައްދު ދިފާއުކުރުމަށް ވަރަށް މުހިންމު ވަސީލަތެކެވެ. ނަމަވެސް، އަންގާރަ ދުވަހުގެ ރޭ ކުއްލި ގޮތަކަށް އިންޓަނެޓްގެ ދުވެއްޔަށް ގެނައި ބަދަލުތަކުގެ ސަބަބުން ހަނގުރާމައިގެ މައިދާނުގައި ކުރިއަށްގެންދާ މިޝަންތަކަށް ބުރޫއަރަމުންދާ ކަމަށް ޔޫކްރޭނުން ވަނީ ބުނެފަ އެވެ.
ޔޫކްރޭނުގެ ރައީސް ވޮލޮޑިމިރް ޒެލެންސްކީގެ އެޑްވައިޒަރަކު ވިދާޅުވީ، އިންޓަނެޓްގެ ދުވެއްޔަށް މިފަދަ ހުރަސްތަކެއް ކުރިމަތިވުމަކީ އިއްތިފާގެއް ކަމަށް ގަބޫލުނުކުރެވޭ ކަމަށާއި، މިއީ ޔޫކްރެއިނާއި އެމެރިކާއާ ދެމެދު މިހާރު އުފެދިފައިވާ ނުތަނަވަސްކަމާ ގުޅުން ހުރި ކަމެއް ކަމަށް ބެލެވޭ ކަމަށެވެ.
މަސްކް ބުނި ގޮތުގައި ސްޓާލިންކްގެ ދަށުން ހިންގާ އަސްކަރީ ބޭނުންތަކަށް ޚާއްސަ "ސްޓާޝީލްޑް" ޚިދުމަތް ކޮންޓްރޯލް ކުރަނީ އެމެރިކާ ސަރުކާރުންނެވެ. އަދި އިންޓަނެޓްގެ ދުވެއްޔަށް ނުވަތަ އެ ޚިދުމަތް ބޭނުންކުރެވޭނެ މިންވަރަށް ބަދަލު ގެނައުމުގެ ނިންމުންތައް ނިންމަނީ އެމެރިކާގެ އަސްކަރިއްޔާއިންނާއި އެންމެ ފަހު މަރުހަލާގައި އެމެރިކާގެ ރައީސް ކަމަށް ވެސް މަސްކް ބުންޏެވެ.
އެކްސްގައި ކުރި ޕޯސްޓެއްގައި މަސްކް މިހެން ބުނީ، އިންޓަނެޓްގެ ޚިދުމަތް އަލުން އިއާދަކޮށްދިނުމަށް އެދި ޔޫކްރޭނުގެ އޮފިޝަލުންނާއި ރައީސް ޒެލެންސްކީ ކުރެއްވި އިލްތިމާސްތަކަށް ޖަވާބު ދެއްވަމުންނެވެ. އިނގިރޭސި މީޑިއާއަކަށް ދެއްވި އިންޓަވިއުއެއްގައި ޒެލެންސްކީ ވިދާޅުވީ، މިއީ އޮޅުމަކުން ނުވަތަ ފަންނީ ބޮޑު މައްސަލައެއްގެ ސަބަބުން ދިމާވި ކަމެއް ކަމަށް އުންމީދު ކުރައްވާ ކަމަށާއި، އެ ހިދުމަތް އަލުން ދިނުމަށް އެދެމުންދާ ކަމަށެވެ.
މަސްކްގެ ސްޕޭސް އެކްސް ކުންފުނީގެ ދަށުން ހިންގާ ސްޓާލިންކުން އަންގާރަ ދުވަހުގެ ރޭ އިންޓަނެޓްގެ ދުވެލި ވަނީ ގަޑިއަކު 100 މޭލަށް (160 ކިލޯމީޓަރަށް) ލިމިޓްކޮށްފަ އެވެ. މީގެ މާނައަކީ އެއަށްވުރެ ބާރަށް ދަތުރުކުރާ އެއްވެސް ހަތިޔާރަކަށް އެ ނެޓްވޯކާ ގުޅުން ބޭއްވޭނެ ގޮތެއް ނޯންނާނެ އެވެ.
ޔޫކްރޭނުގެ ކުރީގެ ޑިފެންސް މިނިސްޓަރު މިޚައިލޯ ފެޑޮރޯވް ވިދާޅުވީ، ބުދަ ދުވަހުގެ އިރުއޮއްސުނުއިރު ޚިދުމަތުގެ ބައެއް އަލުން އިއާދަކޮށްފައިވާ ކަމަށެވެ.
"ޔޫކްރޭނުގެ ދިފާއަށްޓަކައި ސްޓާޝީލްޑްގެ ދުވެއްޔަށް ގެނެސްފައިވާ ހުރަސްތައް އެއްކޮށް އުވާލުމަކީ މިހާރު ވަރަށް މުހިންމު ކަމެއް،" އެލޮން މަސްކަށް ޝުކުރު އަދާކުރައްވައި އަދި އެހީތެރިކަން ދެއްވުމަށް އެދި ފެޑޮރޯވް އެކްސްގައި ލިޔުއްވާފައިވެ އެވެ.
އޭގެ ގަޑިއެއްހާއިރު ފަހުން މަސްކް ވަނީ އެ ޕޯސްޓަށް ޖަވާބު ދެއްވައި، އޭނާގެ ކުންފުނީގެ ބައިވެރިވުމާ ގުޅޭ ގޮތުން ދިފާއުގައި ވާހަކަދައްކާފަ އެވެ.
މި މައްސަލައާ ގުޅިގެން އެމެރިކާ ސަރުކާރުން އަދި އެއްވެސް އެއްޗެއް ބުނެފައެއް ނުވެ އެވެ.
