ލަންޑަން (އޮގަސްޓް 16) - މެންޗެސްޓާ ޔުނައިޓެޑަށް ކުޅެމުން އަންނަ 19 އަހަރުގެ މިޑްފީލްޑަރު، ކޯބީ މައިނޫގެ ފަރާތުން ފެނުނު އެއް ހުނަރަކީ، ފްރާންސްގެ ލެޖެންޑަރީ ތަރި ޒިނެދިން ޒިދާންގެ ފަރާތުން ފެނިފައިވާ ދާދި އެއްގޮތް ކަމެއް ކަމަށް ޔުނައިޓެޑްގެ ކުރީގެ މިޑްފީލްޑަރު، ޕޯލް ސްކޯލްސް ބުނެފި އެވެ.
މިދިޔަ ސީޒަނުގައި މެންޗެސްޓާ ޔުނައިޓެޑްގެ ސީނިއާ ޓީމަށް ޕްރޮމޯޓްވެ، ހަ މަހެއްހާ ދުވަސްތެރޭ ދެއްކި ތަފާތު މޮޅު ކުޅުމާ އެކު، މައިނޫ ވަނީ މި ފަހަރުގެ ޔޫރޯ ފުޓްބޯޅަ މުބާރާތުގައި އިންގްލެންޑް ގައުމީ ޓީމަށް ވެސް ކުޅެފަ އެވެ.
އިންގްލެންޑުން ޔޫރޯ ފައިނަލުގައި ވާދަކުރިއިރު، ފުރަތަމަ އެގާރައިގައި ކުޅުނު، މައިނޫ ވަނީ މިދިޔަ ސީޒަނުގެ އެފްއޭ ކަޕްގެ ޗެމްޕިއަންކަން، ޔުނައިޓެޑަށް ހޯދައިދޭން ފައިނަލް މެޗުގައި ލަނޑު ވެސް ޖަހައިފަ އެވެ. އޭނާ އަކީ، މިދިޔަ 43 އަހަރު ތެރޭ އެފްއޭ ކަޕް ފައިނަލުގައި ލަނޑު ޖެހީ 20 އަހަރުން ދަށުގެ ހަމައެކަނި ކުޅުންތެރިޔާ އެވެ.
މީގެ ކުރިން ވެސް ސްކޯލްސް ވަނީ، މައިނޫ އަށް ތައުރީފުކޮށްފަ އެވެ. އެ ފަހަރު، ސްކޯލްސް ބުނީ މައިނޫގެ ކިބައިން ފެންނަ ހުނަރަކީ، އޭނާ އަށް 19 އަހަރުގައި ދެއްކުނު ކަމެއް ނޫން ކަމަށެވެ. އޭގެ ފަހުން، ސްކޯލްސް މި ވަނީ މައިނޫ އަށް ތައުރީފު ކުރުމުގެ ގޮތުން އާ ވާހަކަ ދައްކައިފަ އެވެ.
"ބޯޅަ ރިސީވް ކުރުމާއި ބޯޅަ ހިފައިގެން ކުޅުންތެރިން ތެރެއިން ދިއުން، މި ކަހަލަ ކަންކަމަށް ބަލާއިރު، މައިނޫ އަކީ، ޒިދާނާ ކިރިޔާ ހަމަކޮށްލެވޭހާ ވެސް ދާދި އެއްގޮތް ހުނަރެއް ދެއްކުނު ކުޅުންތެރިއަކީ،" ސްކޯލްސް ބުންޏެވެ.
"އަހަރެން އަޑުއެހިން ޓްރެއިނިންގައި ވެސް މައިނޫ ދާ ކަމަށް ކަސެމީރޯ ކައިިރިން ބޯޅަ ހިފަހައްޓައިގެން ހުރެފައި. ފުރަތަމަ ފަހަރަށް އަހަންނަށް މައިނޫގެ ކިބައިން މި ބުނި، ކަންކަން ފެނުނުއިރު، އަހަންނަށް ގަބޫލެއް ނުކުރެވުނު އެހާ ހަގު އުމުރުގެ ކުޅުންތެރިއަކަށް އެކަން ކުރެވިދާނެ ކަމަށް،"
މައިނޫ އާއި އޭނާއާ އަޅާކިޔުމަކީ ރަނގަޅު ކަމެއް ނޫން ކަމަށް ސްކޯލްސް ވަނީ ތަކުރާރުކޮށް ބުނެފަ އެވެ.
އުމުރުން 19 އަހަރުގައި ސްކޯލްސް އަށް ޔުނައިޓެޑް ޓީމަށް ޖަހައިދެވުނީ، ތިން ގޯލެވެ. މައިނޫ ވަނީ މިހާތަނަށް ޔުނައިޓެޑަށް ކުޅެދިން 36 މެޗުން ފަސް ގޯލު ޖަހައިފަ އެވެ.
