އަރަބިއްޔާ ސްކޫލުގެ އާ އިމާރާތް އެޅުމުގެ މަޝްރޫއު ފެށި ކަމަށް ސަރުކާރުން ބުނިއިރު، ސްކޫލް އަޅަން ތައްޔާރުވަމުންދާ ބިން އޮތީ މާލެ ސިޓީ ކައުންސިލުގެ ނަމުގައި ކަން ހާމަވެއްޖެ އެވެ.
އަރަބިއްޔާ ސްކޫލް އިމާރާތް ކުރަން ނިންމާފައިވާ ކުރީގެ ކުނި ކޮށި ހުރި ބިމަކީ ސިޓީ ކައުންސިލުގެ ބިމެއްކަން ހާމަވީ މިިދިޔަ ބުރާސްފަތި ދުވަހު އޮތް ސިޓީ ކައުންސިލުގެ ރަސްމީ އާންމު ޖަލްސާގައި އެ ބިން އެޑިއުކޭޝަން މިނިސްޓަރީއާ ހަވާލު ކުރަން ފާސް ކުރުމުންނެވެ.
އެ ބައްދަލުވުމުގައި މާލެ ސިޓީ ކައުންސިލުގެ މޭޔަރު، އާދަމް އާޒިމް ވިދާޅުވީ އަރަބިއްޔާގެ އާ ސްކޫލު އިމާރާތް ކުރަން މި ސަރުކާރުން ނިންމާފައިވާ ބިން ހަވާލު ކޮށްދިނުމަށް އެދި މިދިޔަ ޖެނުއަރީ މަހު މިނިސްޓަރީ އޮފް އެޑިއުކޭޝަނުން އެދިފައިވާ ކަމަށެވެ.
"އަރަބިއްޔާ ސްކޫލުގެ އާ އިމާރާތް ކުރުމުގެ މަސައްކަތާއި ޖަމާލުއްދީން ސްކޫލުގެ ޖާގަ އިތުރު ކުރުމުގެ މަސައްކަތް ބާ ޖަމާލުއްދީން ހުރި ބިމުން، ޖަމާލުއްދީން ސްކޫލުގެ ޖާގަ އިތުރު ކޮށްދިނުމަށް ބޭނުންވާ ބިމުގެ ރެޖިސްޓަރީ އަދި މާލޭގެ 381 [ނަންބަރު] ކޮށީގެ ބިމުގައި އަރަބިއްޔާ ސްކޫލު އިމާރާތްް އެޅުމަށް ހަމަޖެހިފައިވާ ބިމުގެ ރެޖިސްޓަރީ ހަވާލުކޮށްދިނުމަށް އެދިފައިވާތީ އެކަމާ މެދު މަޝްވަރާކޮށް ގޮތެއް ނިންމަން،" އަރަބިއްޔާ ސްކޫލު އަޅަން ނިންމާފައިވާ ބިން މިނިސްޓަރީ އާ ހަވާލު ކުރުމާ މެދު ގޮތެއް ނިންމުމަށް ހުށަހަޅަމުން އާޒިމް ވިދާޅުވި އެވެ.
ނަމަވެސް އަރަބިއްޔާ ސްކޫލްގެ އާ އިމާރާތް އެޅުމުގެ މަޝްރޫއު ފެށި ކަމަށް ބުނެ މިއަހަރުގެ ފެބްރުއަރީ 24، ގައި މާލޭގެ 381 ނަންބަރު ކޮށީގައި އެ ސްކޫލް އިމާރާތް ކުރުމާ ގުޅޭ ދެ ބޯޑެއް ޖެހި އެވެ. އެކަން ކުރީ އެ ބިން އަރަބިއްޔާއަށް ހަމަޖެއްސި ކަމަށް ބުނެ ރައީސް އޮފީހުން ނޮވެމްބަރު 21، 2023 ގައި ނޫސް ބަޔާނެއް ނެރުމުންނެވެ.
އަރަބިއްޔާ ސްކޫލުގެ އާ އިމާރާތް ބިނާ ކުރުމުގެ މަސައްކަތް ފެށުމަކީ ރައީސް މުއިއްޒު ހަފުތާ 14 ގެ މަގުޗާޓުގައި ހިމަނާފައި އޮތް ކަމެކެވެ. ފެބްރުއަރީ 24 އަކީ ހަފުތާ 14 ގެ އެންމެ ފަހު ދުވަހެވެ.
އެ ބިން ސާފުކޮށް އެތަނުގައި ދެ ބޯޑު ޖެހުން ފިޔަވައި މިއަދާ ހަމައަށް ވެސް އަރަބިއްޔާ ސްކޫލުގެ އާ އިމާރާތުގެ އެއްވެސް މަސައްކަތެއް ފަށާފައެއް ނުވެ އެވެ. މަސައްކަތް ނުފެށި ލަސްވާ ސަބަބަކީ އެ ބިމުގައި އިމާރާތް ކުރަން ދަތިވުމުގެ އިތުރުން އަރަބިއްޔާ ސްކޫލުގެ މުޅި ޑިޒައިން ކޮންސެޕްޓު ބަދަލު ކޮށްފައިވުން ކަމަށް އެޑިއުކޭޝަން މިނިސްޓަރު މީގެ ކުރިން ބުނެފައިވެ އެވެ.
ބުރާސްފަތު ދުވަހުގެ އޮތް ސިޓީ ކައުންސިލުގެ ބައްދަލުވުމުގައި މޭޔަރު އާޒިމް ވިދާޅުވީ އަރަބިއްޔާ ސްކޫލުގެ އާ އިމާރާތް އެޅުމުގެ މަސައްކަތް ފެށޭނީ އެ ބިން މިނިސްޓަރީއާ ހަވާލު ކޮށްދިނުމުން ކަމަށެވެ.
"އަރަބިއްޔާ ސްކޫލް އެޅުމަށް އެދިފައި ވަނީ ކުނި ކޮށި ހުރި ބިން އަސްލުގައި، އެ ބިން ހަވާލު ކުރީމާ މަސައްކަތް ފެށެން މި އަންނަނީ، އެހެންވީމާ އަޅުގަނޑު އެދެން އަރަބިއްޔާ ސްކޫލު އެޅުމަށްޓަކައި މި ބިން އެލޮކޭޓު ކޮށްދެއްވަން އެޑިއުކޭޝަން މިނިސްޓަރީއަށް،" އާޒިމް ވިދާޅުވި އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އަރަބިއްޔާ ސްކޫލު އިމާރާތް އަޅަން ކަނޑައަޅާފައި އޮތީ ބާ ޖަމާލުއްދީން ހުރި ބިމުގަ އެވެ. އެކަމަށްޓަކައި އެތަނުގައި ހުރި އިމާރާތް ތަޅައި، ބިން ސާފުކޮށް އިމާރާތް ޑިޒައިންކޮށް ބަޔަކާއެކު އެތަން އިމާރާތް ކުރުމުގެ އެއްބަސްވުން ހެދި އެވެ.
ނަމަވެސް ކުރިން ކުނިކޮށި ހުރި ކޮށީގައި އަރަބިއްޔާ ސްކޫލުގެ އާ އިމާރާތް ބިނާ ކުރަން ނިންމީ މި ސަރުކާރުންނެވެ.
