މާލެ ސިޓީއަށް އިއްޔެ ބޯކޮށް ވާރޭވެހި ފެންބޮޑުވުމުގެ ސަބަބުން، ފަސް އާއިލާއަކުން 23 މީހުން ވަގުތީ ހިޔާއަށް ބަދަލުކޮށްފި އެވެ.
ނެޝަނަލް ޑިޒާސްޓާ މެނޭޖްމަންޓް "އެންޑީއެމްއޭ" އިން ބުނީ މިއަދު 10:30 އާ ހަމައަށް އެހީއަށް އެދި 256 ކޯލު ލިބުނު ކަމަށާއި ފެންބޮޑުވެގެން ހާލުގައި ޖެހުނު ފަސް އާއިލާއެއްގެ 23 މީހުން ވަގުތީ ހިޔާއަށް މިހާތަނަށް ބަދަލު ކުރެވިފައިވާ ކަމަށެވެ.
"ގެތަކަށް ފެން ނުވަންނާނެ ގޮތަށް 248 ވެލި ބަސްތާ ވަނީ ޖެހިފައި. ނަރުދަމާ މައްސަލަ ޖެހުނު 12 ގެއަކަށް އެޓެންޑް ވެވުނު. އެހީތެރިކަމަށް އެދި 256 ކޯލު ލިބުނު،" އެންޑީއެމްއޭ އިން ބުންޏެވެ.
ރާއްޖޭގައި ހުޅަނގު މޫސުމުގެ ބާރުގަދަވެ ކުރަމުންދާ ވިއްސާރައިގައި ފާއިތުވެދިޔަ 24 ގަޑިއިރު އެންމެ ބޯކޮށް ވާރޭވެހުނީ މާލެއަށެވެ. އެއީ 89.4 މިލިމީޓަރުގެ ވާރޭ އެވެ.
ގަޑިއަކު 25 މޭލާއި 30 މޭލާ ދެމެދުގެ ބާރު މިނުގައި ވައި ޖެހި ވިލާގަނޑުގައި 50 މޭލަށް ވައި ގަދަވާނެ ކަމަށް ލަފާކޮށް މިއަދު މެންދުރު 2:00 ޖެހުމާ ހަމައަށް ހއ. އަތޮޅުން ފެށިގެން އދ. އަތޮޅަށް މެޓް އޮފީހުން ވަނީ ޔެލޯ އެލާޓް ނެރެފަ އެވެ.
އޭގެއިތުރުން އެ އަތޮޅުތަކަށް ކަނޑު ވެސް ވަރަށް ގަދަވާނެ ކަމަށް މެޓް އިން ވަނީ ލަފާކޮށްފަ އެވެ.
