މޯލްޑިވްސް އިސްލާމިކް ބޭންކް (އެމްއައިބީ) މާދަމާ ވެސް ހުޅުވައި، އާންމުކޮށް ދޭ ހުރިހާ ހިދުމަތެއް ލިބޭނެ ކަމަށް އެ ބޭންކުން ބުނެފި އެވެ.
އެމްއައިބީގެ މީޑިއާ މެނޭޖާ އަހުސަން ޖަމީލް ވިދާޅުވީ މާދަމާ ސަރުކާރު ބަންދުވި ނަމަވެސް އެ ބޭންކް ހުޅުވައި، ހުރިހާ ހިދުމަތެއް ދިނުމަށް ނިންމާފައިވާ ކަމަށެވެ.
"ސަރުކާރު ބަންދުވިޔަސް އެމްއައިބީ މާދަމާ ހުޅުވާ ގޮތަށް ނިންމާފައި އޮތީ. ހުރިހާ ހިދުމަތެއް ކުރިއެކޭ ވެސް އެއްގޮތަށް ލިބޭނެ،" އަހުސަން ވިދާޅުވި އެވެ.
ރާއްޖެއަށް ކުރަމުންދާ ވިއްސާރައާ ގުޅިގެން ސަރުކާރު އޮފީސްތަކާއި ސްކޫލްތައް މާދަމާ ބަންދު ކުރަން ނިންމާފައިވާކަން ވަނީ އިއުލާން ކޮށްފަ އެވެ.
އެންމެ ބްރާންޗަކާއެކު ހިދުމަތް ފެށި އެމްއައިބީގެ 10 ބްރާންޗަކުން މިހާރު ރާއްޖޭގެ އެކި ކަންކޮޅުގައި ހިދުމަތް ދެމުންނެވެ. އަދި 40 އާ ގާތްކުރާ ސެލްފް ސާވިސް މެޝިންތަކުން އެ ބޭންކުން ދަނީ ހިދުމަތް ދެމުންނެވެ.
މީގެ އިތުރުން އެމްއައިބީން ދެމުން ގެންދާ ގިނަ ހިދުމަތްތައް އެ ބޭންކުން ޑިޖިޓަލްކޮށް، ހިދުމަތްތައް ދަނީ ފުޅާކުރަމުންނެވެ. އަދި ކުރިއަށް އޮތްތަނުގައި ހިދުމަތަށް ގެންނާނެ ބަދަލުތައް ވެސް އެ ބޭންކުން ދަނީ ހާމަކުރަމުންނެވެ.
އެގޮތުން ރާއްޖޭގެ ކޮންމެ ކަންކޮޅަކުން ވެސް މިހާރު އެމްއައިބީގެ އެކައުންޓް ވަގުތުން ހުޅުވެ އެވެ. އޭގެ ތެރޭގައި ޕާސަނަލް އަދި ބިޒްނަސް އެކައުންޓު ވެސް ހިމެނެ އެވެ.
