ނޫމަޑި ރިސޯޓްސް އެންޑް ރެސިޑެންސް ކުންފުންޏާ އެކު ހެދި އެއްބަސްވުން ސަރުކާރުން ބާތިލްކުރި މައްސަލަ އެ ކުންފުނިން ނެދަލޭންޑްސްގައިި ހުންނަ އާބިޓްރޭޝަނަށް ވެއްދި މައްސަލާގައި ރައީސް ޑރ. މުހައްމަދު މުއިއްޒު ދެއްވި ބަޔާން ބަދަލުކުރި ސަބަބު ހާމަކުރަން ޖެހޭނެ ކަމަށް ކުރީގެ ތިމާވެއްޓާ ބެހޭ މިނިސްޓަރު އައިމިނަތު ޝައުނާ ވިދާޅުވެއްޖެ އެވެ.
"ހަވަރު ބެރުގެ" ނަމުގައި އެމްޑީޕީން ރޭ ބޭއްވި ޕެނަލް ޑިސްކަޝަންގައި ޝައުނާ ވިދާޅުވީ ރައްޔިތުންގެ މަޖިލީހުގެ މާލިއްޔަތު ކޮމިޓީގައި 2019 ގައި ރައީސް މުއިއްޒު ދެއްކެވި ވާހަކަފުޅާ ގުޅިގެން އެމަނިކުފާނުގެ "އިންޓަގްރިޓީ" އާ މެދު ސުވާލު އުފެދޭ ކަމަށެވެ. ބަޔާން ބަދަލު ކުރެއްވުމަށްފަހު އެކަން ކުރެއްވި ސަބަބު ހާމަ ނުކުރައްވާތީ ވެސް ޝައުނާ ފާޑުވިދާޅުވި އެވެ.
"މިއަދު އަޅުގަނޑުމެންގެ ރައީސުލްޖުމްހޫރިއްޔާގެ މަގާމުގައި އެ ހުންނެވީ އެ ކޮމިޓީގައި ހާޒިރުވެވަޑައިގެން ވާހަކަ ދެއްކެވި ބޭފުޅާ. ރައީސުލްޖުމްހޫރިއްޔާގެ އިންޓަގްރިޓީއާމެދު އަޅުގަނޑަށް ސުވާލު އުފެދޭ. މިއީ ވަރަށް ބޮޑު މައްސަލައެއް. ތެދުވެރިކަމާއި އަދުލުވެރިކަމާއި އިންޓަގްރިޓީ ފަދަ ސިފަތަކަކީ ރައީސުލްޖުމްހޫރިއްޔާގެ ހުރިހާ ކަމެއްގެ ވެސް މަތީގައި އޮންނަން ޖެހޭނެ ސިފަތަކެއް،" ޝައުނާ ވިދާޅުވި އެވެ.
ކޮމިޓީގައި އޭރު ރައީސް މުއިއްޒު ވިދާޅުވީ އާބިޓްރޭޝަނަށް އެމަނިކުފާނުގެ ފަރާތުން ބަޔާން ހުށަހެޅުއްވީ ކޮން ބޭފުޅެއް ކަން އެނގިވަޑައިނުގަންނަވާ ކަަމަށާއި ނަމަވެސް އެ ކޮމިޓީގައި މެންބަރުން އޭރު ވިދާޅުވީ ރައީސް އިތުރުފުޅު ހެއްދެވި ކަމަށެވެ.
މި މައްސަލަ ރައްޔިތުންގެ މަޖިލީހަށް އަލުން ބެލިދާނެކަން ފާހަގަކުރައްވާ ޕެނަލްގައި ވާހަކަ ދައްކަވަމުން ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވީ ރައީސް މުއިއްޒުއަކީ ދެއިރު ދެގޮތަށް އަބަދުވެސް ވާހަކަ ދައްކަވާ ބޭފުޅެއް ކަމަށާއި ނަމަވެސް މަޖިލީހުން އެކަން ކޮށްފާނެ ކަމާމެދު ސުވާލު އުފެދޭ ކަމަށެވެ.
ރައީސް މުއިއްޒުގެ ހައުސިން މިނިސްޓަރުކަމުގައި ހައުސިން ޔުނިޓުތަކެއް ހެދުމަށް ނޫމަޑި ކުންފުނިން ސަރުކާރުން ހެދި އެއްބަސްވުން ބާތިލުކުރުމުން، އެ ކުންފުނިން ނެދަލޭންޑްސްގެ އާބިޓްރޭޝަންނަށް ހުށަހެޅީ ގެއްލުމުގެ ބަދަލުގެ ގޮތުގައި 155 މިލިއަން ޑޮލަރު ހޯދުމަށެވެ.
އެއާއެކު ކުރީގެ ރައީސް ޑރ. މުހައްމަދު ވަހީދު ހަސަން މަނިކު އާއި ކުރީގެ ރައީސް އަބްދުﷲ ޔާމީންގެ ވެރިކަމުގައި، ނުހައްގުން ބާތިލުކުރި ވިޔަފާރި އެއްބަސްވުންތަކާ ގުޅިގެން ނޫމަޑިއަށް ގެއްލުމުގެ ބަދަލުގެ ގޮތުގައި 55 މިލިއަން ޑޮލަރު (848 މިލިއަން ރުފިޔާ) ދޭން ޖެހުނެވެ.
ނޫމަޑި މައްސަލައިގައި ބޮޑު ބަދަލެއް ދޭން ޖެހުމުން އެ މައްސަލަ ރައްޔިތުންގެ މަޖިލީހުން ވެސް ބެލި އެވެ. އަދި ރައީސް މުއިއްޒާ ދެކޮޅަށް ދޮގު ހެކި ދިން ކަމަށް ދައުވާ ވެސް އުފުލި އެވެ. ނަމަވެސް އެ މައްސަލަ ރައީސް މައްޗަށް ސާބިތެއް ނުވި އެވެ.
