ބާސެލޯނާ (އޮގަސްޓް 12) - ބާސެލޯނާ އަށް ކުޅެމުން އަންނަ ފުލްބެކް، ސާޖީ ރޮބާޓޯ، 14 އަހަރަށް ފަހު އެ ކްލަބް ދޫކޮށްލައިފި އެވެ.
ރޮބާޓޯ، 32، ބާސެލޯނާއާ ގުޅުނީ އެ ކްލަބްގެ ލަ މާސިއާ އެކެޑަމީ އަށެވެ. އެއީ، ރޮބާޓޯގެ އުމުރުން 14 އަހަރުގަ އެވެ. އޭނާ ފުރަތަމަ ފަހަރަށް ބާސެލޯނާގެ ސީނިއާ ޓީމަށް ކުޅެފައިވަނީ، 2010 ވަނަ އަހަރެވެ.
ގިނަ ކޯޗުންތަކެއްގެ އިރުޝާދުގެ ދަށުން ބާސެލޯނާ އަށް ކުޅުމުގެ ފުރުސަތު ލިބުނު ރޮބާޓޯ، ވަނީ އެ ޓީމަށް 373 މެޗު ކުޅެދީފަ އެވެ. އެ މެޗުތަކުގައި ޖުމްލަ 19 ގޯލު ޖެހިއިރު، އެންމެ މަޝްހޫރު ގޯލަކީ، 2016-2017 ވަނަ އަހަރުގެ ޗެމްޕިއަންސް ލީގުގެ ގަދަ 16 ބުރުގައި ޕީއެސްޖީ ކޮޅަށް ފަހު ސިކުންތުގައި ޖެހި ގޯލެވެ.
އެންމެ ފަހުން ކުޅުނު ސީޒަނުގައި ބާސެލޯނާގެ ކެޕްޓަންކަން ކުރީ ވެސް ރޮބާޓޯ އެވެ. މިދިޔަ ސީޒަނުގައި ބާސެލޯނާގެ ކޯޗަކަށް ހުރި ޒަވީ ހެނާންޑޭޒް ވަނީ، ރޮބާޓޯ އަކީ އެ ކްލަބްގެ އަރަމުން އަންނަ ކުޅުންތެރިންނަށް ރޯލް މޮޑެލެއް ކަމަށް ބުނެފަ އެވެ.
ބާސެލޯނާގެ ސީނިއާ ޓީމުގައި 14 އަހަރު ހޭދަކުރި ރޮބާޓޯ ވަނީ އެ ޓީމާ އެކު، ދެ ޗެމްޕިއަންސް ލީގާއި ހަތް ސްޕެނިޝް ލީގު ތަށްޓާއި ހަ ކޮޕަ ޑެލް ރޭ ތަށީގެ އިތުރުން ދެ ކްލަބް ވޯލްޑް ކަޕް އެވެ.
ރޮބާޓޯ އަށް ވަނީ ސްޕެއިން ގައުމީ ޓީމަށް ކުޅުމުގެ ފުރުސަތު ވެސް ލިބިފަ އެވެ. ޖުމްލަ 11 މެޗު ސްޕެއިން ޓީމަށް ކުޅެދިން ރޮބާޓޯ އެ ޓީމަށް އެންމެ ފަހުން ކުޅުނީ، 2021 ވަނަ އަހަރު އެވެ.
