ކުޅިވަރު ގާނޫނު އިސްލާހު ކުރެވިގެންދާއިރު، ސްޕޯޓްސް އާބިޓްރޭޝަންގެ (ކުޅިވަރުގައި ޖެހޭ މައްސަލަތައް ހައްލުކުރާ ޕެނަލްގެ) ކަންކަން އަންނާނީ ބައިނަލްއަގުވާމީ އެ ފަދަ ޖަމިއްޔާތަކުގެ އުސޫލުތަކާ ގުޅޭގޮތަށް ކަމަށް ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.
މިދިޔަ މަހު 17 ވަނަ ދުވަހު ރައްޔިތުންގެ މަޖިލީހު ޖަލްސާ އަށް ހާޒިރުވެ، ސްޕޯޓްސް މިނިސްޓަރު، ރާފިއު ވަނީ ދެ ދުވަހެއްގެ ތެރޭގައި ކުޅިވަރު ގާނޫނަށް ގެންނަ އިސްލާހުގެ ކަންކަމާ ގުޅޭ ކަރުދާސް އެޓާނީ ޖެނެރަލް އޮފީހަށް ފޮނުވާނެ ކަމަށް ވިދާޅުވެފަ އެވެ.
އެ ދުވަހު، މަޖިލީހުގައި، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ސުވާލު ކުރެއްވީ ކުޅިވަރު ގާނޫނުގައި ވެސް ކުޅިވަރު އާބިޓްރޭޝަނެއް އުފެއްދުމަށް އޮތް ނަމަވެސް އެކަން ކޮށްފައި ނުވާތީ ސަބަބު އޮޅުންފިލުއްވުމަށެވެ.
ޖަވާބުގައި، މިނިސްޓަރު ރާފިއު ވިދާޅުވީ، ކުޅިވަރު ގާނޫނަށް ގެނެވޭ އިސްލާހުގެ ތެރެއިން، އާބިޓްރޭޝަން އުފެއްދުމުގެ ކަންކަން ކުރެވިގެންދާނެ ކަމަށެެވެ.
ރައީސް އަބްދުﷲ ޔާމީނުގެ ސަރުކާރުގެ މެޖޯރިޓީ އޮވެގެން 2015 ވަނަ އަހަރު ފާސްކުރި ކުޅިވަރު ގާނޫނުގައި ވެސް ސްޕޯޓްސް އާބިޓްރޭޝަނެއް އަންނަން ޖެހޭ ކަމަށް ހިމަނާފައިވެ އެވެ. އޭގެ ފަހުން، މިވީ މުއްދަތުގައި އެކަން ކުރުމަށް އެސޯސިއޭޝަންތަކާއި ކުޅިވަރާ ބެހޭ ވުޒާރާއިން ގިނަ މަޝްވަރާތަކެއް ކޮށްފަ އެވެ. އެހެން ނަމަވެސް އަމަލީ ސިފައެއްގައި އޭގެ ކަންކަން އަދިވެސް އޮތީ ނުކުރެވި އެވެ. ކުޅިވަރުގެ މާހައުލުގައި ޖެހޭ މައްސަލަތައް އިތުރުވެ، ހައްލުކުރެވޭނެ މަގު އޮތީ ހަނިވެފަ އެވެ.
އެ ގޮތުން، އެޓާނީ ޖެނެރަލް އޮފީހަށް، މިހާރު ފޮނުވާފައިވާ ކުޅިވަރު ގާނޫނުގެ އިސްލާހުގެ ޑްރާފްޓާ ގުޅޭގޮތުން، "އަދަދު ސްޕޯޓްސް" އަށް މިނިސްޓަރު ރާފިއު ދެއްވި އިންޓަވިއުގައި ވިދާޅުވީ، އިސްލާހު ކުރެވޭ ކުޅިވަރު ގާނޫނުގެ ތެރެއިން، ސްޕޯޓްސް އާބިޓްރޭޝަން އަންނާނެ ކަމަށާއި އެކަން ކުރިއަށްދާނީ ބައިނަލްއަގުވާމީ އެ ފަދަ ޖަމިއްޔާތަކާ ގުޅިގެން ކަމަށެވެ.
"މި ގާނޫނުގެ ދަށުން ދިވެހިރާއްޖޭގައި ވާދަވެރި ގޮތެއްގައި ކުޅެވޭ އެންމެހާ ކުޅިވަރުތަކެއްގެ ނޫނީ ފެޑެރޭޝަން ނޫނީ ގައުމީ ކުޅިވަރު އެސޯސިއޭޝަންތައް ނޫނީ ކްލަބް ނޫނީ އެކެޑަމީތަކުގެ މެމްބަރުންގެ މެދުގައި ނުވަތަ ކުޅުންތެރިންގެ ދޭތެރޭގައި ނުވަތަ ކުޅިވަރުގައި ހިމެނޭ އޮފިޝަލުންނާ ދޭތެރޭ އުފެދޭ ދެބަސްވުންތައް ހައްލުކުރުމަށް ސްޕޯޓްސް އާބިޓްރޭޝަން ބޯޑެއް އޮންނަން ވާނެ ކަމަށް،" ކުޅިވަރު ޑްރާފްޓްގައި ހިމަނާފައިވެ އެވެ.
އާބިޓްރޭޝަން ބޯޑުގެ މަގްސަދަކީ ޝަރީއަތުގެ މަރުހަލާގެ ބަދަލުގައި ގާނޫނު ހުއްދަކުރާ އަދި ގާނޫނުން ބާރު ލިބޭ ސްޕޯޓްސް އާބިޓްރޭޝަން ބޭނުންކޮށްގެން ކުޅިވަރުގެ މައްސަލަތައް ހައްލުކުރަން މަގުފަހިކޮށްދިނުމެވެ.
"ބޯޑުގައި ތިން މެމްބަރުންގެ މައްޗަށް. މެމްބަރުން އައްޔަންކުރާނީ ކުޅިވަރާ ބެހޭ ގައުމީ މަޖިލީހުގެ ލަފާގެ މަތިން ކުޅިވަރާ ބެހޭ ވަޒީރު. މި ގާނޫނާ އެއްގޮތްވާ ގޮތުގެ މަތިން އާބިޓްރޭޝަން ބޯޑު ހިންގުމަށް ބޭނުންވާނެ ހުރިހާ ގަވާއިދެއް ހަދާނީ ކުޅިވަރާ ބެހޭ ގައުމީ މަޖިލީހުން،" ރާފިއު ވިދާޅުވި އެވެ.
މިނިސްޓަރު ވިދާޅުވީ، ސްޕޯޓްސް އާބިޓްރޭޝަނެއް އައި ކަމުގައި ވިޔަސް މީގެ އެންމެ މުހިންމު ކަންކަން ގުޅިފައި އޮތީ އެސޯސިއޭޝަނަށް ކަމަށެވެ. އެ ގޮތުން، ރާއްޖޭގެ ކުޅިވަރު ގާނޫނުގެ ބާރު ނެގެހެއްޓޭ ގޮތަށް، ބައިނަލްއަގުވާމީ ޖަމިއްޔާތަކުން ކަނޑައަޅާ މިންގަނޑުގެ ތެެރެއިން، ކުޅިވަރު އެސޯސިއޭޝަންތަކުގެ ހިންގާ ގަވާއިދު ބައްޓަން ކުރަން ޖެހޭނެ ކަމަށް މިނިސްޓަރު ވިދާޅުވި އެވެ.
"އާބިޓްރޭޝަން ހިނގާނީ އިންޓަނޭޝަނަލް ބޮޑީ އަކާ އެފިލިއޭޓްވެގެން، ސްޓޭންޑަންޑްކޮށް ކޮސްޓް މެނޭޖްކުރެވޭ ގޮތަށް ހިނގާނީ،" ރާފިއު ވިދާޅުވި އެވެ.
އާބިޓްރޭޝަން ބޯޑުގެ މެމްބަރުން ނެގުމުގައި ކުޅިވަރު ގައުމީ މަޖިލީހުގެ ލަފާ ވަރަށް ބޮޑު ދައުރެއް އަދާކުރާނެ ކަމަށާއި ނަގާނެ މެމްބަރުންގެ ކަންކަން ބަލާއިރު، ކުޅިވަރުގައި ޖުމްލަކޮށް ދިމާވާ މައްސަލަތައް ބެލޭނެ ފަދަ ގާބިލު މެމްބަރުން ނެގޭނެ ފަދަ އުސޫލެއް އިންޓަނޭޝަނަލީ ގަބޫލުކުރާ މިންގަނޑެއްގެ ތެރެއިން ތައްޔާރުކުރާނެ ކަމަށް ރާފިއު ވިދާޅުވި އެވެ.
