މި ފެންނަނީ ކުރީގެ ރައީސް އިބްރާހިމް މުހައްމަދު ސޯލިހުގެ ދުރުވިސްނުމާއެކު ގަސްތައް ހެދި ފޯދި، މޭވާ އަޅަމުންދާ މަންޒަރު ކަމަށް އެމްޑީޕީގެ ރައީސް އަބްދުﷲ ޝާހިދު ރޭ ވިދާޅުވެއްޖެ އެވެ.
އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރުއާ ބައްދަލު ކުރެއްވުމަށްފަހު "އަދަދު" އާ ވާހަކަ ދައްކަވަމުން ޝާހިދު ވިދާޅުވީ އެ ބައްދަލުކުރެއްވުމުގައި ސޯލިހުގެ ސަރުކާރުގައި ސޮއިކޮށް ތަންފީޒުކުރި މަޝްރޫއުތައް އިފްތިތާހު ކުރެއްވީތީ ޝުކުރު އަދާކުރެއްވި ކަމަށެވެ.
"ޖައިޝަންކަރު އައްޑޫއަށް ވަޑައިގެން ރައީސް ސޯލިހުގެ މޭސްތިރިކަމުގެ ދަށުގައި މުޅީ އައްޑޫގެ ތަރައްގީއަށް ފެށިފައި ހުރި ބޮޑެތި ޕްރޮޖެކްޓުތަކުގެ ތެރެއިން އައްޑޫގެ ބިން ހިއްކުމުގެ މަޝްރޫއާއި ހަމައެއާއެކު ހަންކެޑެ މަޝްރޫއު އިފްތިތާހުވެގެންދާނެ. ފެންނަމުން މި ދަނީ ރައީސް ސޯލިހުގެ ދުރު ވިސްނުންފުޅާއެކު ގަސްތަކުން ހެދިފޯދި މޭވާ އަޅަމުންދާތަން ކަމަށް އެމްޑީޕީ ދެކޭ،" ޝާހިދު ވިދާޅުވެއްޖެ އެވެ.
ސޯލިހުގެ ސަރުކާރުގައި އިންޑިއާގެ އެހީގައި ފަށައި ނިންމި ރާއްޖޭގެ 28 ރަށެއްގައި ފެނާއި ނަރުދަމާގެ މަޝްރޫއު އިފްތިތާހުކޮށްދެއްވީތީ ޖައިޝަންކަރަށް ޝުކުރު އަދާކުރެއްވި ކަމަށާއި އެ މަޝްރޫއުތަކަކީ ރާއްޖޭގެ ރައްޔިތުން ގައިންތާހިރުވުމަށް ހިންގުނު މަޝްރޫއުތަކެއް ކަމަށް ޝާހިދު ވިދާޅުވި އެވެ.
ޖައިޝަންކަރުގެ ދަތުރުގައި ރާއްޖެއާއެކު ސޮއިކުރެވުނު 1،000 ސިވިލް ސާވަންޓުން ތަމްރީން ކުރުމުގެ ޕްރޮގްރާމް އާ ކުރުމުގެ އެމްއޯޔޫއަށް ޝުކުރު އަދާކުރައްވައި ޝާހިދު ވިދާޅުވީ ސޯލިހުގެ ސަރުކާރުގައި ފެށި އެ ޕްރޮގްރާމުގެ ދަށުން 1،000 މުވައްޒަފުން މިދިޔަ ފަސް އަހަރު ތަމްރީން ކުރެވުނު ކަމަށެވެ.
މީގެ އިތުރުން ޝާހިދު ވިދާޅުވީ ރުޕޭ ކާޑުގެ ބޭނުން ރާއްޖޭގައި ހިފޭނެ މަގު ތަނަވަސް ކުރުމަށް ޔޫޕީއައިގެ އެމްއޯޔޫގައި ސޮއިކުރިއިރު، އެ ކަމަކީ ސޯލިހުގެ ސަރުކާރުގައި މަޝްވަރާކޮށް އެއްބަސްވުމަކާ ހިސާބަށް ގޮސްފައިވާ ކަމެއް ކަމަށާއި އެކަން އެ މަގުން ކޮށްދެއްވީތީ ޝުކުރު އަދާކުރެއްވި ކަމަށެވެ.
ޝާހިދުގެ އިތުރުން އެމްޑީޕީގެ ވަފުދާ ބައްދަލުކުރެއްވުމަށްފަހު "އެކްސް" ގައި ކުރެއްވި ޕޯސްޓެއްގައި ޖައިޝަންކަރު ވިދާޅުވީ އެމްޑީޕީއާ ބައްދަލުކުރެވުމަކީ ލިބުނު އުފަލެއް ކަމަށާއި ރާއްޖެ އާއި އިންޑިއާގެ ގުޅުން ވަރުގަދަ ކުރަން އެޕާޓީން ކުރާ މަސައްކަތް ބަލައިގަންނަ ކަމަށެވެ.
ޖައިޝަންކަރުއާ އެމްޑީޕީގެ ފަރާތުން ބައްދަލު ކުރެއްވީ ޝާހިދުގެ އިތުރުން އެ ޕާޓީގެ ޕީޖީ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އާއި ނައިބު ރައީސް ހިސާން ހުސެއިން އާއި ޔޫތު ވިންގްގެ ރައީސް ރިފްގާ ޝިހާމް އާއި ފޮރިން ރިލޭޝަންސް ކޮމިޓީގެ ޗެއާ އާމިނަތު ޝައުނާ އާއި ސެކެޓްރީ ޖެނެރަލް ޝާޒްލީ ޝަފީގު އަދި ހެންވޭރު ދެކުނު ދާއިރާގެ ކުރީގެ މެންބަރު ހުސެއިން ޝަހީމް އެވެ.
