ގާނޫނުތައް ނުހަދައި ރަސްމާލެއިން އެއްބައި އިޒްރޭލަށް ވާގިވެރިވާ ޔޫއޭއީގެ އީގަލް ހިލްސްއަށް ދޭން ނިންމީ ގާނޫނުއަސާސީއާ ހިލާފަށް ކަމަށް ކުރީގެ އުއްތަމަ ފަނޑިޔާރު އަހްމަދު އަބްދުﷲ ދީދީ މިއަދު ވިދާޅުވެއްޖެ އެވެ.
ރާއްޖެ ޓީވީގެ ފަށާއިރު ޕްރޮގްރާމުގައި ދީދީ ވިދާޅުވީ ރަސްމާލެއިން އެއްބައި އީގަލް ހިލްސްއަށް ދޭން ސަރުކާރުން ނިންމީ ރާއްޖޭގައި އޮންނަ ބާރުތައް ވަކިވެފައި އޮންނަ ނިޒާމު މުގުރާލުމަށްފަހު، އެކަމަށް ހަދަންޖެހޭ ގާނޫނުތައް ނަހަދައި ކަމަށެވެ. އެގޮތުން ގާނޫނުތައް ބަދަލުކޮށްގެން ދެން ހަދާ އެއްބަސްވުންވެސް ވެގެންދާނީ ގާނޫނީ އުސޫލާ ހިލާފަށް ހަދާ އެއްޗަކަށް ކަމަށް އޭނާ ވިދާޅުވި އެވެ.
"ހަގީގަތުގައި ގާނޫނުއަސާސީއާ ހިލާފުވަނީ ކޮން އޭންގަލަކުންތޯ. ސެޕެރޭޝަން އޮފް ޕަވާސް. އަޅުގަނޑުމެން މި ކިޔާ ބާރުތައް ވަކިވެފައި އޮންނަ ނިޒާމަށްވެސް ވާހަކައަކީ ވަޔަލޭޓް އެބަ ކުރައްވާ ސަރުކާރުން. ސަރުކާރުން މި ހައްދަވަނީ މިސާލަކަށް އެމީހުންނަށް [އީގަލް ހިލްސްއަށް] ވައުދެއް މިވަނީ އެގްރީމަންޓް ހައްދާނަމޭ ކިޔާފައި، އެމީހުންނަށް ހައްގުތަކަކާއި އިންތިޒާމުތަކެއް. ރައިޓްސް އޮބްލިގޭޝަންތަކެއް އުފައްދާފައި މި ދެނީ އިންޓެންޓުގެ ދަށުންވެސް މިސާލަކަށް،" ދީދީ ވިދާޅުވި އެވެ.
"އިންޓެންޓެކޭ ކިޔަސް، ކޮންމެ ނަމެއް ކިޔަސް އޭގައި ބަލަންޖެހޭނީ އޭގެ އިބާރާތްތައް. ފްރޭމްވޯކް އެގްރީމަންޓެއް ވެއްޖެއްޔާ އެ ހުރި އިބާރާތްތަކުން އިންތިޒާމުތަކަކާއި ހައްގުތަކެއް އޭގެ އުފެދިފައި އޮވެއްޖެއްޔާ އޭގެ މާނައަކީ އޭގެ ފަހުން ގާނޫނުތަކެއް ހަދައިގެން އޭގެ ދަށަށް ފައިނަލް އެގްރީމަންޓްތަކެއް ގެންދެވިއްޖެއްޔާ ރެޓްރޮސްޕެކްޓިވްކޮށް، އޭގެ މާނައަކީ ރަޖުއީ އަސަރަކުން އެ އެޕްލައިކުރާ ކުރުމަކީ އެއީ ގާނޫނީ އުސޫލުތަކާ މުޅިން ހިލާފު އެއްޗެއް."
ދީދީ ވިދާޅުވީ ވެރިކަން ހިންގުމުގެ ބާރުން ގާނޫނުތައް ހަދާނަމޭ ބުނާއިރު، ގާނޫނު ހަދާ ބާރަކީ މަޖިލިސް ކަމަށެވެ. ނަމަވެސް ރައްޔިތުންގެ މަޖިލިސް ފެނިގެންދަނީ ސަރުކާރުން ބުނާހާ ކަންތައްތައް ކުރަން ހޮވާފައި ތިބި ބައެއް ގޮތުގައި ކަމަށާއި އޭގެއިން ދޭހަވަނީ ރާއްޖެ ގޮސްފައިވާ ހިސާބު ކަމަށް އޭނާ ވިދާޅުވި އެވެ.
"ވެރިކަން ހިންގުމުގެ ބާރުން މި ބުނަނީ ތިމަންނަމެން ގާނޫނު ހަދާނަމޭ. ގާނޫނު ހަދާފައި ފަހުން އެއްބަސްވުން ހަދާނަމޭ. އެމީހުންނަކީ ގާނޫނު ހަދާ ބާރުތޯ. ގާނޫނު ހަދާ ބާރަކީ ރައްޔިތުންގެ މަޖިލިސް. އަޅުގަނޑުމެންގެ ރިޔާސީ ނިޒާމެއްގައި މިއޮތީ ބާރުތައް ވަކިވެފައި. މި ނިޒާމުގައި ރައްޔިތުންގެ މަޖިލީހަކަށް ނެތް ދެއްތޯ ބަހުސްކުރުމުގެ ބާރެއްވެސް ނޫނިއްޔާ އިދިކޮޅު ހެދުމުގެ ބާރެއްވެސް ނެތި ހަމަ ސަރުކާރުން ބުނާހާ ކަންތައްތައް ކުރަން ހޮވާފައި ތިބި ބައެއްތޯ. މީގެއިން ދޭހަވަނީ ރާއްޖެ ގޮސްފައި އޮތް ހިސާބު،" އޭނާ ވިދާޅުވި އެވެ.
ސަރުކާރުން ބުނަނީ އީގަލް ހިލްސްއަށް ރަސްމާލެ ވިއްކާލަނީ 99 އަހަރަށް ކަމަށެވެ. ނަމަވެސް އީގަލް ހިލްސް އިން ބުނެފައި ވަނީ ސަރުކާރުން އެ ބުނާ 99 އަހަރުގެ މުއްދަތު ހަމަވުމުގެ ކުރިން ރަސްމާލޭގެ ޕްރޮޕަޓީއެއް ވިއްކާލައިފި ނަމަ ނުވަތަ ހިބައިން ދީފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
ސަރުކާރުން ބުނަނީ ރަސްމާލެއަށް އީގަލް ހިލްސް އިން 20 ބިލިއަން ޑޮލަރު އިންވެސްޓު ކުރާނެ ކަމަށެވެ. އެކަމަކު އީގަލް ހިލްސް އިން ބުނަނީ އެ ކުންފުނިން އިންވެސްޓު ކުރާނީ 12 ބިލިއަން ޑޮލަރު ކަމަށެވެ. އަލައްބާރު ފަހުން ވިދާޅުވީ 20 ބިލިއަން ޑޮލަރަކީ އެތަނުގެ މަސައްކަތް ނިމުމުން ތަނުގެ އަގު ހުންނާނެ މިންވަރު ކަމަށެވެ.
ރަސްމާލެ ދޫކޮށްލަނީ 99 އަހަރަށް ކަމަށް ސަރުކާރުން ބުނެ އެވެ. އެއީ ގާނޫނުތައް ހުއްދަ ކުރާ ކަމަކަށް ނުވާތީ ސަރުކާރުން އުޅެނީ އެ ޕްރޮޖެކްޓަށް ފަހިކުރަން ގާނޫނުތަކެއް ހަދާށެވެ. އަދި ނޮވެމްބަރު 11، ގައި އެގްރިމެންޓުގައި ދާއިމީ އެގްރިމެންޓުގައި ސޮއި ކުރެވޭތޯ މިހާރު ދަނީ މަސައްކަތް ކުރަމުންނެވެ.
