ރައީސް މުހައްމަދު މުއިއްޒަކީ އިސްލާމީ ވެރިއެއް ނޫން ކަމަށާއި އެމަނިކުފާނު ކުރައްވަނީ ސެކިއުލާ ވެރިކަމެއް ކަމަށް ކުރީގެ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ މިއަދު ވިދާޅުވެއްޖެ އެވެ.
ރާއްޖެ ޓީވީގެ ފަށާއިރު ޕްރޮގްރާމުގައި ދީދީ ވިދާޅުވީ މުއިއްޒަށް ރައްޔިތުން އުޅޭ ހާލު ނޭނގޭ ކަމަށާއި އެމަނިކުފާނުގެ އަމަލުތައް ހުންނަވާ ގޮތުން އެއީ އިސްލާމީ ވެރިއެކޭ ނުބުނެވޭނެ ކަމަށެވެ.
"ހަމައެކަނި މާސިޑީޒް ބެންޒް ކާރުގައި އޮފީހަށް ވަޑައިގެން، ގެއަށް ވަޑައިގަތަކަސް ނުފެންނާނެ ދެއްތޯ ދިވެހިން އުޅޭ ހާލަތު. މި ގައުމުގެ ހާލަތު. ވީމާ އިސްލާމީ ވެރިކަމެއް ނޫން އެ ކުރައްވަނީ. އިސްލާމީ ވެރިއެކޭ ނުބުނެވޭނެ އެނގޭތޯ ރައީސް މުއިއްޒަކީ. ރައީސް މުއިއްޒަކީ ހަމައެކަނި އެންމެ ހަމަ ސެކިއުލާ ވެރިއެއްގެ ތަސައްރަފާތު ގެންގުޅުއްވަނީ،" ދީދީ ވިދާޅުވި އެވެ.
ދީދީ ވިދާޅުވީ ޓީވީން މަންޒަރު ދައްކާލަންވެގެން މުއިއްޒު ކުރަމުންދާ ކަންކަމާއި އަގުބޮޑެތި ތަކެތި ތުރުކުރެއްވުމަކީ އިސްލާމީ ވެރިން އަމަލުކުރައްވާ ގޮތް ނޫން ކަމަށައި އިސްލާމީ ތާރީހަށް ވެސް ބަލާލަން ޖެހޭ ކަމަށެވެ.
"ރާއްޖޭގައި މިހާ ބޮޑަށް ބަޖެޓުގެ ގޮތުންނާއި އާމްދަނީ ނުލިބޭ ތަނެއްގައި އަޅުގަނޑުމެންގެ ރައީސް ވާހަކައަކީ ނުޖެހޭނެ ދެއްތޯ އެންމެ އަގުބޮޑު ކޯޓު ތުރުކުރައްވާކަށް. އަގުބޮޑު ގަޑި އަޅުއްވާކަށް. އިސްލާމީ ތާރީހަށްވެސް ބައްލަވާލައްވަން ޖެހޭނެ ދެއްތޯ. ދެން މިހާރު ގައުމުގެ ކަންތައްތައް ހިންގަވާ ގޮތުން ޓީވީން މަންޒަރު ދައްކާލާފައި،" ދީދީ ވިދާޅުވި އެވެ.
"އަވަށްތަކުގެ މީހުންނާއެކު ބައްދަލުވުން ބައްދަލުވުން ނަމުގައި ބޭއްވުމެއް ނޫން. މީގައި ހަގީގީ ބޭނުމަކަށްވާނީ ރައީސުލްޖުމްހޫރިއްޔާ ފަތިސް ނަމާދު ކުރައްވައިގެން ބޭފުޅަކު ނޭނގޭ ގޮތަށް އުމަރުގެފާނު ހެއްދެވިހެން މާލޭ މަގުމަތީގައި ހިންގަވަންވީ ނޫންތޯ. މާލޭގެ މަގުތަކުގެ ހާލަތު ހުރިގޮތް ބަލާލަން. ރައްޔިތުން އުޅޭ ހާލު ބަލާލަން."
ވެރިމީހާގެ އަމުރުމައުރޫފްތަކަށް ފާޑުކިޔުމަކީ އިސްލާމީ ޝަރީއަތުގައި ޖާގަ އޮންނަ ކަމެއްކަން ފާހަގަކުރައްވާ ދީދީ ވިދާޅުވީ ނޫސްވެރިޔަކު އެއްޗެއް ބުނާއިރަށް ގެގް އޯޑަރާ ހިލާފުވި ކަމަށް ބުނެ އޭނާ ހުއްޓުވަން ކޯޓުން އަމުރެއް ނެރޭ ގޮތަށް އަމުނުކުރެއްވޭނެ ކަމަށެވެ.
"ހަގީގަތަކީ ކްރިޓިސައިޒްކުރުމާއި ފާޑުކިޔުމާއި މިކަންތައްތަކަކީ އިސްލާމީ ޝަރީއަތުގައި ފުޅާ ދާއިރާއަކަށް ހުއްދަކޮށްފައި ހުރި ކަމެއް. އެއީ އަމްރު ބިން މައުރޫފް ވަހީ ނަހްޔުލް މުންކަރު އަސްލު މަހްފޫމަކީ. ހަގީގީ މަހްފޫމަކީ. ކޯފާވުމެއް ނޫން. ނޫސްވެރިޔަކު އެއްޗެއް ވިދާޅުވީމަ މިހާރު ތިހިރީ ގެގް އޯޑަރާ ހިލާފުވެފައޭ އެހެން ވިދާޅުވެފައި އޭނަ ހުއްޓާލާފައި ކޯޓު އަމުރެއްހެން އަމުރެއް ނެރުއްވުމެއް ނޫން،" އޭނާ ވިދާޅުވި އެވެ.
މީގެ އިތުރުން ދީދީ ވިދާޅުވީ ރަސްމާލެއިން އެއްބައި އީގަލް ހިލްސްއަށް ދޭން ސަރުކާރުން ނިންމީ ރާއްޖޭގައި އޮންނަ ބާރުތައް ވަކިވެފައި އޮންނަ ނިޒާމު މުގުރާލުމަށްފަހު، އެކަމަށް ހަދަން ޖެހޭ ގާނޫނުތައް ނަހަދައި ކަމަށެވެ. އޭނާ ވިދާޅުވީ ވެރިކަން ހިންގުމުގެ ބާރުން ގާނޫނުތައް ހަދާނަމޭ ބުނާއިރު، ގާނޫނު ހަދާ ބާރަކީ މަޖިލިސް ކަމަށެވެ.
ނަމަވެސް ރައްޔިތުންގެ މަޖިލިސް ފެނިގެންދަނީ ސަރުކާރުން ބުނާހާ ކަންތައްތައް ކުރަން ހޮވާފައި ތިބި ބައެއް ގޮތުގައި ކަމަށާއި އޭގެއިން ދޭހަވަނީ ރާއްޖެ ގޮސްފައިވާ ހިސާބު ކަމަށް އޭނާ ވިދާޅުވި އެވެ.
