ދެ ގައުމުގެ ދެމެދުގައި ވެވޭ އެމްއޯޔޫތަކަށްވުރެ ބޮޑަށް އިތުބާރު ކުރައްވަނީ ރަސްމީ އެއްބަސްވުންތަކަށް ކަމަށް ވިދާޅުވެ، އެމްއޯޔޫތައް އެއްބަސްވުންތަކަކަށް ބަދަލުކުރުމަށް ޕާކިސްތާނުގެ ބޮޑުވަޒީރު ޝެހްބާޒް ބާރުއަޅުއްވައިފި އެވެ.
ރައީސް މުހައްމަދު މުއިއްޒު ޕާކިސްތާނަށް ކުރައްވަމުން ގެންދަވާ ދަތުރުގެ ތެރެއިން އެ ގައުމުގައި ބޭއްވި ރާއްޖެ-ޕާކިސްތާން ބިޒްނަސް ފޯރަމްގައި ޝެހްބާޒް ވިދާޅުވީ ދެ ގައުމެއްގެ ދެމެދުގައި ކުރެވޭ މުއާމަލާތްތަކުގައި އެމްއޯޔޫއަށްވުރެ ބޮޑަށް އެއްބަސްވުންތަކަކީ މާ ވަރުގަދަ އަދި އެއަށް ވުރެ އިތުބާރު ހުރި ވަސީލަތެއް ކަމަށެވެ.
އެމްއޯޔޫތަކަކީ އެއަށް އަމަލީ ސިފަ އައިސް އެއްބަސްވުންތަކަކަށް ބަދަލުނުވާހާ ހިނދަކު، އެއީ އެންމެ އެދެވޭ ނަތީޖާ ނެރެވޭނެ އެއްޗެއް ނޫން ކަމަށް އަބަދުވެސް ގަބޫލުކުރައްވާ ކަމަށާއި ދެ ގައުމުގެ ދެމެދުގައި މިހާރު ހުރި އެމްއޯޔޫތައް ވީހާވެސް އަވަހަށް ރަސްމީ އެއްބަސްވުންތަކަކަށް ބަދަލުވެގެން ދިއުމަކީ ނުހަނު ބޭނުންފުޅުވާ ކަމެއް ކަމަށް ޝެހްބާޒް ވިދާޅުވި އެވެ.
ޝެހްބާޒް ވިދާޅުވީ ކަނޑުގެ މަގުންނާއި ވައިގެ މަގުންވެސް ރާއްޖެއަށް ސީދާ ދަތުރުތައް ކުރެވޭނެ ގޮތެއް އޮތުމަކީ މުހިންމު ކަމެއް ކަމަށެވެ. އެގޮތުން އެކަމަށް ދެ ގައުމުގެ ސަރުކާރުން ގުޅިގެން މަސައްކަތްކޮށްފިނަމަ ހާސިލުވާނެ ކަމަށް ބޮޑުވަޒީރު ވިދާޅުވި އެވެ.
ރާއްޖެއާއެކު އޮންނަ ވިޔަފާރީގެ ގުޅުން ވަރުގަދަކުރުމުގެ ގޮތުން ޕާކިސްތާނުގެ މަތީ ފަންތީގެ ވަފުދެއް ރާއްޖެއަށް ފޮނުއްވުމަށް ނިންމާފައިވާކަން ފާހަގަކުރައްވާ ޝެހްބާޒް ވިދާޅުވީ އެ ވަފުދުގައި ހިމެނޭނީ ރާއްޖެއަށް މުދާ އެކްސްޕޯޓް ކުރުމުގެ ތަޖުރިބާ ހުރި ޕާކިސްތާނުގެ ފާހަގަކޮށްލެވޭ ވިޔަފާރިވެރިންނާއި، ސަރުކާރުގެ ކަމާބެހޭ މިނިސްޓަރުންނާއި އިސް އޮފިޝަލުންނެވެ.
މި ވަފުދުގެ ދަތުރުގެ މައިގަނޑު މަގްސަދަކީ ރާއްޖެއަށް ބޭނުންވާ އެކި ދާއިރާތަކުން ޕާކިސްތާނުގެ އުފެއްދުންތައް ފޯރުކޮށްދެވޭނެ ގޮތްތައް ބަލައި، ވިޔަފާރީގެ އާ ފުރުސަތުތައް ހޯދުން ކަމަށް ބޮޑުވަޒީރު ވިދާޅުވިއެވެ.
މީގެއިތުރުން ޕާކިސްތާނަށް މުއިއްޒު ކުރެއްވި ދަތުރާއެކު ދެ ގައުމުގެ ގުޅުމަށް އައު ސަފުހާއެއް ހުޅުވިފައިވާ ކަމަށާއި މި އަހަރު ތެރޭގައި ޕާކިސްތާނަށް އިތުރު ދަތުރެއް މުއިއްޒު ކުރައްވާނެ ކަމަށް އުންމީދުކުރައްވާ ކަމަށް ޝެހްބާޒް ވިދާޅުވި އެވެ.
